"އަނޫޕަމާ" އިން އަޕްރޫވާ ގެއްލެނީ

ސްޓާ ޕްލަސްގެ ސިލްސިލާ "އަނޫޕަމާ" ގެ ކާސްޓާ މިދިޔަ އެޕްރީލް މަހު ގުޅުނު އެކްޓަރު އަޕޫރްވާ އަގްނިހޯތުރީ އެ ސިލްސިލާ އިން ގެއްލެން އުޅޭ ކަމަށް ބުނެފި އެވެ.

އޭގެ ޕްރޮޑިއުސަރު ރަޖަން ޝާހީއާ އެކު ނަގާފައިވާ ފޮޓޯއެއް އިންސްޓަގްރާމްގައި ޕޯސްޓްކޮށް، ޑރ. އަދުވައިތު ކަންނާގެ ރޯލު ކުޅުނު އެކްޓަރު ބުނީ މިހާރު މިއޮތީ އަނެއްކާ ވެސް ވަރަށް ހިތްގައިމު ތަޖުރިބާއެއްގެ ނިންމާލެވިފައި ކަމަށާއި "އަނޫޕަމާ" އިން ފުރުސަތުދިން ކަމަށްޓަކައި ޝުކުރު އަދާކުރާ ކަމަށެވެ.

އަޕޫރްވާ ކުޅުނު ރޯލަކީ އަނޫޕަމާގެ ވަރަށް ގާތް ރައްޓެއްސެއްގެ ގޮތުގައި ފެނިގެން ދިޔަ ކެރެކްޓާއެކެވެ. ކެންސަރާ ހަނގުރާމަކޮށް މިހާރު އޮޕަރޭޝަން ވެސްކޮށްފައިވާ އަނޫމަޕާގެ އޮޕަރޭޝަންގައި ވެސް އިސްކޮށް ހުރީ އަދުވައިތު އެވެ.

ބެލެވޭ ގޮތުން "އަނޫމަޕާ" އިން އަޕޫރްވާ ގެއްލޭނީ އަންނަ ހަފުތާގެ ތެރޭގަ އެވެ.

މިދިޔަ އަހަރު ދައްކަން ފެށި އެ ސިލްސިލާ މިހާރު ގޮސްފައިވާ ހިސާބަށް ބަލާ އިރު އަނޫޕަމާ (ރުޕާލީ ގަންގޫލީ) އާއި ވަންރާޖް ޝާހް (ސުދާންޝޫ ޕާންޑޭ) ވަރިވެ، ވަންރާޖް މިހާރު ވަނީ ކާވިއާ (މަދަލްސާ ޝަރުމާ) އާ ކައިވެނިކޮށްފަ އެވެ. އެހެންވެ ކުރިއަށް ދެން އޮތީ މި ކައިވެނީގެ ސަބަބުން ވަންރާޖްގެ ހަޔާތަށް ކުރިމަތިވާ ހާޖާނުގަނޑެވެ.

"އަނޫމަޕާ" ގައި އަޕޫރް، 48، ކުޅުނު ކެރެކްޓާ އަށް ނިމުން ގެންނަން ނިންމި އިރު އޭނާ އަކީ ކުރިން ވެސް ކާމިޔާބު ސިލްސިލާތަކެއް ކުޅެފައިވާ އެކްޓަރެކެވެ. ޓީވީ ބަތަލާ ޝިލްޕާ ސަކްލާނީގެ ފިރިމީހާ ކުޅެފައިވާ ސިލްސިލާތަކުގެ ތެރޭގައި "ބޭޕަނާ"، "އަޖީބު ދާސްތާ ހެ ޔޭ"، "އާސްމާން ސޭ އާގް" އަދި "ޖެސީ ޖޭސީ ކޮއި ނެހީ" ހިމެނެ އެވެ.

އަޕޫރްވާ އަކީ ފިލްމުތަކެއް ވެސް ކުޅެފައިވާ އެކްޓަރެކެވެ. އޭގެ ތެރޭގައި "ޕަރުދޭސް"، "ކަސޫރު" އަދި "ލަކީރު" ހިމެނެ އެވެ.