ވިދިޔާގެ "ޖަލްސާ" ފަށައިފި

ބަތަލާ ވިދިޔާ ބާލަން ދާދި ފަހުން ސޮއިކުރި ފިލްމު "ޖަލްސާ" ގެ ޝޫޓިން ފަށައިފި އެވެ.

މި ފިލްމަކީ ހުނަރުވެރި ބަތަލާގެ ކެރިއަރުގެ އެންމެ ކާމިޔާބު އެއް ފިލްމު ކަމަށްވާ 2017 ގެ "ތުމާރީ ސުލޫ" ގެ ޑައިރެކްޓަރު ސްރޭޝް ތުރިވޭނީ ޑައިރެކްޓްކުރާ ފިލްމެކެވެ. ބުޝަން ކުމާރުގެ ޓީ ސީރީޒާއި އަބުންދަންތިއާ އެންޓަޓައިންމަންޓް ގުޅިގެން ހަދާ މި ފިލްމަކީ "ވިމެން ސެންޓްރިކް" ފިލްމެކެވެ. އެހެންވެ "ޖަލްސާ" ގެ މުޅި ޕްލޮޓް އެނބުރޭނީ އަންހެން ކެރެކްޓާތަކެއްގެ ވަށައިގެންނެވެ.

މީގެ ކާސްޓްގައި ވިދިޔާއާ އެކު ޝެފާލީ ޝާހް ވެސް ހިމެނެ އެވެ. މި ފަހުން ވަރަށް ގިނަ ފިލްމުތަކާއި ވެބް ސީރީޒްތަކުގައި ވެސް މަސައްކަތްކުރަމުން އަންނަ ޝެފާލީ، 49، އަކީ މި ވަގުތު ބޮލީވުޑްގައި ސަޕޯޓިން ރޯލުތައް ކުޅޭ ބަތަލާއިންގެ ތެރެއިން އެންމެ ޑިމާންޑް ބޮޑު އެކެކެވެ. "ނަމަސްތޭ ލަންޑަން" ފަދަ ފިލްމުތައް ގެނެސްދިން ޑައިރެކްޓަރު ވިޕުލް ޝާހްގެ އަންހެނުންގެ ކުރިއަށް ހުރި ފިލްމުތަކުގެ ތެރޭގައި އާލިއާ ބަޓްގެ "ޑާލިންސް" އާއި އަޔޫޝްމަން ކްރާނާގެ "ޑޮކްޓަރު ޖީ" ވެސް ހިމެނެ އެވެ.

ޝެފާލީ އެންމެ ފަހުން ފެނިފައި ވަނީ ކަރަން ޖޯހަރްގެ ދަރުމާ ޕްރޮޑަކްޝަނާއި ނެޓްފްލިކްސް ގުޅިގެން ގެނެސްދިން އެންތޮލޮޖީ ފިލްމު "އަޖީބު ދާސްތާންސް" އިންނެވެ.

"ޖަލްސާ" އާ ބެހޭ ގޮތުން ސުރޭޝް ބުނީ މި ފިލްމަކީ "ތުމާރީ ސުލޫ" ކަހަލަ ވަރަށް ޝައުގުވެރި ރީތި ފިލްމަކަށް ވާނެ ކަމަށެވެ. އަދި އެންމެ ބޮޑު އަމާޒަކީ ވެސް ބެލުންތެރިން ގަޔާވާ ކަހަލަ ސާދާ، ރީތި އަދި މޮޅު ފިލްމެއް ގެނެސްދިނުން ކަމަށް ބުންޏެވެ. ސުރޭޝް ބުނި ގޮތުގައި އަލުން ވިދިއާއާ އެކު މަސައްކަތްކުރުމުގެ ފުރުސަތު ލިބުމަކީ ވަރަށް ބޮޑު އުފަލެކެވެ.

"ޖަލްސާ" އަންނަ އަހަރު ބެލުންތެރިންނަށް ގެނެސްދޭނެ އެވެ. އެކަމަކު އަދި ވަކި ތާރީހެއް އިއުލާނެއް ނުކުރެ އެވެ.

ނެޝަނަލް އެވޯޑް ހޯދާފައިވާ ވިދިޔާގެ އެންމެ ފަހުގެ ފިލްމަކީ ޖޫންގައި އެމެޒޯން ޕްރައިމް ވީޑިއޯ އިން ޕްރީމިއާކުރި "ޝޭރްނީ" އެވެ.