ލައިފްސްޓައިލް / ހާޓް އެޓޭކް

ހާޓް އެޓޭކް ޖެހިގެން މަރުވާ އަދަދު އެމެރިކާގައި 90 ޕަސެންޓް ދަށަށް

ހާޓް އެޓޭކް ޖެހިގެން މަރުވާ މީހުންގެ އަދަދު އެމެރިކާގައި ވަރަށް ބޮޑަށް މަދުވެފައިވާ ކަމަށް ދިރާސާއަކުން ވަނީ ދައްކާފައި.

08 ޖުލައި 2025 - 12:55

ސީދާ ހާޓް އެޓޭކް ޖެހިގެން މަރުވާ މީހުންގެ އަދަދު އެމެރިކާގައި 90 ޕަސެންޓު ދަށަށް ގޮސްފައިވާ ކަމަށާއި އެކަމަކު ހިތުގެ އެހެން މައްސަލަތައް އިތުރު ކަމަށް ދިރާސާއަކުން ދައްކައިފި އެވެ.

ދިރާސާގައި އިސްކޮށް އުޅުއްވި ކެލިފޯނިއާގެ ސްޓެންފޯޑް ޔުނިވާސިޓީގެ އިންޓާނަލް މެޑިސިންގެ ތަޖުރިބާކާރެއް ކަމަށްވާ ޑރ. ސާރާ ކިންގު ވިދާޅުވެފައިވަނީ ފާއިތުވި 50 އަހަރުގެ ތެރޭގައި، އެމެރިކާގައި 25 އަހަރުން މަތީގެ މީހުން ހިތުގެ ބަލީގައި މަރުވި ޖުމްލަ ނިސްބަތް 66 ޕަސެންޓަށް ދަށްވި ކަމަށެވެ.

މީގެ އިތުރުން ހާޓް އެޓޭކް ޖެހިގެން މަރުވާ މީހުންގެ އަދަދު ގާތްގަނޑަކަށް 90 ޕަސެންޓް ދަށްވެފައިވާ ކަމަށް އެ ދިރާސާގައި ބުންޏެވެ.

އޭނާ ވިދާޅުވި ގޮތުގައި ފާއިތުވި އަހަރުތަކުގެ ތެރޭގައި ހިތުގެ ބަލިތަކާ ބެހޭގޮތުން އާއްމުންގެ ހޭލުންތެރިކަން ވަނީ އިތުރުވެފަ އެވެ.

ނަމަވެސް، ޖާނަލް އޮފް ދަ އެމެރިކަން ހާޓް އެސޯސިއޭޝަންގައި މިދިޔަ މަހުގެ ފަހުކޮޅު ޝާއިއުކުރި ދިރާސާގައި ވާގޮތުން ހިތުގެ ބަލިތަކުގެ އެހެން ހުރިހާ ބާވަތެއް ކަމަށްވާ އެރިތިމިއާ، ހިތް ފެއިލްވުން އަދި ހައިޕަޓެންސިވް ހިތުގެ ބަލިތަކުން މަރުވާ މީހުންގެ އަދަދު 81 ޕަސެންޓު ވަނީ އިތުރުވެފަ އެވެ.

"ހާޓް އެޓޭކެއް ޖެހިގެން މިހާރު މަރުވުމުގެ ފުރުސަތު ކުރިން އޮތް ވަރަށް ވުރެ ކުޑަ. އެކަމަކު ހާޓްއެޓޭކެއް ޖެހުމުގެ ސަބަބުން ސީރިއަސް ނުކުޅެދުންތެރިކަމެއް ކުރިމަތިވުމުގެ ފުރުސަތު އަދިވެސް ބޮޑު،" ޑެންވާގެ ނޭޝަނަލް ޖުވިޝް ހެލްތުގެ ކާޑިއޯވެސްކިއުލާ ޕްރިވެންޝަން އެންޑް ވެލްނެސްގެ ޑިރެކްޓަރު އެންޑްރޫ ފްރީމަން ވިދާޅުވި އެވެ.

އޭނާ އަކީ މި ދިރާސާގެ ބައިވެރިއެއް ނޫނެވެ.

ހިތުގެ މައްސަލަތަކުގެ ނުރައްކާ ދަނީ ބޮޑުވަމުން

އެ ދިރާސާގައި ވަނީ ހިތުގެ ބަލީގައި 1970 އިން 2022 ވަނަ އަހަރާ ދޭތެރޭގައި މަރުވި މީހުންގެ ތަފާސް ހިސާބުތައް ބަލައިފަ އެވެ. އޭގެ ތެރެއިން، ސަރުކާރުން ބަލަހައްޓާ މައުލޫމާތުން ދެއްކި ގޮތުގައި، 1970 ވަނަ އަހަރު މަރުވި މީހުންގެ 54 ޕަސެންޓަކީ ހާޓްއެޓޭކް ޖެހިގެން މަރުވި މީހުންނެވެ. ނަމަވެސް 2022 ވަނަ އަހަރު އެ އަދަދު ވަނީ 29 ޕަސެންޓަށް ދަށްވެފަ އެވެ.

ހިތުގެ އިލެކްޓްރިކަލް އިމްޕަލްސްތައް ގޯސްވެ ހިތުގެ ވިންދު އާދަޔާ ހިލާފަށް ނުވަތަ ސިކުނޑީގައި "ފްލަޓާ" އިހުސާސެއް އުފެދުމުން ދިމާވާ އެޓްރިއަލް ފައިބްރިލޭޝަން އަދި އެހެނިހެން އެރިތިމިއާގެ ސަބަބުން މަރުވި މީހުންގެ އަދަދު 1970 ވަނަ އަހަރު ވަރަށް މަދެވެ. އެކަމަކު 2022 ވަނަ އަހަރާ ހަމައަށް އައިއިރު އެ އަދަދު 450 ޕަސެންޓު ވަނީ އިތުރުވެފަ އެވެ. އެއީ ހިތުގެ ބަލީގައި މަރުވާ މީހުންގެ ގާތްގަނޑަކަށް ހަތަރު ޕަސެންޓެވެ.

"އެ މުއްދަތުގެ ތެރޭގައި ހިތް ފެއިލްވުމުގެ ސަބަބުން މަރުވި މީހުންގެ އަދަދު 146 ޕަސެންޓު އިތުރުވެފައިވާއިރު، ލޭގެ ޕްރެޝަރު މަތިވުމުގެ މައްސަލަ ދެމިގެންދިއުމުގެ ސަބަބުން މަރުވި މީހުންގެ އަދަދު ވަނީ 106 ޕަސެންޓް އިތުރުވެފަ އެވެ." ދިރާސާއާ ހަވާލާދީ ބީބީސީގައި ބުނެފައިވެ އެވެ.

ފާއިތުވި 50 އަހަރުގެ ތެރޭގައި އޮބެސިޓީ އާއި ޓައިޕް 2ގެ ހަކުރު ބައްޔާއި ލޭގެ ޕްރެޝަރު މަތިވުމާއި ރަނގަޅު ކާނާ ނުކެއުމާއި ހަރަކާތްތެރިވެ އުޅުން މަދުވުމުގެ މައްސަލަ ވަނީ ވަރަށް ބޮޑުވެފަ އެވެ. ދިރާސާގައި ބުނެފައިވާ ގޮތުގައި، 1970 ވަނަ އަހަރު 15 ޕަސެންޓުން 2022 ވަނަ އަހަރު 40 ޕަސެންޓަށް އޮބެސިޓީ އިތުރުވެފައިވެ އެވެ.

ލޭގެ ޕްރެޝަރު މަތިވާ ނިސްބަތް ވެސް 1978 ވަނަ އަހަރު 30 ޕަސެންޓުން 2022 ވަނަ އަހަރު ގާތްގަނޑަކަށް 50 ޕަސެންޓަށް ވަނީ އިތުރުވެފަ އެވެ.

އެ ދިރާސާގައި އެންމެ އިސްކޮށް ހުންނެވި، ސްޓެންފޯޑް ޔުނިވާސިޓީ ސްކޫލް އޮފް މެޑިސިންގެ ކާޑިއޯވަސްކިއުލާ މެޑިސިންގެ ޕްރޮފެސަރު އަދި އެސޯސިއޭޓް ޑީން ފޯ ރިސާޗް ޑރ ލަތާ ޕަލަނިއައްޕަން ވިދާޅުވީ އެ ހުރިހާ ކަމެއްގެ ސަބަބުން ހިތުގެ ބަލިތަކުގެ ބުރަ ބޮޑުވާ ކަމަށެވެ. ހާއްސަކޮށް ހިތް ފެއިލްވުމާއި ހައިޕަޓެންސިވް ހާޓް ޑިޒީޒް އަދި އެރިތިމިއާސް އާ އެ ކަންކަން ގުޅޭ ކަމަށް އޭނާ ވިދާޅުވި އެވެ.

0 ކޮމެންޓް, 0 ރިއެކްޝަންސް

icon happy icon happy 0%
icon sad icon sad 0%
icon angry icon angry 0%
icon wow icon wow 0%
icon inlove icon inlove 0%
The name is already taken The name is available. Register?

އިތުރު ލިޔުންތައް

މަގްބޫލް ލިޔުންތައް

Daily News Digest

Deliver popular news headlines to your inbox!

Subscribe

Download Mihaaru News App

Offline Alerts

SMS 'sub mihaaru' to 5454