އިޝާނަށް ފަހު އަލީގެ ފިލްމެއް ޝާހިދަށް

މިދިޔަ އަހަރު އެކްޓަރު ޝާހިދު ކަޕޫރްގެ ކޮއްކޮ އިޝާން ހައްތަރާ އެކު "ކާލީ ޕީލީ" ކިޔާ ފިލްމެއް ޕްރޮޑިއުސްކޮށް، ގެނެސްދިން އަލީ އައްބާސް ޒަފަރު ޝާހިދާ އެކު ވެސް ފިލްމެއް ހަދަން ނިންމައިފި އެވެ.

ޓައިމްސް އޮފް އިންޑިއާ އިން ބުނި ގޮތުގައި މި ފިލްމަކީ އަލީގެ ފިލްމު ކުންފުނި އޮފްސައިޑް އެންޓަޓައިންމަންޓުން ހަދާ ފިލްމެކެވެ. މިއީ ބޭރުގެ ތުރިލާއެއްގެ އަސްލަކަށް ބަލައިގެން ހަދަން ނިންމާފައިވާ ފިލްމެކެވެ. އެކަމަކު އެއީ ކޮން ފިލްމެއްކަމާއި ފިލްމު ޑައިރެކްޓްކުރާނެ މީހަކު އަދި ހާމައެއްނުކުރެ އެވެ.

ނަމަވެސް މީގައި ޝާހިދާ އެކު ބަތަލާގެ ރޯލު ކުޅޭނީ ބޫމީ ޕިޑްނޭކްރަރެވެ. މި ދެ ތަރިން އަދި މިހާތަނަށް އެކީގައި މަސައްކަތްކޮށްފައެއް ނުވެ އެވެ.

ޝާހިދު ހިމަނައިގެން އަލީ އާ ފިލްމެއް ޕްރޮޑިއުސްކުރަން ނިންމި އިރު، އޭނާ މިހާރު އަންނަނީ ކެޓްރީނާ ކައިފާ އެކު ދެ ބަޔަކަށް ހަދާ ސުޕަހީރޯ ފިލްމު "ސުޕަ ސޯޗްޖާ" ޑައިރެކްޓްކުރަން ތައްޔާރުވަމުންނެވެ. އަލީގެ އެންމެ ފަހުން ގެނެސްދިން ފީޗާ ފިލްމަކީ 2019 ގެ "ބާރަތު" އެވެ. އަދި މި އަހަރުގެ ކުރީކޮޅު އޭނާގެ އަލަތު ވެބް ސީރީޒް "ތަންޑާވް" އެމެޒޯން ޕްރައިމް ވީޑިއޯ އިން ގެނެސްދީފައިވެ އެވެ.

އަލީ ހަދަން ނިންމާފައިވާ ފިލްމުތަކުގެ ތެރޭގައި "މިސްޓަ އިންޑިއާ" ގެ ޓްރިލޮޖީ ވެސް ހިމެނެ އެވެ. އޭނާ ޕްރޮޑިއުސްކޮށް، މަގުބޫލް ޚާން ޑައިރެކްޓްކުރި "ކާލީ ޕީލީ" އަކީ އިޝާނާއި އަނަންޔާ ޕާންޑޭ ލީޑް ރޯލު ކުޅުނު ފިލްމެކެވެ.

ދެހާސް ނަވާރައިގެ ކާމިޔާބު ފިލްމު "ކަބީރު ސިންގް" އަށް ފަހު، ޝާހިދުގެ އެންމެ އަވަހަށް ރިލީޒްވާން އޮތް ފލްމަކީ ނޮވެމްބަރަށް ތާވަލުކޮށްފައި އޮތް "ޖާޒީ" އެވެ. އޭނާ މިހާރު އަންނަނީ ރާޖް އެންޑް ޑީކޭގެ ވެބް ސީރީޒެއްގެ މަސައްކަތްކުރަމުންނެވެ.