އެކްޓިންއާ ދުރުގައި ހުންނަތާ ވަރަށް ގިނަ ދުވަސްތަކެއް ފަހުން އެކްޓަރު ފަރުދީން ޚާން އެނބުރި އަންނަ ފިލްމު "ވިސްފޮޓް" ގެ ޝޫޓިން ފަށައިފި އެވެ.
މި ފިލްމަކީ ބުޝަން ކުމާރުގެ ޓީ ސީރީޒާއި ޑައިރެކްޓަރު/ޕްރޮޑިއުސަރު ސަންޖޭ ގުޕްތާގެ ވައިޓް ފެދާ ފިލްމްސް ގުޅިގެން ހަދާ އެއްޗެކެވެ. "ވިސްފޮޓް" ގެ ޑައިރެކްޓަރަކީ މިދިޔަ އެޕްރީލް މަހު ރިލީޒްކުރި އަބީޝެކް ބައްޗަންގެ "ދަ ބިގް ބުލް" ހެދި ކުކީ ގްލާޓީ އެވެ.
ފަރުދީނާ އެކު ރިތޭޝް ދޭޝްމުކް ވެސް މުހިއްމު ރޯލެއް ކުޅޭ ފިލްމަކީ ވެނެޒުއެލާ އިން 2012 ގެ އޮސްކާ އެވޯޑްސްގެ ބޭރު ފިލްމު ކެޓަގަރީ އަށް ފޮނުވި "ރޮކް، ޕެޕާ އެންޑް ސިޒާސް" އަސްލަކަށް ބަލައިގެން ހަދާ އެއްޗެކެވެ.
މީގައި ކިޔައިދޭނީ ޓެކްސީ ޑްރައިވަރެއްގެ ގޮތުގައި މަސައްކަތްކުރާ ކުރީގެ ޑްރަގް ޑީލަރަކު (ފަރުދީން)، ޕައިލެޓެއް (ރިތޭޝް ދޭޝްމުކް) ގެ ދަރިފުޅު ކިޑްނެޕްކުރުމުން ދިމާވާ ހާދިސާތަކެކެވެ.
"ވިސްފޮޓް" ގެ ބަތަލާ އަކީ ޕްރިޔާ ބަޕަޓް އެވެ. މި ފިލްމަށް ފަރުދީން ސޮއިކުރީ އެކްޓިންއާ ދުރުގައި ހުންނަތާ 11 ވަރަކަށް އަހަރު ފަހުންނެވެ. އަދި އަލުން ބޮލީވުޑަށް އައުމުގެ ދަތުރު އޭނާ ފެށީ ފިލްމު ކުޅެން ފެށި ފަހުން ވަރަށް ބޮޑަށް ފަލަވެ، ކުރީގެ ރީތި ސިފަ ގެއްލިފައި ވަނިކޮށް، ހަށިގަނޑަށް ވަރަށް ބޮޑު ބަދަލެއް ވެސް ގެނައުމަށް ފަހު އެވެ.
ކުރީގެ މަޝްހޫރު އެކްޓަރު ފީރޯޒް ޚާންގެ ދަރިފުޅު ފަރުދީން، 47، ގެ ކެރިއަރުގެ ފާހަގަކޮށްލެވޭ ފިލްމުތަކުގެ ތެރޭގައި "ޖަންގަލް"، "ބޫތު"، "ލަވް ކޭ ލިޔޭ ކުޗް ބީ ކަރޭގާ"، "ޕިޔާރު ތޫނޭ ކިޔާ ކިޔާ" އަދި "ނޯ އެންޓްރީ" ހިމެނެ އެވެ.
އޭނާ އެންމެ ފަހުން ފެނިފައި ވަނީ 2010 ގެ "ދުލްހާ މިލްގަޔާ" އިންނެވެ.
