ކާތިކަށް އެންމެ ބޮޑު އަގެއް "ޝެހެޒާދާ" އިން

މިދިޔަ މަހުގެ ތެރޭގައި ޝޫޓިން ފެށި ފިލްމު "ޝެހެޒާދާ" އަކީ ބޮލީވުޑްގެ ޒުވާން އެކްޓަރު ކާތިކް އާރިޔަނަށް މިހާތަނަށް އެންމެ ބޮޑު އަގެއް ލިބޭ ފިލްމު ކަމަށް ރިޕޯޓްތައް ބުނެފި އެވެ.

މީގެ އަހަރެއް ކުރިން ފިލްމު ކުޅޭ އަގު 3 ކްރޯޑް ރުޕީސް އިން 7 ކްރޯޑަށް ބޮޑުކުރި އެކްޓަރަށް "ޝެހެޒާދާ" އިން 21 ކްރޯޑް ރުޕީސް (2.81 މިލިއަން ޑޮލަރު) ލިބޭ ކަމަށް މީޑިއާތަކުން ބުނެ އެވެ. މިއާ އެކު، މި މަހުގެ 22 ގައި 31 އަހަރު ފުރޭ އެކްޓަރު ވެފައި މި ވަނީ ބޮލީވުޑްގައި މިހާރު ތިބި ޒުވާން އެކްޓަރުންގެ ތެރެއިން އެންމެ ބޮޑު އަގެއް ލިބޭ އެކަކަށެވެ. ބައެއް މީޑިއާތަކުން ބުނި ގޮތުގައި ކާތިކް މިހާރު ނިންމާފައި އޮތީ ފިލްމުގެ ޖޯންރާ އާއި ކުޅެން ޖެހޭ ކެރެކްޓާ އަށް ކުރަން ޖެހޭ މަސައްކަތްތަކަށް ރިއާޔަތްކޮށް ފިލްމުތަކަށް އަގުކިޔާށެވެ.

އޭނާ އަކީ މިހާރު ވަރަށް ޑިމާންޑް ވެސް ބޮޑު ބަތަލެކެވެ. އޭނާ ސޮއި ކޮށްފައި ހުރި އިތުރު ފިލްމުތަކުގެ ތެރޭގައި މިހާރު ޝޫޓިން ނިމިފައި އޮތް "ފްރެޑީ" އާއި "ބޫލް ބުލައްޔާ" ގެ އިތުރުން "ސަތިއަނާރާޔަން ކީ ކާތާ" އާއި "ކެޕްޓަން އިންޑިއާ" ހިމެނެ އެވެ.

އެންމެ އަވަހަށް ރިލީޒްވާން އޮތް ކާތިކްގެ ފިލްމަކީ މި މަހުގެ 19 ގައި ނެޓްފްލިކްސް އިން ޕްރީމިއާކުރާ "ދަމާކާ" އެވެ.

ދެހާސް އަށާރައިގެ "ސޯނޫ ކޭ ޓިޓޫ ކީ ސްވީޓީ" ގެ ބޮޑު ކާމިޔާބީ އަށް ފަހު ވިދުން ގަދަވި އެކްޓަރު މިހާރު ޝޫޓް ކުރަމުން އަންނަ ފިލްމު "ޝެހެޒާދާ" އަކީ މިދިޔަ އަހަރު ރިލީޒްކުރި ތެލެގޫ ފިލްމު "އާލާ ވައިކުންތަޕުއްރަމުލޫ" ގެ ރިމޭކެކެވެ. ކްރިތީ ސެނަން ބަތަލާގެ ރޯލު ކުޅޭ ފިލްމުގެ ޑައިރެކްޓަރަކީ އެކްޓަރު ވަރުން ދަވަންގެ ބޭބެ ރޯހިތު ދަވަނެވެ.

ކާސްޓްގައި މަނީޝާ ކޮއިރަލާއި ޕަރޭޝް ރާވަލް ވެސް ހިމެނޭ "ޝެހެޒާދާ" ސިނަމާތަކަށް ގެންނާނީ އަންނަ އަހަރުގެ އަހަރުގެ ނޮވެމްބަރު 4 ގަ އެވެ.