ސަމަންތާ އަށް ބޮލީވުޑުން އެންމެ ކަމުދަނީ ރަންބީރް

ބޮލީވުޑްގެ އެކްޓަރުންގެ ތެރެއިން އެކީގައި މަސައްކަތްކޮށްލަން އެންމެ ބޭނުންވާ އެކްޓަރަކީ ރަންބީރް ކަޕޫރް ކަމަށް އިންޑިއާގެ ދެކުނު ފިލްމު އިންޑަސްޓްރީގެ މަޝްހޫރު ބަތަލާ ސަމަންތާ އަކިނޭނީ ބުނެފި އެވެ.

ބޮލީވުޑް ހަންގާމާ އަށް ދިން އިންޓަވިއުއެއްގައި 34 އަހަރުގެ ބަތަލާ ބުނީ ރަންބީރްގެ އަލަތު ފިލްމު 2007 ގެ "ސާވަރިއާ" ބެލި ފަހުން ރަންބީރަކީ އޭނާގެ ވަރަށް ބޮޑު ފޭނެއް ކަމަށެވެ. އަދި ރަންބީރަކީ ވަރަށް މޮޅު އެކްޓަރެއް ކަމަށާއި އޭނާއާ އެކު މަސައްކަތެއްކޮށްލަން ލިބޭނެ ކަމަށް އުންމީދުކުރާ ކަމަށް ވެސް ބުންޏެވެ.

އާންމުކޮށް ތެލެގޫ އާއި ތަމަޅަ ފިލްމުތައް ކުޅޭ ސަމަންތާ އަކީ ރަންބީރްގެ ކުރިއަށް ހުރި ފިލްމުތަކުގެ ތެރެއިން "ބުރައްމަސްތުރާ" ގެ ރޯލެއް ކުޅޭ އެކްޓަރު ނާގުރްޖުނާ އަކިނޭނީގެ ޅީދަރިފުޅެވެ. ސަމަންތާގެ ފިރިމީހާ އަކީ ނާގުރްޖުނާގެ ދޮށީ ދަރިފުޅު އަދި އެކްޓަރު ނާގަ ޗައިތަނިއާ އެވެ. އެ ދެ މީހުން ކައިވެނިކުރީ 2017 ގަ އެވެ.

ނާގަ މިހާރު އަންނަނީ ބޮލީވުޑަށް ނުކުންނަން ތައްޔާރުވަމުންނެވެ. އެއީ އާމިރު ޚާންގެ "ލާލް ސިންގް ޗައްޑާ" ގެ ރޯލަކުންނެވެ.

މިހާތަނަށް އަދި ބޮލީވުޑްގެ ފިލްމެއްގައި މަސައްކަތްކޮށްފައިވާ ނުވާ ސަމަންތާ ވަނީ ހިންދީ ވެބް ސީރީޒެއްގައި މަސައްކަތްކޮށްފަ އެވެ. އެއީ އެމެޒޯން ޕްރައިމް ވީޑިއޯ އިން ސްޓްރީމްކުރަން ތައްޔާރުވަމުން އަންނަ ރާޖް އެންޑް ޑީކޭގެ "ދަ ފެމިލީ މޭން" ގެ ދެވަނަ ސީޒަންގެ ބޮޑު ރޯލަކުންނެވެ.

އޭގައި ކުޅެން ލިބުނު ރޯލާ ބެހޭ ގޮތުން ސަމަންދާ ބުނީ އެއީ ހުވަފެނީ ރޯލެއް ކަމަށާއި އެ ރޯލު ކުޅެން ލިބުމަކީ ވަރަށް ބޮޑު ކާމިޔާބީއެއް ކަމަށެވެ. އަދި އޭގައި އެކްޓަރު މަނޯޖް ބަޖްޕާއީއާ އެކު މަސައްކަތްކުރަން ލިބުމަކީ ވެސް ވަރަށް ރަނގަޅު ތަޖުރިބާއެއް ކަމަށް ބުންޏެވެ.

ބޮލީވުޑް ފިލްމަކަށް ސޮއިކުރުމާ ބެހޭ ގޮތުން ސުވާލު ކުރުމުން ސަމަންތާ ބުނީ އެކަން ނުވެގެން އުޅެނީ އޭނާ ބިރުން އުޅޭތީ ކަމަށެވެ.

"ވަރަށް ޓެލެންޓެޑް މީހުން ތިބި އިންޑަސްޓްރީއެއް އެއީ. އެކަމަކު އަހަންނަށް ހީވަނީ އަހަރެން ބޮލީވުޑް ދެކެ ވަރަށް ބިރުގަންނަހެން،" މިދިޔަ އަހަރު ދިވެހިރާއްޖޭގައި ޗުއްޓީ ވެސް ހޭދަކުރި ބަތަލާ ބުންޏެވެ. "އެކަމަކު ދެން ސީރިއަސްކޮށް ވިސްނާނަން ބޮލީވުޑްގެ ފުރުސަތަކާ ދޭތެރޭ."

ފަހަކަށް އައިސް އިންޑިއާގެ ދެކުނު ފިލްމު އިންޑަސްޓްރީގެ ތަރިންނަށް ބޮލީވްޑްގެ ފިލްމުތަކުން ވަރަށް ގިނައިން ފުރުސަތު ލިބެ އެވެ.