ފުރަތަމަ ހާފުގައި ޖެހި ފަސް ލަނޑާ އެކު ރާއްޖޭގެ މައްޗަށް 5-0 އިން ކިރްގިސްތާނުން އަމިއްލަ ގައުމުގައި ކުޅެ ކުރިހޯދައިފި އެވެ.
ރާއްޖޭން މި މެޗާ ކުރިމަތިލީ، ޗައިނާގައި އެ ގައުމާ ދެކޮޅަށް މިދިޔަ ބުރާސްފަތި ދުވަހުގެ ރޭ، ކުޅެ 3-0 ބަލިވި މެޗަށް ފަހު އެވެ. އެ މެޗުގެ ފުރަތަމަ ހާފު ލަނޑެއް ޖެހިޔަ ނުދީ ރާއްޖޭން ޗައިނާ ހިފަހައްޓާލި އެވެ.
ކިރްގިސްތާނުގެ މީޑިއާތަކުން ސިފަކުރި ގޮތުގައި ރާއްޖެއާ ދެކޮޅަށް މިރޭ ކުޅުނު މެޗަށް ނުކުތް އިރު އެ ޓީމު އޮތީ ބޮޑު ޕްރެޝަރެއްގަ އެވެ. އެއީ އަމިއްލަ ދަނޑުގައި އެންމެ ފަހުން ކުޅުނު ހަތަރު މެޗުން ވެސް ކިރްގިސްތާނަށް މޮޅެއް ނުލިބި އޮތުމުންނެވެ.
އެކަމަކު މެޗުގެ ފުރަތަމަ 15 މިނެޓް ފުރިހަމަ ނުވަނީސް ރާއްޖޭގެ ކޮޅަށް ލަނޑު ޖަހައި، އެ ޕްރެޝަރު އެ ޓީމުން ކަނޑުވާލި އެވެ.
ރާއްޖޭން މަސައްކަތް ކުރީ ފަހަތަށް ޖެހި، ކޮމްޕެކްޓް ލޯ ޑިފެންސިވް ބްލޮކް ހަދައިގެން ކިރްގިސްތާނުގެ ހަމަލާތައް ހުއްޓުވުމަށެވެ. އަދި ކައުންޓަ އެޓޭކުގައި ފުރުސަތު ތަނަވަސްކުރުމުގެ ގަސްދުގައި ރާއްޖޭން ގޭމް އަތުރާލި އެވެ. ނަމަވެސް ރާއްޖޭގެ ރޭވުންތައް ފެނަށް ދިޔައީ މެޗުގެ 11 ވަނަ މިނެޓުގަ އެވެ.
ދިވެހި ޓީމުގެ ޑިފެންސް ތެރެއިން ލިބުނު ހުސް ޖާގައެއްގެ ބޭނުންހިފައި، ކިރްގިސްތާނުގެ އެރްބޯލް އަޓަބައޭވް ޖެހި ލަނޑާ އެކު އެ ޓީމުން މެޗުގެ ލީޑު ނެގި އެވެ.
ކިރްގިސްތާނުން ކުޅުނީ ވަރުގަދަ ހައި ޕްރެސިން ނުވަތަ ވަރުގަދައަށް ވިއްދައިގެން ކުޅުނު ގޭމެކެވެ. އޭގެ ސަބަބުން ރާއްޖޭގެ ޑިފެންސްގެ މުޅިން ރޫޅިގެން ދިޔަ އެވެ. ފުރަތަމަ ލަނޑަށް މާ ގިނަ ވަގުތެއް ނުވެ، ކިރްގިސްތާނުން ވަނީ މެޗުގެ ނަތީޖާ އެއްކޮށް އަނބުރާލާފަ އެވެ.
މެޗުގެ 20 ވަނަ މިނެޓުގައި ރާއްޖޭގެ ޑިފެންސަށް ހެދުނު ގޯހެއްގެ ފައިދާ ނަގައި، ސިރޮޒްހިއްދީން އަސްތަނަކުލޯވް، ވަނީ ކިރްގިޒްސްތާނުގެ ދެވަނަ ލަނޑު ޖަހައިފަ އެވެ.
މެޗުގެ ކޮންޓްރޯލް ފުރިހަމައަށް އެ ޓީމަށް ލިބުނެވެ.
ރާއްޖޭގެ ޓީމަށް ކުޅުން ހަމައަކަށް އަޅުވާނެ ފުރުސަތެއް ނުލިބުނެވެ.
މެޗުގެ 23 ވަނަ މިނެޓުގައި އަޓަބައޭވް ވަނީ އޭނާގެ ދެވަނަ ލަނޑު ޖަހައިފަ އެވެ. މެޗުގެ ފުރަތަމަ 30 މިނެޓް ނުވަނީސް ރާއްޖެ ކޮޅަށް ތިން ލަނޑު ވަނެވެ.
މެޗުގެ 32 ވަނަ މިނެޓުގައި ވިޓާލީ މުރުޒަކޯވް ވަނީ ޓީމުގެ ހަތަރު ވަނަ ލަނޑު ޖަހައިފަ އެވެ.
ފުރަތަމަ ހާފު ނިމުމުގެ ކުރިން، މެޗުގެ 42 ވަނަ މިނެޓުގައި ޖޯއެލް ކޯޖޯ ވަނީ ކިރްގިސްތާނުގެ ފަސްވަނަ ލަނޑު ޖަހައިފަ އެވެ.
މުޅި މެޗު ކިރްގިސްތާނުން ކޮންޓްރޯލް ކުރި އެވެ.
އެ ގައުމުގައި އިތުރު މެޗެއް އަދި ރާއްޖޭން ކުޅޭނެ އެވެ. އަންނަ ބުރާސްފަތި ދުވަހު ކުޅޭ އެ މެޗުގައި ދިވެހި ޓީމުން ނުކުންނާނީ ލުބުނާނާ ދެކޮޅަށެވެ.
އެ މެޗު ވެސް ކުޅޭނީ މިރޭގެ މެޗު ވެސް ކުޅުނު ކިރްގިސްތާނުގެ ވެރިރަށް ބިޝްކެކްގައި ހުންނަ ދޯލޮން އޮމުރުޒަކޯވް ސްޓޭޑިއަމްގަ އެވެ. ހަމަ އެ ދަނޑުގައި އަންނަ ހޮނިހިރު ދުވަހު ލުބުނާނާ ކިރްގިސްތާނު ވެސް ވާދަކުރާނެ އެވެ.