ސަލްމާނަށް އަލަށް ބައޮގްރަފިކަލް ޑްރާމާއެއް

ސަލްމާން ޚާންގެ ފިލްމީ ކެރިއަރުގައި މުޅިން އަލަށް ބައޮގްރަފިކަލް ޑްރާމާއަކަށް އެއްބަސްވެފައިވާ ކަމަށް ރިޕޯޓްތައް ބުނެފި އެވެ.

ޕިންކްވިލާ އިން ބުނި ގޮތުގައި މި ފިލްމަކީ އިންޑިއާގައި ތާރީހުގައި އެންމެ ފާހަގަކޮށްލެވުނު ޖާސޫސް ކަމަށްވާ "ބްލެކް ޓައިގާ" ގެ ނަމުން މަޝްހޫރުވި ރަވިންދުރަ ކޯޝިކަށް ބިނާކޮށް، ޑައިރެކްޓަރު ރާޖްކުމާރު ގުޕްތާ ހަދާ ފިލްމެކެވެ.

ބައޮގްރަފިކަލް އެކްޝަން ތުރިލާއެއްގެ ގޮތުގައި ހަދަން ނިންމާފައިވާ ފިލްމާ ބެހޭ ގޮތުން އޭނާ އެ ނޫހަށް ދިން އިންޓަވިއުއެއްގައި ބުނީ ފިލްމުގެ ސްކްރީންޕްލޭ ސަލްމާނަށް ނެރޭޓްކޮށް ދިނުމުން އެއަށް އެއްބަސްވާނެ ކަމަށް ބުނެފައިވާ ކަމަށެވެ.

"މި ފިލްމު ވާނެ އިންޑިއާގެ އިންޓެލިޖެންސް ސެކިއުރިޓީއާ ބެހޭ ގޮތުން ކުރިން ނޭނގޭ ހައިރާން ކުރުވަނިވި އެތައް ކަމެއް އެނިގެން ދާނެ ފިލްމަކަށް. ހަގީގަތުގައި ރަވިންދުރަ އަކީ އިންޑިއާގެ ތާރީހުގައި ފާހަގަކޮށްލެވުނު އެންމެ ވަރުގަދަ ސްޕައި،" ގުޕްތާ ބުންޏެވެ. "އޭނާގެ ވާހަކަ ކިޔައިދޭން އަހަރެން ލިޔުނު ސްކްރީންޕްލޭ އަކީ ފަސް އަހަރު ދުވަހުގެ މަސައްކަތް."

އޭނާ ބުނި ގޮތުގައި މި ފިލްމަށް ސަލްމާން ރުހުން ދިނުމަކީ ވަރަށް ބޮޑު އުފަލެކެވެ. އަދި ސަލްމާން ކުޅޭނެ ފުރަތަމަ ބައޮގްރަފިކަލް ޑްރާމާ ހެދުމުގެ ފުރުސަތު ލިބުމަކީ ވެސް ވަރަށް ބޮޑު އުފަލެއް ކަމަށް ބުންޏެވެ.

"ސަލްމާނަކީ ކެރެކްޓާ އަށް ބޭނުންވާ ކަހަލަ ހުރިހާ ސިފައެއް އޭނަގެ ކިބައިގައި ހުރި އެކްޓަރެއް. އެހެންވީމަ އޭނައާ އެކު ފިލްމު ވަރަށް ފުރިހަމަކޮށް ގެނެސްދެވޭނެ،" ގުޕްތާ ބުންޏެވެ. "ރަވިންދުރަ މަޝްހޫރުވީ ބްލެކް ޓައިގާގެ ނަމުގައި ކަމަށް ވިޔަސް ފިލްމު ހަދާނީ އެ ނަމަކު ނޫން."

އެ ނަން ފިލްމަށް ނުދޭން ނިންމި ސަބަކަކީ ޓައިޔާ ކިޔާ ސްޕައި ކެރެކްޓާއެއް ކުޅޭ ފްރެންޗައިޒެއް މިހާރު ވެސް ސަލްމާންގެ އަތުގައި އޮތުމެވެ. ކުރިއަށް އޮތީ އޭގެ ތިން ވަނަ ބައެވެ. ކުރީގެ ދެ ފިލްމަކީ "އޭކް ތަ ޓައިގާ" އާއި "ޓައިގާ ޒިންދާ ހޭ" އެވެ.

ސަލްމާންގެ މި ބައޮޕިކްގެ މަސައްކަތް ފަށަން ނިންމާފައި ވަނީ ބައިޖާން (ކަބީ އީދު ކަބީ ދިވާލީ) ގެ މަސައްކަތް ނިންމުމަށް ފަހު އެވެ. އެ ފިލްމުގެ މަސައްކަތް ފަށާނީ މި އަހަރުގެ ކުރީކޮޅު ޝޫޓިން ފަށާފައި އޮތް "ޓައިގާ 3" ނިންމާލާފައި ކަމަށް ރިޕޯޓްތައް ބުނެ އެވެ.

ގުޕްތާ އަކީ ބެލުންތެރިންގެ ވަރަށް ބޮޑު މަގުބޫލުކަމެއް ހޯދި ނޯ ވަން ކިލްޑް ޖެސިކާ (2011) އާއި އާމިރު (2008) ގެނެސްދިން ޑައިރެކްޓަރެވެ. އޭނާގެ އެންމެ ފަހުގެ ފިލްމަކީ 2019 ގައި އަރުޖުން ކަޕޫރާ އެކު ގެނެސްދިން "އިންޑިއާސް މޯސްޓް ވޯންޓެޑް" އެވެ. ގުޕްތާގެ އިތުރު ފިލްމުތަކުގެ ތެރޭގައި "ރެއިޑް" އާއި "ގަންޗައްކަރު" ހިމެނެ އެވެ.