މާބަނޑު ދުވަސްވަރު ކޮންމެ ކޮންމެ އެއްޗެއް ކެއުމަކީ ބަނޑުގައި އޮންނަ ދަރިފުޅަށް ގެއްލުންތަކެއް ލިބި ބައިގެން ދިއުމަށް މެދުވެރިވެދާނެ ކަމެކެވެ. މިއީ މިކަމާ ބެހޭ ގޮތުން ޓައިމްސް އޮފް އިންޑިއާގައި ޝާއިއުކޮށްފައިވާ ލިޔުމެއްގެ ޚުލާސާ ތަރުޖަމާ އެވެ.
ރަނގަޅަށް ނުކައްކާ ހުންނަ އެއްޗެހި ކެއުމާ މާބަނޑު ދުވަސްވަރު ދުރުވާން ޖެހެ އެވެ. ރޯ ކުކުޅުބިސް އަޅައިގެން ތައްޔާރުކޮށްފައި ހުންނަ ކާނާ އާއި ރަނގަޅަށް ނުކެކި ހުންނަ ބިސް ވެސް މާބަނޑު މީހުންނަށް ރައްކާތެރިއެއް ނޫނެވެ. ބިސް ކާނަމަ ގޮބޮޅި އާއި ހުދުބައި ރަނގަޅަށް ރޯފިލައި ހަރުވެފައިވޭތޯ ޔަގީންކުރަން ޖެހެ އެވެ. ނޫން ނަމަ ކާނާ ވިހަވުމާއި ސަލްމޮނެލާގެ ނުރައްކާ އޮންނާނެ އެވެ.
ބައިގެން ދިއުމަށް މެދުވެރި ވެދާނެ ކާނާ
ދިލަޖައްސާފައި ހުންނަ ސީފުޑް ނުވަތަ އައިސްއަލަމާރީގައި ބަހައްޓާފައި ހުންނަ ސީފުޑް މާބަނޑު ދުވަސްވަރު ކެއުމަކީ ބަނޑުގައި އޮންނަ ދަރިފުޅަށް ގެއްލުން ވެދާނެ ކަމެކެވެ. ސަބަބަކީ މިފަދަ ތަކެތީގައި ލިސްޓީރިޔާ ހުރެދާނެތީ އެވެ. ލިސްޓީރިއާގެ ސަބަބުން އިންފެކްޝަނެއް ޖެހި ދަރިފުޅު ބައިގެން ދިއުމަކީ އެކަށީގެންވާ ކަމެކެވެ.
ރޯ ބިސް
މާބަނޑު މީހުން ރޯ ބިހާއި އެފަދަ ބިހުން ތައްޔާރުކޮށްފައި ހުންނަ ކާނާ ކެއުމާ ދުރުވާން ޖެހެ އެވެ. ސަބަބަކީ މިފަދަ އެއްޗެހިން ސަލްމޮނެލާ އާއި ކާނާ ވިހަވުމުގެ މައްސަލަ ދިމާވެ ބަނޑުގައިވާ ދަރިފުޅަށް ގެއްލުމެއް ވެދާނެތީ އެވެ.
މާބަނޑު މީހުން ރޯ ނުފިލުވާ އަދި ސާފުނުކޮށް ހުންނަ ކިރު އަދި އެފަދަ ކިރުން އުފައްދާފައިވާ ކާއެއްޗެހި ބޭނުން ކުރުމުން ސިއްހީ މައްސަލަތައް ކުރިމަތިވުމަކީ އެކަށީގެންވާ ކަމެކެވެ. ރޯ ބިސް ފަދައިން ރޯ ކިރުން ވެސް ކާނާ ވިހަވުން ކައިރި އެވެ.
ބައިގެން ދިއުމުގެ ނުރައްކާ ބޮޑުވާ ތަކެތީގެ ތެރޭގައި މުރަނގަތޮޅި ހިމެނެ އެވެ. މުރަނގަތޮޅިއަކީ މާބަނޑު މީހުން ކާން ރަނގަޅު އެއްޗެއް ނޫނެވެ. ސަބަބަކީ މުރަނގަ ގަހުގައި އަލްފާ-ސިޓޮސްޓެރޯލް އެކުލެވޭތީ އެވެ. އެސްޓްރޯޖަން ފާޑުގެ މި ސްޓްރަކްޗާއިން ބައިގެން ދިއުން އެކަށީގެންވެ އެވެ.
ޖަނަވާރުގެ މެއަކީ އޭގައި ވަރަށް ގިނަ ސިއްހީ ފައިދާ އެކުލެވޭ އެއްޗެއް ނަމަވެސް މާބަނޑު މީހުން އެ ކައިފި ނަމަ ގެއްލުން ލިބިދާނެ އެވެ. ސަބަބަކީ އެ ޖަނަވާރަކީ އިންފެކްޝަނެއް ހުރި ނުވަތަ ބައްޔެއް ޖެހިފައިވާ އެއްޗެއް ނަމަ އޭގެ މޭގަނޑުން ވިހަ ވެދާނެތީ އެވެ. ލިވާ ގައި ވަރަށް މަތީ މިންވަރަކަށް ވިޓަމިން އޭ އާއި ކޮލެސްޓްރޯލް ވެސް ހުރެ އެވެ. އެހެންކަމުން މާގިނައިން ލިވާ ކައިފި ނަމަ ބަނޑުގައި އޮތް ދަރިފުޅަށް ގެއްލުންވެ ބައިގެން ހިނގައިދާނެ އެވެ.
މާބަނޑު މީހުން، އަލޯ ވެރާ ހިމެނޭ އެއްވެސް އެއްޗެއް ކައި ބޮއެ ހެދުމަކީ ބަނޑުން ލޭ އައިސް ކުއްޖާ ބައިގެން ހިނގައިދާނެ ކަމެކެވެ. އެންމެ ރަނގަޅީ އަލޯ ވެރާގެ އެއްވެސް އެއްޗެއް ބަނޑަށް ފުރަތަމަ ތިން މަހުގައި އެއްގޮތަކަށް ވެސް ބޭނުން ނުކުރުމެވެ.
މި ކާނާ އަކީ މާބަނޑު އަންހެނުންނަށް ނޫނަސް އެންމެންނަށް ވެސް ގެއްލުން ހުރި އެއްޗެކެވެ. ކުރި ފަޅާފައި ހުންނަ އަލުއްވަކީ ވަރަށް ބޮޑު ވިހައެކެވެ. އަލުވިން ކުރި ފަޅަން ފެށުމާ އެކު އެއިން ސިއްހަތަށް ގެއްލުން ހުރި ތަފާތު ވިހަތައް އުފެދެ އެވެ. އަދި މާބަނޑު މީހުން މިފަދަ އަލުވި ނުވަތަ އަލުވި އަޅައިގެން ތައްޔާރުކޮށްފައި ހުންނަ އެއްޗެއް ކައިފި ނަމަ ބަނޑުގައިވާ ދަރިފުޅަށާއި މައިމީހާއަށް ވެސް ގެއްލުންވުން ވަރަށް އެކަށީގެންވެ އެވެ. ފެހިކުލައިގެ ކުރި ޖަހާފައި ހުންނަ އަލުވީގައި ސެލޯނިން ކިޔާ މާއްދާއެއް ހުރެ އެވެ. މިއީ ބަނޑުގައި އޮންނަ ދަރިފުޅުގެ ހެދިބޮޑުވުމަށް ހުރަސް އަޅާ އެއްޗެކެވެ.
ފަޅޯ، ޚާއްސަކޮށް ފެހި ކުލައިގައި ހުންނަ ޅަ ފަޅޮލަކީ ބައިގެން ދިއުމަށް މަގުފަހިވާ އެއްޗެކެވެ. ސަބަބަކީ ޅަ ފަޅޮލުގައި ހުންނަ އެންޒައިމްއެއްގެ ސަބަބުން ބަނޑަށް ވޭން ވަރު އަންނަ ގޮތް މެދުވެރިވާތީ އެވެ. މިގޮތަށް ވޭންވަރު ނެގުމަކީ ބައިގެން ދިއުމަށް މަގުފަހިވާ ކަމެކެވެ.
ވިހާ ވަގުތު ވިހެއުމުގެ މަރުހަލާތައް އަވަސްކޮށް ފަސޭހަ ކުރުމަށްޓަކައި، މާބަނޑު މީހުންނަށް އަލަނާސި ޖޫސް ދެ އެވެ. އަލަނާސީގައި ބްރޮމެލައިން އެކުލެވެ އެވެ. މިއީ ޔޫޓެރައިންގެ މަސްތައް އޮމާންކޮށްދޭ އެއްޗެކެވެ. ބަލިވެ އިންތާ ފުރަތަމަ ތިން މަސް ދުވަހުގެ ތެރޭގައި އަލަނާސި ކައި އޭގެ ޖޫސް ބޯ ނަމަ ބައިގެން ދިއުން އެކަށީގެންވެ އެވެ.