31 އޯގަސްޓް 2021 - 06:35
1 comments
ބޮލީވުޑްގެ ބަތަލާ ޝިލްޕާ ޝެޓީގެ ފިރިމީހާ ރާޖް ކުންދުރާ ޖަލުގައި އޮންނަތާ މިހާރު ދެ މަސް ވަނީ އެވެ. ޝިލްޕާ އަށް މިކަމާ ކުރިމަތިވީ އަހަރުތަކެއްގެ މެދުކެނޑުމަކަށް ކުޅުނު ފިލްމު "ހަންގާމާ 2" މިދިޔަ މަހުގެ ފަހުކޮޅު ރިލީޒްކުރަން އުޅެނިކޮށެވެ. އެހެންވެ ފިރިމީހާގެ މައްސަލަގަނޑާ ހެދި ފިލްމުގެ ތަރުހީބަށް ވެސް ހިޔަނި އެޅުނެވެ. އަނެއްކޮޅުން، ޝިލްޕާ ގެންދިޔައީ ސޮނީ ޓީވީގެ "ސުޕަ ޑާންސާ" ޗެޕްޓަ ހަތަރެއްގެ ޖަޖްކަން ވެސް ކުރަމުންނެވެ.
ބަރަހަނާ ފިލްމު ހަދައި އޭގެ ވިޔަފާރިކުރި މައްސަލާގައި ރާޖް މިދިޔަ މަހުގެ 19 ވަނަ ދުވަހު ހައްޔަރުކުރުމާ އެކު، ޝިލްޕާ ސޮނީގެ ޝޯ އިން ވެސް ދެ ހަފުތާއެއްހާ ދުވަހަށް ގެއްލުނެވެ. އެކަމަކު އޭނާ މިހާރު އެނބުރި އަތުވެއްޖެ އެވެ. ޝިޕްލާ މިހާރު އަމާޒު ހިފާފައި ހުރީ ފިރިމީހާގެ ސަބަބުން އޭނާގެ ހަޔާތަށް އިތުރު ނޭދެވޭ އަސަރެއް ކުރިޔަ ނުދީ ކުރިއަށް ދާށެވެ.
ރިޕޯޓްތައް މިހާރު ބުނާ ގޮތުން ދެ ކުދިންގެ މަންމަގެ ޕްލޭނަކީ ރާޖްއާ ނުލައި ދިރިއުޅުން ކުރިއަށް ގެންދިއުމެވެ. ހާއްސަކޮށްް، އޭނާގެ އެއްވެސް ފައިސާއެއްގައި ޖެހޭކަށް ޝިލްޕާ ބޭނުމެއް ނޫނެވެ. ސަބަބަކީ ރާޖްގެ މިލްކިއްޔާތު ވެސް ބަރަހަނާ ފިލްމުގެ ލައްގަނޑާ އެކު މުޑުދާރުވެފައިވުމެވެ. ބަރަހަނާ ފިލްމު ހަދައި އެއިން އާމްދަނީ ހޯދަމުން ދިޔަ މައްސަލައާ ގުޅިގެން ރާޖްގެ ވަރަށް ގިނަ އެކައުންޓްތަކެއް ވެސް މިހާރު ހުރީ ފްރީޒްކޮށްފަ އެވެ.
ޝިލްޕާގެ ގާތް ރައްޓެއްސަކާ ހަވާލާދީ ބޮލީވުޑް ހަންގާމާ އިން ބުނީ ޝިލްޕާ ދެން ބޭނުން ވަނީ ރާޖްގެ އެއްވެސް ފައިސާއެއްގައި ނުޖެހި، އަމިއްލަ މަސައްކަތުން ހޯދާ ފައިސާ އިން ދިރިއުޅެން ކަމަށެވެ. ޝިލްޕާ އަކީ ޓީވީ ޝޯތަކުންނާއި ބްރޭންޑްތައް އެންޑޯޒްކޮށްދީގެން ވެސް ބޮޑު އާމްދަނީއެއް ލިބޭ ބަތަލާއެކެވެ. އަދި މިހާރު އަލުން ފިލްމު ކުޅެން ފަށާފައިވާތީ، ފިލްމު ކުޅެގެން ވެސް އޭނާ އަށް އާމްދަނީ ހޯދޭނެ އެވެ.
ޝިލްޕާ އަކީ އަމިއްލަ ބައެއް ވިޔަފާރިތައް ވެސް ހިންގާ މީހެކެވެ. އޭގެ ތެރޭގައި ސްޕާ އާއި ވެލްނެސް ސެންޓަރާއި ގޯމޭ ރެސްޓޯރަންޓް ވިޔަފާރި ހިމެނެ އެވެ.
އެކުވެރިޔާ ބުނެފައިވާ ގޮތުގައި ޝިލްޕާ ބޭނުންވަނީ ދަރިންނަށް ވެސް ކުދިންގެ ބައްޕަގެ "ހުތުރު ފައިސާ" އިން ވެސް އެއްވެސް ހޭދައެއްނުކުރާށެވެ. އެހެންވެ ރާޖްއާ ވަކިން ދެން އުޅެން ޖެހުނަސް ޝިލްޕާ އަށް މާލީ ގޮތުން އެއްވެސް ދައްޗަކަށް ނުވާނެ އެވެ.
ޝިލްޕާ ދާދި ފަހުން ބުނި ގޮތުގައި އޭނާ އަށް ކުރިމަތިވާ ނެގެޓިވް ކަންކަމުން އަރައިގަނެ، ދިރިއުޅުމާ ދޭތެރޭ އަބަދު ވެސް ޕޮޒިޓިވްކޮށް ދެކެނީ ޔޯގާ އިން ހޯދާ ހިތްވަރުންނެވެ.
އޭނާގެ ކުރިއަށް އޮތް ފިލްމަކީ ރިލީޒްކުރާނެ ތާރީހެއް އަދި އިއުލާން ނުކުރާ "ނިކައްމާ" އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދާރާ ކާފަ
31 August 2021
ތިޔަ ވެލްނެސްއަކާ ތިޔަ ސްޕާއެއްގެ ވިޔަފާރި ފެށުނީ ތިޔަ ބުނާ ރާޖް ކުންދަރަކާ ހެދި. އޭޒް ޓިޕިކަލް އޭޒް މޮސްޓް ލޭޑީޒް ބޮލީވުޑް ގިނަ ބަތަލާއިންނަކީ އެމީހުންގެ ލޯބިވެރިން ޑިޗް ކޮށްލފާ އުމުރަށްވުރެ ބޮޑު ޝުގަރ ޑެޑީންނާ އިނދެގެން އުޅޭ މީހުން. ބިޕްސް މެން އަމަރް ސިންހްމެނަށް ކޮށްފަ ހުރި ފޯން ކޯލްތައް އަޑުއަހާލަބަލަ.