އައިޖީއެމްއެޗްގައި ފަރުވާ ދިން ކުއްޖަކަށް ދިން ބޭހެއްގެ ސަބަބުން ކުއްޖާގެ މުޅި ހަށިގަނޑުގައި ފޮޅު ނަގައި ފާރުވި ކަމަށް ބުނެ އާއިލާއިން އަންނަނީ ޝަކުވާކުރަމުންނެވެ. ނަމަވެސް ހޮސްޕިޓަލުން ވަނީ އެ ތުހުމަތު ދޮގުކޮށް، އެއީ "ސްޓީވަންސް-ޖޯންސަންސް ސިންޑްރޯމް" ކިޔާ މައްސަލައެއް ކަމަށް ބުނެފަ އެވެ. މިއީ އާންމު ސިއްހީ މައްސަލައަކަށް ނުވާތީ މީގެ ހަގީގަތް އާންމުންނަކަށް ނޭނގެ އެވެ.
މިއީ ވަރަށް މަދުން ދިމާވާ ސިއްހީ މައްސަލަ އެކެވެ. މިކަން ކުއްލިއަކަށް ދިމާވާން މެދުވެރިވަނީ އާދައިގެ އިންފެކްޝަނެއްގެ ސަބަބުން ނުވަތަ ބޭހެއްގެ ސަބަބުން ދިފާއީ ނިޒާމަށް "އޯވާ ރިއެކްޝަނެއް" އައިސްގެންނެވެ.
ތިރީގައި މި ވަނީ އިނގިރޭސި ވިލާތުގެ "ދަ ސަން" ގައި މި ބައްޔާ ބެހޭ ގޮތުން ލިޔެފައިވާ ރިޕޯޓެއްގެ ތަރުޖަމާއެކެވެ.
މި ސިންޑްރޯމަށް ނަން ދީފައިވަނީ 20 ވަނަ ގަރުނުގައި މި ބަލި ދެނެގަތް ދެ ޑޮކްޓަރުންގެ ނަމުންނެވެ. މިކަން މެދުވެރިވުމުން ހަންގަނޑާއި ލޮލާއި އަނގަ އަދި ކަރުތެރޭގެ ހިސާބުތަކުގައި ފޮޅުނެގުމާއި ހަން ދިއުން ފަދަ ކަންތައްތައް ދިމާވެ އެވެ.
މިކަމުން އެންމެ ބޮޑަށް އަސަރުކުރަނީ އަނގަޔާއި ހަޖަމުކުރާ ނިޒާމާއި ބޮޑުކަމުދާ ނަޖިސް ނުކުންނަ ހިސާބާ ގުޅިފައިވާ މަޑު ޓިޝޫ ލޭޔާ ތަކަކަށެވެ. އަދި ދަރިމައިވުމުގެ ނިޒާމާ ގުޅޭ އެތެރެހަށީގެ ގުނަވަންތަކަށާއި އެހިސާބުގައިވާ ދަވައިން ލެވިފައިވާ ދުއްޔަށް ވެސް އަސަރު ކުރެ އެވެ.
ކުޑަކުދިންނަށް އާއްމުކޮށް މި ބަލި ޓްރިގާ ވަނީ ވައިރަލް އިންފެކްޝަންގެ ތެރޭގައި ހިމެނޭ ކޯފުއްޕި އަދި އަރިދަފުސް ރޯގާގެ ސަބަބުންނެވެ. އަދި އެހާ އާއްމު ނޫން ބެކްޓީރިއަލް އިންފެކްޝަނުންނެވެ.
ބޮޑެތި މީހުންނަށް މި މައްސަލަ ކުރިމަތިވަނީ ބޭހަކާ ނުގުޅިގެން އަންނަ ވަރުގަދަ ރިއެކްޝަނަކުންނެވެ.
ދިފާއީ ނިޒާމު ބަލިކަށި، ވައިރަލް އިންފެކްޝަނެއް ޖެހިފައިވާ މީހުންނަށް ނުވަތަ އާއިލާގެ މީހަކަށް މީގެ ކުރިން ސްޓީވަންސް-ޖޯންސަންސް ސިންޑްރޯމް ޖެހިފައިވާ ނަމަ މި ސިންޑްރޯމް ޖެހުމުގެ ނުރައްކާ އިތުރުވެ އެވެ.
އެންމެ ފަހުން އިނގިރޭސި ވިލާތުގައި މި ބަލި ޖެހުނު ކުދިންގެ ތެރޭގައި 18 މަހުގެ ކުޑަ އަންހެން ކުއްޖަކު ހިމެނެ އެވެ.
އޮސްޓްރޭލިޔާގެ މެލްބަންގެ، އުމުރުން އަށް އަހަރުގެ އިސަބެލް އޯލްސަން އަށް މި ބަލި ޖެހުމުގެ ސަބަބުން މި ކުއްޖާގެ ދެ ލޯ ވަނީ އަނދިރިވެފަ އެވެ. އަދި ވާހަކަ ދައްކާށާއި ހިނގަން ވެސް ޖެހުނީ އަލުން ދަސްކޮށްދޭށެވެ.
ދިހަ އަހަރުގެ ފިރިހެންކުއްޖަކަށް ވެސް މި ބަލި ޖެހުމުން ވެސް ދެ ލޯ އަނދިރިވި އެވެ. މި ކުއްޖާއަށް ސްޓީވަންސް-ޖޯންސަންސް ސިންޑްރޯމް ޖެހުނީ ޑޮކްޓަރަކަށް ނުދައްކާ، އާއްމުކޮށް ފިހާރަތަކުން ގަންނަން ލިބޭ ބޭހެއް ކެވިގެންނެވެ.
ސްޓީވަންސް-ޖޯންސަންސް ސިންޑްރޯމްގެ އަލާމާތްތަކަކީ ކޮބާ؟
މި ބަލީގެ ނިޝާންތައް ފެންނަން ފެށުމުގެ ކުރިން ގިނަ ބަޔަކު އަރިދަފުސް ރޯގާ ޖެހުމުން ދިމާވާ ބޮލުގައި ރިހުން، ހުޅުތަކުގައި ރިހުން އަދި ކެއްސުން ފަދަ ކަންތައްތަކެއް ދިމާވެ ބަލިވެގެން އުޅެ އެވެ. ގައިން ބިހިތައް ނަގައިގަންނަނީ އެގޮތަށް ބަލިވެ އުޅޭތާ ދުވަސްކޮޅެއް ފަހުންނެވެ. މި ބިހިތައް ހުންނަނީ ވަށްކޮށެވެ. މެދުގައި ތަންކޮޅެއް އަނދިރިކުލައެއްގެ ބިއްސެއް އިނދެފައި ވަށައިގެން ތަންކޮޅެއް އަލި ކުލައެކެވެ.
މި ބިހިތަކަކީ އެހާ ހިރުވާ އެއްޗެއް ނޫނެވެ. ނަމަވެސް މަދު ގަޑިއިރުތަކެއްގެ ތެރޭގައި ބިހިތައް ބޮޑެތިވެ ބޮޑެތި ފޮޅުތަކަކަށްވެ އެވެ. އަދި ފޮޅުތައް ކަނޑައިގެން ދިއުމުން އެތަންތަން ފާރުވެ އެވެ.
މޫނާއި ތުންފަތް ދުޅަވުމާއި މަތި ބެދިފައި ހުންނަ ފާރުގަނޑުތައް ހުރުމަކީ މި ބަލީގައި ދިމާވާ ކަމެކެވެ. އަނގަޔާއި ކަރުތެރޭގައިވާ ތުނި ދުލިފަށުގައި ވެސް ފޮޅުލައި ކައި ބޮއި އުޅުމަށް ދަތިވުމުގެ ނަތީޖާއަކަށް ވަނީ ގައިން ފެން މަދުވެ ސީރިއަސް ސިއްހީ މައްސަލަތައް ދިމާވުމެވެ.
ލޮލުގެ ސާފަސް އަށް ވެސް ބައެއް ފަހަރަށް އަސަރުކޮށް އެކަށީގެންވާ ފަރުވާއެއް އަވަހަށް ނުދެވިއްޖެ ނަމަ ލޯ ތެރެ ވެސް ފާރުވާން މެދުވެރިވެ އެވެ.
ހަންގަނޑަށް ދިމާވާ މި މައްސަލައަށް ފަރުވާ ކުރަނީ ކިހިނެއް؟
ސްޓީވަންސް-ޖޯންސަންސް ސިންޑްރޯމް ޖެހިފައިވާކަން ޔަގީންކަމާ އެކު ބުނަން އެނގޭނީ ހަމުގެ ޚާއްސަ ޑޮކްޓަރުންނަށެވެ. ނަމަވެސް މި ބަލި ޖެހިފައިވާކަން ޔަގީންކުރަނީ ބައޮޕްސީ ހަދައިގެންނެވެ.
ބަލި ހުރިކަން ޔަގީންވެއްޖެ ނަމަ އަވަހަށް ހޮސްޕިޓަލުގައި އެޑްމިޓް ކޮށްގެން ފަރުވާ ދޭން ފަށަން ޖެހެ އެވެ. ހޮސްޕިޓަލުން ދޭ ފަރުވާ ލަސްވެއްޖެ ނަމަ ފުރާނައަށް ނުރައްކާވުމަކީ ވެސް އެކަށީގެންވާ ކަމެކެވެ.
މި ބަލި ޖެހުމުގެ ސަބަބުން ހަންގަނޑަށް ބޮޑުވަރު ވެފައިވާ މީހުންނަށް އިންޓެންސިވް ކެއާގައި ނުވަތަ ފިހިފައި ތިބޭ މީހުން ބައިތިއްބާ ޔުނިޓުގައި ފަރުވާ ދޭން ޖެހެ އެވެ. މިގޮތަށް ފަރުވާ ދޭއިރު މިކަން މެދުވެރިވީ ކޮން ބޭހެއް ބޭނުން ކުރެވިގެންތޯ ދެނެގަތުމުގެ މަސައްކަތް ޑޮކްޓަރުން ކުރާނެ އެވެ.
ހޮސްޕިޓަލުގައި މި ބައްޔަށް ބޭސް ކުރަނީ ބާރުގަދަ ޕެއިންކިލާ ދީގެންނާއި ހަންގަނޑު ފިނިކުރަން ކޫލް ކޮމްޕްރެސް އަޅައިގެންނެވެ. އެއްވެސް މީރު ވަހެއް ނުހުންނަ މޮއިސްޗަރައިޒާއެއް ގަވާއިދުން އުނގުޅައިގެން އަދި ކޯޓިކޯސްޓެރޮއިޑް ބޭހެއް ދީގެން ހަމުގައިވާ އިންފްލްމޭޝަން ކޮންޓްރޯލް ކުރަން މަސައްކަތް ކުރެވޭނެ އެވެ.
ބައެއް ހާލަތުތަކުގައި، ބަލި ޖެހިފައިވާ ކުދިން ނުވަތަ މީހުންނަށް އަނގައިން އެއްޗެހި ނުދިރުވިގެން ނޭފަތަށް ހޮޅި ގުޅައިގެން ކާ އެއްޗެހި އަޅަ އެވެ.
ބަލި ދެނެގަނެވުމަށް ފަހު ހަމަށް އައި ރިއެކްޝަނަށް ފަރުވާ ކުރަން ފެށުމުން މަޑުމަޑުން އެ ރިއެކްޝަން އައުން ހުއްޓި ހަންގަނޑު ފަސޭހަވެ ދުވަސްކޮޅަކުން އާ ހަން އަރާގޮތް ވާނެ އެވެ.
ބަލި ފަސޭހަވުން އަވަސްވެ ލަސްވުން ބިނާވާނީ އެމީހަކަށް ބަލި ޖެހުނު މިންވަރަކަށެވެ. ބައެއް މީހުން ބަލި މުޅިން ފަސޭހަވާން އެތައް ހަފުތާއެއް ނަގާއިރު އަނެއްބައި މީހުން މުޅިން ފަސޭހަ ވަނީ އެތައް މަސް ދުވަހަކުންނެވެ.
ބަލި ރަނގަޅުވުމަށް ފަހުވެސް ވަރަށް ގިނަ ބަދަލުތައް ހަންގަނޑަށް އާދެ އެވެ. އޭގެ ތެރޭގައި ހަންގަނޑުގެ ކުލަ ބަދަލުވުމާއި ލަކުނު ލުން ފަދަ ކަންތައް ހިމެނެ އެވެ. އަދި ސެލުލައިޓީސް ކަހަލަ ސެކަންޑަރީ ސްކިން އިންފެކްޝަނެއް ވެސް ޖެހިދާނެ އެވެ. ބައެއް މީހުންގެ އެތެރެހަށީގެ ބައެއް ގުނަވަންތަކަށާއި ލޮލަށް އަދި ޖިންސީ ގުނަވަންތަކަށް ވެސް މައްސަލަތައް ދިމާވެ އެވެ.
