މި މަހު ކުރީކޮޅު ކުއްލި ގޮތަކަށް މަރުވި އެމެރިކާގެ ސެނެޓަރު ލިންޑްސީ ގްރޭހަމް އަކީ އީރާނާ ދެކޮޅަށް ފުޅާ ދާއިރާއެއްގައި ހަނގުރާމައެއް ފެށުމަށް ސިއްރިއްޔާތުގައި އެންމެ ބޮޑަށް މަސައްކަތްކުރި އެކަކުކަން ހާމަވާ ވީޑިއޯތަކެއް އާންމުވެއްޖެ އެވެ.
އިނގިރޭސި ޑޮކިއުމެންޓަރީ ފިލްމު އުފައްދާ އެލެކްސް ހޯލްޑާ ތައްޔާރުކުރަމުންދާ "ލިންޑްސީސް ގޭމް" ތަހުގީގީ ފިލްމަށް ރެކޯޑުކޮށްފައިވާ 100 ގަޑިއިރަށް ވުރެ ގިނަ އިރުގެ ވީޑިއޯތަކުން ހާމަވާ ގޮތުގައި، ސެނެޓަރު ގްރޭހަމް ވަނީ އީރާނާ ދެކޮޅަށް އަސްކަރީ ހަމަލާތައް ދިނުމަށް ވައިޓް ހައުސްއަށާއި ބޭރުގެ ލީޑަރުންނަށް ނުފޫޒު ފޯރުވައިފަ އެވެ.
ގްރަހަމް އަކީ އިޒްރޭލުން ޣައްޒާއަށް ދޭ ހަމަލާތަކަށް ވަރަށް ފާޅުގައި ތާއީދުކޮށް ޣައްޒާ އެއްކޮށް ސުންނާފަތިކޮށްލުމަށް ގޮވާލަމުން ދިޔަ މީހެކެވެ.
އެމެރިކާ އާއި އިޒްރޭލު ގުޅިގެން އީރާނަށް ހަމަލާތައް ދޭން ފެށުމާ އެކު، ގްރޭހަމް އޭނާގެ އޮފީސް މުވައްޒަފުންނާ އެކު އުފާ ފާޅުކުރާ މަންޒަރު ވެސް ފުޓޭޖުން ފެނެ އެވެ.
"އަހަރެންގެ ލޮލުން ކަރުނަ ހިލުނު. މިކަމަށް އެދިގެން އަހަރެމެން މަސައްކަތްކުރާތާ ކިތަންމެ ދުވަހެއް!" ގްރޭހަމް ބުނާ އަޑު އިވެ އެވެ.
އޭނާ ވަނީ އީރާނާ ދެކޮޅަށް ހަނގުރާމަ ފެށުމަށް ކުރި މަސައްކަތަކީ "އޭނާގެ ހަޔާތުގައި ކުރި އެންމެ ރަނގަޅު ކަންތައް" ކަމަށް ވެސް ސިފަކޮށްފަ އެވެ.
މި ފުޓޭޖުތަކުން އެންމެ ބޮޑަށް ފާހަގަކުރެވުނު އެއް ކަމަކީ، ހަނގުރާމަ ފުޅާކުރުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވެސް ގަބޫލުނުވި ބައެއް ކަންކަމަށް ގްރޭހަމް ބާރު އެޅިކަމެވެ.
- ލުބުނާނަށް ހަމަލާދިނުމުގެ ހުށަހެޅުން: މާޗު މަހުގެ ކުރީކޮޅު ނަތަންޔާހޫއަށް ގުޅައި، ލުބުނާނުގެ ހިޒްބުﷲއާ ދެކޮޅަށް އިޒްރޭލުން ދޭ ހަމަލާތަކުގައި އެމެރިކާގެ އަސްކަރިއްޔާއިން ސީދާ ބައިވެރިވުމަށް ގްރޭހަމް ހުށަހެޅި އެވެ.
- ނަތަންޔާހޫގެ އިރުޝާދު: ނަމަވެސް ނަތަންޔާހޫ ވަނީ އެކަމަށް ދެކޮޅުހަދައި، އޭރުގެ މައިގަނޑު އަމާޒަކީ އީރާން ކަމަށާއި، ހިޒްބުﷲއާ ދެކޮޅަށް ފުޅާ ހަނގުރާމައަކަށް ދިއުމަކީ އެ ވަގުތު މަސްލަހަތު އޮތް ގޮތެއް ނޫން ކަމަށް ބުނެ ގްރޭހަމްގެ ހުށަހެޅުމަށް ދެކޮޅުހަދައިފަ އެވެ.
ގްރޭހަމް ވަނީ އެމެރިކާގެ ކުރީގެ ގައުމީ ސަލާމަތާ ބެހޭ މުޝީރު ޖޭކް ސުލިވާން ފަދަ މީހުންނަށް ގުޅައި، ހަނގުރާމަ ފެށޭތާ 3 - 4 ހަފުތާގެ ތެރޭގައި އީރާނުގެ ބޮޑެތި ސިޓީތަކުން ސަރުކާރުގެ ކޮންޓްރޯލް ގެއްލެން ފަށާނެ ކަމަށް ބުނެފަ އެވެ. ނަމަވެސް، އޭނާގެ މި ލަފާކުރުންތައް ނުބައިވެ، ހަނގުރާމަ ވަނީ ދިގުދެމިގެންދާ ބޮޑު ނުރައްކަލަކަށް ބަދަލުވެފަ އެވެ.
އޭގެ އިތުރުން، ޓްރަމްޕްގެ އަރިސް ބައެއް މުޝީރުން އީރާނާ އެކު ސުލްހައިގެ އެއްބަސްވުމަކަށް އައުމަށް ކުރި މަސައްކަތްތަކަށް ގްރޭހަމް ނުރުހުން ފާޅުކުރި މަންޒަރު ވެސް ފިލްމުގައި ހިމެނެ އެވެ.
ގްރޭހަމްގެ ޖަނާޒާގެ ކަންކަން ކުރިއަށްދާ ދަނޑިވަޅެއްގައި މި ފުޓޭޖުތައް އާންމުވުމުން، އެމެރިކާގެ ހާރިޖީ ސިޔާސަތު ބައްޓަންކުރުމުގައި މަޖިލީހުގެ މެންބަރުން ސިއްރިއްޔާތުގައި އަދާކުރާ ނުރައްކާތެރި ރޯލާ މެދު އާންމުންގެ މެދުގައި ވަނީ ބަހުސް އުފެދިފަ އެވެ.
އެލެކްސް ހޯލްޑާގެ މި ޑޮކިއުމެންޓަރީ "ލިންޑްސީސް ގޭމް" ވަރަށް އަވަހަށް އާންމުކުރުމަށް ހަމަޖެހިފައިވާއިރު، މިއީ އެމެރިކާގެ ފަހުގެ ތާރީހުގައި ހިނގައިދިޔަ އެންމެ ބޮޑު އެއް އަސްކަރީ އޮޕަރޭޝަންގެ ފަހަތުގައިވާ ހަގީގަތްތައް ސާފުކޮށްދޭނެ މުހިންމު ހެކިތަކަކަށް ވާނެ ކަމަށް ބެލެވެ އެވެ.
ދެކުނު ކެރޮލައިނާގެ ރިޕަބްލިކަން ސެނެޓަރު ގްރަހަމް އުމުރުން 71 އަހަރުގައި މަރުވީ "ކުއްލި ސިއްހީ ހާލަތެއް ދިމާވެގެން" ކަމަށް އޭނާގެ އޮފީހުން ވަނީ ބުނެފަ އެވެ. ރިޕޯޓުތައް ބުނާގޮތުން އޭނާ މަރުވީ ހާޓް އެޓޭކެއް ޖެހިގެން ކަމަށް ބުނެ ކުރި ރިޕޯޓަކާ ގުޅިގެން އިމަޖެންސީ ހިދުމަތްތަކުން ގޮސް ފަރުވާ ދެމުން ދަނިކޮށް، ވޮޝިންޓަންގައި ހުންނަ އޭނާގެ ގޭގަ އެވެ.
އޭނާ މަރުވީ ތުރުކީގައި އޮތް ނޭޓޯގެ ސަމިޓުގެ އިތުރުން ޔުކްރެއިންނާއި އެހެން ބައެއް ގައުމުތަކަށް ވެސް ދަތުރުތަކެއް ކޮށްފައި އައިތަނާ އެވެ.
ފޮކްސް ނިއުސްއަށް ދިން އިންޓަވިއުއެއްގައި ގްރަހަމް ވަނީ "މިއީ ދީނީ ހަނގުރާމައެއް" ކަމަށާއި، އިޒްރޭލުން އަމިއްލަ ދިފާއުގައި ކުރަންޖެހޭ ކޮންމެ ކަމެއް ކުރަންވީ ކަމަށާއި، ޣައްޒާ އެއްކޮށް "ބިމާ ހަމަކޮށްލަންޖެހޭ" ކަމަށް ބުނެފަ އެވެ.
އެމެރިކާއިން ދެވަނަ ބޮޑު ހަނގުރާމައިގައި ޖަޕާނުގެ ހީރޯޝީމާ އަދި ނާގަސާކީއަށް އެޓަމް ބޮން އެޅިގޮތަށް، އިޒްރޭލުން ވެސް ހަނގުރާމަ ނިންމާލުމަށްޓަކައި ބޭނުންވާ ކޮންމެ ބޮމެއް ބޭނުންކުރުމުގެ ހައްގު އޮންނަންޖެހޭނެ ކަމަށް އޭނާ ބުނެފައިވެ އެވެ. އަދި ސީއެންއެން އިން ކުރި ސުވާލަކަށް ޖަވާބުދެމުން އޭނާ ވަނީ ޣައްޒާގެ އާންމުން މަރުވާ އަދަދަށް އެއްވެސް "ލިމިޓެއް" އޮންނަން ނުޖެހޭނެ ކަމަށް ވެސް ބުނެފަ އެވެ.