ވަރަށް ބޮޑެތި އުންމީދުތަކަކާ އެކު މަސައްކަތް ފެށި ނަމަވެސް ފަހުން މަސައްކަތް ހުއްޓި، ނުގެނެސްދެވި ހުރި ބޮލީވުޑްގެ މަޝްހޫރު ތަރިންގެ ފިލްމުތައް ވަރަޑް ގިނަ އެވެ. އޭގެ ތެރެއިން އެންމެ ފާހަގަކޮށްލެވޭ އެއް ފިލްމަކީ އާމިރު ޚާން ކުޅެން ފެށި ސައިންސް ފިކްޝަން ފިލްމު "ޓައިމް މެޝިން" އެވެ.
މި ފިލްމަކީ އެ ޒާތުގެ ފިލްމެއް 1987 ގައި އަނިލް ކަޕޫރާއި ސްރީދޭވީއާ އެކު "މިސްޓަ އިންޑިއާ" ގެ ނަމުގައި ގެނެސްދީގެން ބޮޑު ކާމިޔާބީއެއް ހޯދި ޑައިރެކްޓަރު ޝޭކަރް ކަޕޫރްގެ ފިލްމެކެވެ. "ޓައިމް މެޝިން" އަކީ 1992 ގައި މަސައްކަތް ފެށި ފިލްމެކެވެ. އޭގެ ބަތަލާ އަކީ ރަވީނާ ޓަންޑަން އެވެ. އަދި ކާސްޓްގައި ގުލްޝަން ގްރޯވާ ވެސް ހިމެނެ އެވެ.
އެ ފިލްމުގެ ހަނދާންތަކެއް 29 އަހަރު ފަހުން އާކޮށްފައި ވަނީ ގުލްޝަން އެވެ. "ޓައިމް މެޝިން" ގެ ސެޓުން އާމިރާ އެކު ނަގާފައިވާ ފޮޓޯއެއް އިންސްޓަގްރާމްގައި ޕޯސްޓްކޮށް، ގުލްޝަން ބުނީ އެ ފިލްމަކީ ނުނިންމުނު ފިލްމެއް ކަމަށެވެ. އެކަމަކު އެކަމާ ބެހޭ އިތުރު ވާހަކައެއް ހާމައެއްނުކުރެ އެވެ.
ބޮޑު ބަޖެޓަކުން ހުވަފެނީ ފިލްމެއްގެ ގޮތުގައި ހަދަން ފެށި "ޓައިމް މެޝިން" އަކީ ހޮލީވުޑްގެ މަޝްހޫރު ޑައިރެކްޓަރު ރޮބަޓް ޒެމެކިސް 1985 ގައި ގެނެސްދިން ސައިންސް ފިކްޝަން ފިލްމު "ބެކް ޓު ދަ ފިއުޗާ" އަސްލަކަށް ބަލައިގެން ހަދަން ފެށި އެއްޗެކެވެ. އެ ފިލްމުގެ ތަރިންނަކީ މައިކަލް ޖޭ ފޮކްސް، ކްރިސްޓޯފާ ލޯއިޑް، ލިއާ ތޮމްްޕްސަން އަދި ކްރިސްޕިން ގްލޯވާ އެވެ.
ރިޕޯޓްތައް ބުނާ ގޮތުން ޝޭކަރްގެ "ޓައިމް މެޝިން" ގެ ގިނަ މަންޒަރުތަކެއް ޝޫޓްކުރި ފަހުން އޭގެ މަސައްކަތް ހުއްޓާލައި، ފިލްމު ވަތްގަނޑަށް ލާން ޖެހުނީ ފަހުން ދިމާވި ބަޖެޓްގެ ދަތިކަމާ ހެދި އެވެ. އެ ފިލްމު އޭރު ހުއްޓުމުން 2008 ގައި ވެސް ފިލްމު އަލުން ހެދޭތޯ ޝޭކަރް މަސައްކަތްކުރި އެވެ. އެކަމަކު އެ ފަހަރު ވެސް އެކަން ކާމިޔާބުވާ ގޮތް ނުވީ އެވެ.
"ޓައިމް މެޝިން" ހުއްޓުމުން ފަހުން ޝޭކަރާ އެކު ފިލްމެއްގެ މަސައްކަތްކުރުމުގެ ފުރުސަތެއް ވެސް ބޮލީވުޑްގެ އެންމެ ހުނަރުވެރި އެކްޓަރުންގެ ތެރޭގައި ހިމެނޭ އާމިރަކަށް ނުލިބެ އެވެ.
ކާމިޔާބު ފިލްމުތައް ކަމަށްވާ މާސޫމް (1983) އަދި ބަންޑިތު ކްއީން (1994) ގެނެސްދިން ޝޭކަރަކީ ހޮލީވުޑްގެ ފިލްމުތައް ކަމަށްވާ އެލިޒަބަތު (1998) އަދި އެލިޒަބަތު: ދަ ގޯލްޑެން އޭޖް (2007) ވެސް ގެނެސްދިން ޑައިރެކްޓަރެވެ.
ޝޭކަރް، 75، އެންމެ ފަހުން ހަދަން އިއުލާންކުރި ހިންދީ ފިލްމަކީ މިދިޔަ އަހަރު ދަންޖެހިގެން މަރުވި އެކްޓަރު ސުޝާންތު ސިންގް ރާޖްޕޫތާ އެކު ހަދަން އުޅުނު "ޕާނީ" އެވެ. ދެހާސް ސާދައިގައި އިއުލާންކުރި ފިލްމުގެ މަސައްކަތް ހުއްޓުނީ ޕްރޮޑަކްޝަން ހައުސް އަދިތިޔާ ޗޯޕްރާގެ ޔާޝްރާޖް ފިލްމްސް (ވައިއާރްއެފް) އާއި ޝޭކަރާ ދެމެދު އުފެދުނު ހިޔާލު ތަފާތުވުންތަކަކާ ހެދި އެވެ.
ނަމަވެސް ޝޭކަރް ބުނެފައި ވަނީ އެ ފިލްމު ކޮންމެވެެސް ދުވަހަކުން ހަނދާނެ ކަމަށާއި އޭރުން ފިލްމު ޑެޑިޑޭޓްކުރާނީ ސުޝާންތަށް ކަމަށެވެ.
