ނޭނގި ތިބެ ދަރިންނަށް ދެވޭ ނަފްސާނީ އަނިޔާތަކެއް

ދަރިން ތަރުބިއްޔަތުކުރުމަކީ ބުރަ މަސައްކަތެކެވެ. މިއީ އެންމެ ބުރަ މަސައްކަތް ކަމަށް ބައެއް މީހުން ގަބޫލުކުރެ އެވެ.

ކުދިންގެ މާހައުލުގައި ހިނގާ ހުރިހާ ކަމަކުން އެކުދިންނަށް ނުފޫޒު ފޯރަ އެވެ. އެކުވެރިންގެ ފަރާތުންނާއި ޓީޗަރުންގެ ފަރާތުން ވެސް ފޯރަ އެވެ. ކުދިންގެ މުސްތަގްބަލު ބައްޓަންކުރުމުގައި އެންމެ ބޮޑު ރޯލެއް ކުޅެނީ އެކުދިންގެ މައިންބަފައިންނެވެ.

ނަފްސާނީ އިލްމުގެ މާހިރުން ވިދާޅުވަނީ މައިންބަފައިން ދަރިންނާ ވާހަކަ ދައްކާ ރާގުން ވެސް އަދި ވާހަކަ ދެއްކުމުގައި ބަސްތައް އަތުރާލާ ގޮތުން ވެސް ނުވަތަ ދަރިންނަށް ދޭ ނަމުން ވެސް އެކުދިންނަށް އެކަމުގެ ނޭދެވޭ އަސަރުތައް ކޮށް އެސަރުތައް އެތައް ޒަމާނަކަށް ހުންނަ ކަމަށެވެ.

ކްލިނިކަލް ސައިކޮލޮޖިސްޓެއް ކަމަށްވާ ލޯޑަސް ހަނީ ކަރަންޑަންގް އޮޅުންފިލުވައިދެއްވި ގޮތުގައި ނޭނގި ތިބެ ނުވަތަ އިހްތިޔާރަކާ ނުލައި ނަމަވެސް ދަރިންގެ ހިތަށް ނޭދެވޭ އަސަރުތަކެއް ފޯރާ ހަތަރު ކަމެއް މައިންބަފައިންނަށް ކުރެވެ އެވެ. އަދި މި ކަންކަމުގެ ސަބަބުން ކުދިންގެ ދިރިއުޅުމަށް ނޭދެވޭ އަސަރުތައް ކުރެ އެވެ.

އެއްކުއްޖަކާއި އަނެއް ކުއްޖަކު އަޅާކިޔުން

ހުރިހާ ދަރިން ދެކެ މަންމަ އާއި ބައްޕަ ލޯބިވަނީ އެއްވަރަކަށް ކަމަށް ވިޔަސް އެއް ކުއްޖަކީ އަނެއް ކުއްޖަކަށް ވުރެ ހުޝިޔާރު ކުއްޖަކަށް ވެއްޖެ ނަމަ އެހެން މީހުންނަށް އެ ކުއްޖާ ތައާރަފްކުރާއިރު ބުނެވޭ ތަފާތު ބަސްތައް ހިމެނެ އެވެ. މިފަދަ ބަސްތަކުން އެއް ކުއްޖަކު އަނެއް ކުއްޖަކާ ދޭތެރޭ ވެސް ހިތްހަމަނުޖެހި އަދި މައިންބަފައިންނާ ދަރިންނާ އޮންނަ ގުޅުމަށް ވެސް ބުރޫ އަރަ އެވެ.

މިސާލަކަށް މިއީ އަހަރެންގެ އެންމެ މޮޅު ނުވަތަ ކުޅަދާނަ ދަރިފުޅޭ ބުނެ އެއް ކުއްޖަކު ތައާރަފުކޮށްދީފައި އަނެއް ކުއްޖާ ތައާރަފްކުރުމުގައި މިއީ ކިޔަވަން އުޅޭ ކުއްޖެއް ނޫނޭ ބުނުން ކަހަލަ ޖުމްލައެއް އަނެއް ކުއްޖާއާ މުޚާތަބުކޮށް ބުނެލެވެ އެވެ.

ނަފްސާނީ މާހިރުން ވިދާޅުވަނީ މިއީ ބުލީކުރެވުން ކަމަށެވެ. ނުވަތަ ކުއްޖާއަށް ކުރެވޭ އިހާނާތެކެވެ. އެހެން މީހުންގެ ކުރިމަތީގައި ނޭނގި ނަމަވެސް އެ ކުއްޖާ އެ ކޮށްލެވެނީ ދަށެވެ. މިކަހަލަ ކަންތައްތަކުގައި މައިންބަފައިން ކުށްވެރިވާއިރު ވެސް އެމީހުންނަކަށް ގިނަ ފަހަރަށް އެކަމެއް އިހްސާސެއް ވެސް ނުވެ އެވެ.

ޑރ. ކަރަންޑަންގް ވިދާޅުވީ މައިންބަފައިންނަށް ނުވިސްނޭ މިންވަރަށް ކުދިންނަށް މިފަދަ ކަންތައް އިހްސާސް ކުރެވޭ ކަމަށެވެ.

ލޭބަލް ކުރުން

މަޖަލަކަށް ހަދާފައި، ތަފާތު ވަނަންތަކުން މުޚާތަބުކުރުން އެއީ އެހާ ބޮޑު ގޯހެއް ނޫނެވެ. ނަމަވެސް މާ ގިނައިން މި ކަހަލަ ނަންތަކުން ގޮވާ ނަމަ ކުދިންގެ ހިތުގައި މުޅި އުމުރަށް ނުފިލާ ހުންނަ ކަހަލަ ލަކުނުތަކެއް ލެވުމަކީ އެކަށީގެންވާ ކަމެކެވެ. މައިންބަފައިން ދަރިންނާ ދިމާލަށް ތަފާތު ނަން ނަމުން ގޮވުމަކީ އެކުދިން އަމިއްލަ ނަފްސަށް ކުރާ އިތުބާރަށް ވެސް ގެއްލުން ލިބޭ ކަމެކެވެ.

ޑރ. ކަރަންޑަންގް ވިދާޅުވާ ގޮތުގައި ކުދިން ލޭބަލްކޮށް ނަން ނަމުން ގޮވުމަކީ މަންމަ ނުވަތަ ބައްޕައަށް ކުދިންގެ ހިތުގައި އޮންނަ ލޯތްބަށް ވެސް އުނިކަން އަންނަ ކަމެކެވެ. މިސާލަކަށް ވަރަށް ކަންނެތް ކުއްޖެކޭ ވަރަށް މޮޔަ ކުއްޖެކޭ ކަހަލަ ބަސްތަކުން އަބަދު މުޚާތަބުކުރާ ނަމަ އެކުދިން އަމިއްލައަށް ވެސް އެކުދިންނަކީ މޮޔައެކޭ ނުވަތަ ކަންނެތް ކުއްޖެކޭ ގަބޫލު ކުރެވެން ފަށަ އެވެ.

ބުލީ ކުރުމުގެ މިސާލެއް ގާއިމުކުރުން

މައިންބަފައިން ދައްކާ ވާހަކަތަކަށް ކުދިން ހަމައެކަނި ސަމާލުކަން ދެނީއެއް ނޫނެވެ. މައިންބަފައިން ކުރާ ކަންތައްތައް އެކުދިން ދަސް ވެސް ކުރެ އެވެ. އެހެންވެ އެކުދިންގެ ބައްޕަ އަކީ މަންމައަށް އިހްތިރާމް ނުކުރާ އަބަދު މަންމަ ދަށްކޮށްލާފައި ވާހަކަ ދައްކާ މީހެއް ނަމަ ކުދިންނަށް ވިސްނޭނީ ފިރިހެނުންނަކީ އަންހެނުންނަށް ވުރެ މާ މަތީ ބައެއް ކަމަށެވެ. އަދި ފިރިހެނުން ބޭނުން އެއްޗެއް ގޮވައި ބޭނުން ކަމެއް އަންހެނުންނަށް ކުރެވިދާނެ ކަމެވެ. އަދި އަންހެން ދަރިންނަށް ވިސްނޭނީ ފިރިހެނުން ކޮންމެ އެއްޗެއް ކިޔަސް ކޮންމެ ގޮތަކަށް ކަންތައް ކުރިޔަސް ކެތްތެރިވެގެން އެކަން ބަލައިގަނެ މަޑުން ތިބެން ޖެހޭނެ ކަމަށެވެ.

މިހެން ދިމާވަނީ މައިންބަފައިންނަކީ އެ ކުދިންގެ ނަމޫނާ ކަމަށް ކުދިން ދެކޭތީ ކަމަށް ޑރ. ކަރަންޑަންގް ވިދާޅުވި އެވެ.

ތަރުބިއްޔަތުކުރުމުގައި އެކި ކުދިންނަށް ތަފާތުކުރުން

ދަރިންގެ މެދުގައި ތަފާތު ނުކުރާ ކަމަށް ވަރަށް ގިނަ މައިންބަފައިން ގަބޫލު ކުރެ އެވެ. ނަމަވެސް ވަރަށް ގިނަ މައިންބަފައިންގެ ފޭވަރިޓް ދަރިއަކު ހުރެ އެވެ. އަދި އެފަދަ ކުއްޖަކު ކިތަންމެ ގޯސް ކަމެއް ކުރިޔަސް އެއީ ގޯސް ކަމެއް ކަމަށް މަންމަ ނުވަތަ ބައްޕަ ނުދެކެ އެވެ. ފޭވަރިޓް ނޫން ކުއްޖަކު ކިތަންމެ ކުޑަ ގޯސް ކަމެއް ކުރިޔަސް އެއީ މާ ބޮޑު ކަމަކަށް ހަދައިގެން އުޅެ އެވެ. ފޭވަރިޓް ކުއްޖާ ގޯސް ކަމެއް ކުރުމުން އަދަބު ނުދީފައި އެހެން ކުއްޖަކު ކުރާ ކަންތައްތަކަށް އަދަބު ދެވޭތަން އާދެ އެވެ.

ޑރ. ކަރަންޑަންގް ވިދާޅުވީ ހުރިހާ ކުދިންގެ ޝަކުވާތައް ވެސް މައިންބަފައިން ކަނުލާ އަޑުއެހުން މުހިންމު ކަމަށެވެ. އަދި އިންސާފުވެރިކަމާ އެކު، ވަކި ކުއްޖަކަށް ވަކި ގޮތެއް ނަހަދައި މައްސަލަ ހައްލުކުރުން މުހިއްމެވެ. ފަހަރެއްގައި ބޮޑު ކުއްޖާއަށް މާ ބޮޑަށް ވިސްނޭނޭ، ކުޑަ ކުއްޖާ އަކަށް ނުވިސްނޭނޭ ކިޔާފައި ވެސް ކުޑަ ކުއްޖާއާ އެއްކޮޅަށް މައްސަލަ ނިންމުމުގެ ބަދަލުގައި ބޮޑު ކުއްޖާގެ އިހްސާސްތައް ވެސް ދެނެގަންނަން ޖެހޭނެ އެވެ.

"ކުދިންގެ މިޒާޖާއި އުޅުން ބިނާ ވަނީ ގޭތެރޭގެ މާހައުލުގައި ކަންތައްތައް ހުންނަ ގޮތެއްގެ މައްޗަށް. އެހެންކަމުން ކުދިންގެ އަޚްލާގު ރަނގަޅުކުރަން މަސައްކަތްކުރަން ޖެހޭނީ ގޭގައި ތިބޭ މައިންބަފައިން. ކުދިން ދަށްކޮށްލާ ދެރަކޮށްލައިގެން ނުވާނެ. އަދި ކުދިންނަށް އެކި ކަހަލަ ނަންނަމުން ގޮވާ ލޭބަލް ކޮށްގެން ވެސް ނުވާނެ،" ޑރ. ކަރަންޑަންގް ވިދާޅުވި އެވެ.