މިދިޔަ އޮގަސްޓު މަހުގެ ތެރޭގައި ޒަކާތު ފަންޑުން އެހީގެ ގޮތުގައި ޖުމުލަ 5.1 މިލިއަން ރުފިޔާ ދޫކޮށްފި އެވެ.
އެއީ މިދިޔަ އަހަރުގެ އޮގަސްޓު މަހު ބެހި 4.6 މިލިއަން ރުފިޔާއާ އަޅާ ބަލާއިރު 12 ޕަސެންޓުގެ އިތުރު އަދަދެކެވެ.
މޯލްޑިވްސް ޒަކާތު ހައުސްއިން ބުނިގޮތުގައި މިދިޔަ މަހު އެންމެ ބޮޑު ބައެއް ހޭދަކޮށްފައިވަނީ ފަގީރުންނާއި މިސްކީނުންގެ ބަޔަށެވެ. އެއީ 2.3 މިލިއަން ރުފިޔާ އެވެ. އަދި އޭގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 2.3 މިލިއަން ރުފިޔާ އާއި ޒަރޫރީ ބޭނުންތަކަށް ދޫކުރި 42,500ރ. ހިމެނެ އެވެ.
ދެން އެންމެ ބޮޑު ހޭދައެއް ކޮށްފައިވަނީ ފީސަބީލިﷲގެ ބަޔަށެވެ. އެއީ 2.5 މިލިއަން ރުފިޔާ އެވެ. ތެރޭގައި ދީނީ ޕްރޮގްރާމްތައް ހިންގުމަށް ހޭދަކުރި އެއް މިލިއަން ރުފިޔާ އާއި މަތީ ތައުލީމު ފުރިހަމަކުރުމަށް ދިން އެހީގެ ގޮތުގައި 797,604ރ. އާއި ފޮތްތައް ތަރުޖަމާކުރުމަށް ހޭދަކުރި 579,585ރ. އިތުރުން ހިފްޒު ޕްރޮގްރާމްތަކާއި ކީރިތި ޤުރްއާނުގެ އިލްމު ފެތުރުމަށް ހޭދަކުރި 120,414ރ. ވެސް ހިމެނެ އެވެ.
މީގެ އިތުރުން އޮގަސްޓު މަހުގެ ތަފާސްހިސާބުތަކުން ދައްކާ ގޮތުގައި ދަރަނިވެރިންނަށް އެހީވުމުގެ ބައިން 60,061ރ. ދޫކޮށްފައިވާ އިރު، ހާލުގައި ޖެހިފައިވާ ދަތުރުވެރިންނަށް 19,834ރ. ވަނީ ދޫކޮށްފަ އެވެ.
މިދިޔަ މަހުގެ ތެރޭގައި ޒަކާތު ފަންޑަށް ލިބިފައިވަނީ 7.3 މިލިއަން ރުފިޔާ އެވެ.