ކުޑަކުދިން ބައެއް ފަހަރު ކުރާ ކަންކަމަކީ އަޅާނުލައި ދޫކޮށްލާ ވަރަށް ވުރެ ސީރިއަސް ކަންކަމެވެ. ނަމަވެސް ގިނަ މީހުން މިފަދަ ކަންކަމަށް މާ ބޮޑު ސަމާލުކަމެއް ނުދެ އެވެ. އެއްބަޔަކު ދެކެނީ އެއީ ތުއްތު އިރު ކުރާ ވަރަށް "ލޯބި" ކަމެއްގެ ގޮތުގަ އެވެ. އަނެއް ބަޔަކު ގަބޫލުކުރަނީ އަޅާނުލީމާ އެ ކަންތައްތައް އަމިއްލައަށް ހައްލުވާނެ ކަމަށެވެ. ނަމަވެސް ކުޑަކުދިން ކުރިޔަސް ކުރެވޭނެ ކަންކަމާއި ނުކުރެވޭނެ ކަންކަން ހުންނާނެ އެވެ. އަދި ކުރަން ނުވާ ކަަހަލަ ކަންތައްތައް ކުރުމުން އެއީ ގޯސް ކަމެއް ކަން ކުއްޖާއަށް ވަގުތުން ވިސްނައިދޭން ޖެހޭނެ އެވެ.
އެހެން މީހަކާ ވާހަކަ ދައްކަނިކޮށް ވާހަކަ މެދުކަނޑާލުން
އަޅާނުލައި ދޫކޮށްނުލަންވީ ސަބަބު: ފަހަރެއްގައި ދަރިފުޅު ހުރީ ވާހަކައެއް ބުނާހިތުން ނުވަތަ ސުވާލެއް ކުރާހިތުން ވަރަށް ކެތްމަދުވެފައި ކަމަށް ވެދާނެ އެވެ. ނަމަވެސް އެހެން މީހަކާ ވާހަކައެއް ދައްކަން ހުއްޓާ އެ ދޭތެރެ މެދަށް ވަދެ އެ ކުއްޖާ ވާހަކަ ދައްކަން ފަށަން ހުއްދަ ދިނުމަކީ އެހެން މީހުންނާ ދޭތެރޭގައި ވިސްނަން ޖެހޭނެކަން ކުއްޖާއަށް ދަސްކޮށްދިނުމަށް އެޅޭ ހުރަހެކެވެ. މިހެން ހަދައިފި ނަމަ ތިމާ ބުރަކޮށް އުޅޭ ވަގުތެއްގައި ދަރިފުޅު އެކަނި ކުޅެލާ ހަދަން އުޅޭކަށް ދަހެއް ނުވާނެ އެވެ.
"ގެޓިން ޔުއަ ޗައިލްޑް ފްރޮމް ނޯ ޓު ޔެސް" ލިޔުއްވި ސައިކޮލޮޖިސްޓް ޑރ. ޖެރީ ވިޗްކޮފް ވިދާޅުވީ މިފަދަ ކަންތައްތައް ކުދިން ކުރުމުން ނުހުއްޓުވާ އެކަމަށް އެއްބާރުލުން ދޭ ނަމަ އެހެން އެންމެން ވެސް ސަމާލުކަން ދޭން ޖެހޭނީ ހަމައެކަނި ކުއްޖާ ދައްކާ ވާހަކައަށް ކަމަށް ކުއްޖާއަށް ހީވާނެ ކަމަށެވެ.
ހުއްޓުވާނެ ގޮތް:
ދެން ފަހަރަކުން ފޯނެއް ކުރާ ގަޑީގައި ނުވަތަ ރައްޓެއްސަކާ ބައްދަލުކުރަނިކޮށް ވާހަކަ ނުދައްކަން ކުއްޖާ ގާތު ބުނާށެވެ. އަދި ކުއްޖާއަށް ފޫހިފިލުވަން ކުރާނެ ކޮންމެވެސް ކަމެއް ނުވަތަ ޚާއްސަ ކުޅޭއެއްޗެއް ދޭށެވެ. ވާހަކަ ދައްކަން ހުއްޓާ ގޮސް އަތަށް ދަމާ، ގޮވާ ހަދާ ނަމަ ވާހަކަ ދައްކާ ނިމެންދެން ގޮނޑީގައި ރީތިކޮށް އިށީނދެގެން އިންނަން ބުނާށެވެ. އަދި ފަހުން ކުއްޖާއާ އެކު އެކަނިވުމުން އެގޮތަށް ކަންތައް ކުރާނަމަ އޭނާ ބޭނުން އެއްވެސް ކަމެއް ނުވާނެކަމަށް ބުނާށެވެ.
ކުދިންނާ ތޮޅުން
އެކުގައި ކުޅެން އުޅޭ ކުއްޖެއްގެ ގައިގައި ދަރިފުޅު ޖެހުމަކީ އަޅާނުލާ ދޫކޮށްލާވަރުގެ ކަމެއް ނޫނެވެ. މި ކަހަލަ ކަންކަމަށް ވަގުތުން ފިޔަވަޅު ނާޅައިފި ނަމަ ކުއްޖާގެ ހަރުކަށިކަން އިތުރުވެގެން ދާނެ އެވެ. ކުއްޖަކު ކޮއްޕާލުން ނުވަތަ ކުއްޖަކު ގައިގައި ވިކާލުން ފަދަ އެއްވެސް ކަމެއް ކުއްޖާ ކޮށްފި ނަމަ އެއީ ވަގުތުން ފިޔަވަޅު އަޅަން ޖެހޭނެ ކަންކަމެވެ. މިކަންކަމާ އަޅާ ނުލެވިއްޖެ ނަމަ އުމުރުން އަށް އަހަރު ވާއިރު ކުއްޖާ އަކީ އެހެން ކުދިންނާ ތޮޅޭ ބަސްނާހާ ކުއްޖަކަށްވެ މައިންބަފައިންނަށް ވެސް ކޮންޓްރޯލް ކުރަން އުނދަގޫ ވެދާނެ އެވެ.
ހުއްޓުވާނެ ގޮތް:
މިފަދަ ކަމެއް ކުރާ ވަގުތު އެ ކުއްޖާއާ އެކަމާ ބެހޭ ގޮތުން ވާހަކަ ދައްކާށެވެ. ކުއްޖާ އެއް ފަރާތަކަށް ގެންގޮސް، އެ ކުރި ކަންތަކުން އެހެން ކުއްޖަކަށް އަނިޔާއެއް ލިބިއްޖެ ކަމަށާއި ކުއްޖާއަށް މީހަކު އެފަދަ ކަމެއް ކޮށްފި ނަމަ ތަދުވާނެ ނޫންހޭ ބުނެ ވިސްނައިދޭށެވެ. އަދި ދެން ފަހަރަކުން ކުދިންނާއެކު ކުޅެން ފޮނުވުމުގެ ކުރިން އެއްވެސް ކުއްޖަކަށް އަނިޔާވާ ކަހަލަ ކަމެއް ނުކުރަން ހަނދާން ކޮށްދޭށެވެ. އަދި ރުޅި އައިސްފި ނަމަ ނުވަތަ ކުޅެލާނެ ނުވަތަ ތަނަކަށް އަރާނެ ފުރުސަތެއް ބޭނުންވެއްޖެ ނަމަ އަނިޔާވާ ކަހަލަ ކަމެއް ކުރުމުގެ ބަދަލުގައި ހަދާނެ ގޮތެއް ކުއްޖާއަށް ކިޔައިދޭށެވެ. އަދި ކުއްޖާ ދެ ވަނަ ފަހަރަށް އެފަދަ ކަމެއް ކޮށްފިނަމަ ދެން އިތުރަށް އެހެން ކުދިންނާއެކު ކުޅެން ނުފޮނުވާށެވެ.
ވާހަކަ ދެއްކުން އަޑު ނީވޭ ކަމަށް ހެދުން
އަޅާނުލާ ދޫކުރަން ނުވާ ސަބަބު:
ދަރިފުޅު ކައިރީގައި ކަމެއް ކުރަން ދެތިން ފަހަރަކު ބުންޏަސް އޭނާ ކުރަން ބޭނުން ނޫން ކަމަކަށް ވާތީ އިވޭ ކަމަކަށް ނުހަދާ އަޅާ ނުލައި ހުރެދާނެ އެވެ. އެއީ ކުޅޭ އެއްޗެހިތައް ނެގުން ފަދަ ކަމެއް ވިޔަސް ކުރަން ބޭނުން ނުވާ ނަމަ ކިތަންމެ ވަރަކަށް ބުންޏަސް އަޑު އިވޭ ކަމަކަށް ނަހަދާނެ އެވެ. މިއީ ވަގުތުން ފިޔަވަޅު އަޅަން ޖެހޭނެ ކަމެކެވެ. ސަބަބަކީ މައިންބަފައިންގެ ބަސް ނާހަން ކުއްޖާއަށް ދަސްވަނީ މިފަދަ ކުދިކުދި ކަންތައްތަކުން ފެށިގެން ކަމަށް ވާތީ އެވެ. މިކަހަލަ ކަންތަކާ އަޅާނުލައިފި ނަމަ ކުއްޖާއަށް ހީވާނީ އޭނާ ދައްކާ ވާހަކަ އަހަން ޖެހޭނީ މައިންބަފައިން ކަމަށެވެ.
މާ ގިނަ ފަހަރަށް ދަރިފުޅަށް އެއްކަމެއް ހަނދާން ކޮށްދޭ ނަމަ އޭނާ އަނެއްކާވެސް ހަނދާން ކޮށްދެންދެން މަޑުކުރާނެ އެވެ. އަދި އެއީ އެތައް ފަހަރަކު ބުނެގެން ވެސް އޭނާ އެކަން ނުކޮށް ހުންނަން ދެވޭ ތަމްރީނެކެވެ. ފުރަތަމަ ފަހަރު ބުނެގެން ކުއްޖާ އެ ކަމެއް ކުރަން ދަސްކޮށްދޭން ޖެހޭނެ އެވެ. ތިމާ ދައްކާ ވާހަކަ ކުއްޖާ އަޑު ނޭހުމަކީ ތިމާއަށް ވުރެ ކުއްޖާގެ ބާރުގަދަކަން ދެއްކުމުގެ ފެށުމެކެވެ. މިގޮތަށް އޭނާގެ މިޒާޖު ހުންނަ ނަމަ ތަންކޮޅެއް ބޮޑުވާއިރަށް ހުރިހާ ކަމެއްގެ ކޮންޓްރޯލް އޮންނާނީ ކުއްޖާގެ އަތުގަ އެވެ. މައިންބަފައިން ކަންތައް ކުރަން ޖެހޭނީ އޭނާ ބުނާ ގޮތަކަށެވެ.
މިކަން ހުއްޓުވާނެ ގޮތް:
މާ ދުރުގައި ހުރެގެން ކުއްޖާ ލައްވާ ކަންކަން ކުރުވަން އުޅުމުގެ ބަދަލުގައި ކައިރިއަށް ގޮސް އެކަމެއް ކުރަން ކުއްޖާ ކައިރީގައި ބުނާށެވެ. ވާހަކަ ދައްކާ ވަގުތު ދައްކާ ވާހަކައަށް އޭނާ ސަމާލުވެ އަޑުއަހަން ހަނދާން ކޮށްދޭށެވެ. އަދި ދައްކާ ވާހަކަ އަޑު އިވިއްޖެ ކަމަށް ކުއްޖާ ލައްވާ ބުނުވާށެވެ. ކުއްޖާ އިނީ ޓީވީ ބަލަން ނަމަ ކައިރިއަށް ގޮސް ގައިގައި އަތް ޖައްސާލާފައި، ކުރަންވީ ކަމެއް ކުއްޖާ ގާތު ބުނާށެވެ. އަދި ޓީވީ ނިއްވާލާފައި ކުއްޖާގެ ސަމާލުކަން ހޯދާށެވެ. އެވަރުން ވެސް ގުޑާނުލައިފި ނަމަ އިތުރަށް އަޅާނެ ފިޔަވަޅެއް އަންގާށެވެ.
ބޭރުގައި އުޅޭއިރު އަމިއްލައަށް އެއްޗެހި ނެގުން
އަޅާނުލާ ދޫކޮށްނުލަންވާ ސަބަބު:
ފިހާރައަކަށް ނުވަތަ އެހެން ގެއަކަށް ކުއްޖާ ގޮވައިގެން ދިއުމުން އެ ތަނެއްގައި އޮންނަ އެއްޗެއް ކުއްޖާ އަމިއްލައަށް ނަގާފާނެ އެވެ. އަދި މިއީ ދެ އަހަރުގެ ތުއްތު ކުއްޖެއް ނަމަ މީހުން ލޯބިން އަޅާނުލާ ދޫކޮށްލާ ކަންކަމެވެ. ނަމަވެސް އެ ކުއްޖާ ތަންކޮޅެއް ބޮޑުވެ އަށެއްކަ އަހަރުވާ ފަހުން އެގޮތަށް ގޭގެއަށް ގޮސް އެ އެއްޗެހި ނުދެނީސް ނަގާ ނަމަ އެއީ ވަރަށް ލަދުގަންނަން ޖެހޭނެ ކަމެކެވެ. އެންމެ ކުޑައިރު ނުހުއްޓުވައިފި ނަމަ މިފަދަ ކަންތައް ކުއްޖާއަށް ކުރެވުމަކީ ވަރަށް އެކަށީގެންވާ ކަމެކެވެ.
މިކަން ހުއްޓުވާނެ ގޮތް:
ގޭގައި ގަވައިދު ހަދައި ކުއްޖާއަށް ވެސް ވިސްނޭ ފަދަ ގޮތަކަށް ކިޔައިދޭށެވެ. ހުއްދަ ނުހޯދާ ޓީވީ ވެސް ހުޅުވައިފި ނަމަ ޓީވީ ނިއްވާލާފައި، ހުއްދަ ހޯދަން ބުނާށެވެ. އަދި އެނޫން ވެސް ހުއްދަ ހޯދައިގެން ނެގޭ ކަހަލަ އެއްޗެއް ހުއްދަ ނުހޯދާ ނަގައިފި ނަމަ ހުއްދަ ހޯދަން ބުނެ އެ އާދަ ދަސްކޮށްދޭށެވެ. އެ ގަވައިދަށް އަމަލުކުރަން ޖެހޭނެކަން ވިސްނައިދޭށެވެ.
ބޯހަރުވުން
ބުނާ ބަސް އަޑުނާހާ ބޮޑާ ހޭކުމަކީ ގިނަ ފަހަރަށް ކުދިންނަށް ސްކޫލްގައި އުޅޭ އެހެން ކުދިންގެ ފަރާތުން ދަސްވާ ކަމެކެވެ. މިފަދަ ކަންތައް ކުދިން ކުރަނިކޮށް ފެނުމުން ގެއަށް އައިސް މައިންބަފައިން ޓެސްޓްކުރަން މިފަދަ ކަންތައް ކުދިން ކުރެ އެވެ. މިސާލަކަށް، ކަމެއް ކުރަން ބުނުމުން ތުން ދަމާފައި ރުޅި އައުމާއި ނޫނެކޭ ކިޔާފަ ހަޅޭއް ލެވުން ފަދަ ކަންކަމެވެ. އެއީ ކުޑަވީމާ ކުރާ ކަންކަމޭ ފަހުން ރަނގަޅުވާނޭ ހިތާ އަޅާނުލައި ދޫކޮށްނުލާށެވެ. ފަހަރެއްގައި ތިން ވަނަ ގްރޭޑާ ހަމަޔަށް ދާއިރު ކުއްޖާއަކީ އެކުގައި ކިޔަވާ ކުދިންނަށާއި ޓީޗަރަށް ވެސް އެއްވެސް އިހްތިރާމެއް ނުކުރާ ބަސްނާހާ ކުއްޖަކަށް ވެދާނެ އެވެ.
މިކަން ހުއްޓުވާނެ ގޮތް:
ކުއްޖާއަށް އެ ކުރެވުނީ ގޯސް ކަމެއް ކަން ފުރަތަމަ ފަހަރުވެސް ވިސްނައިދޭށެވެ. މިސާލަކަށް، އެއްޗެކޭ ބުނީމާ ލޮލަށް ނުވަތަ މޫނަށް ވައްތަރެއް ޖެއްސުމަކީ ދައްކާ ވާހަކައާ ހިތްހަމަނުޖެހޭތީ ކުރާ ކަމެއް ކަން ބުނެދޭށެވެ. އެކަހަލަ ކަންތައްތައް ކުރާއިރު ކުއްޖާގެ މޫނު ހުތުރުވާ ކަމާއި އެއީ ހުތުރު ކަންތައްކަން ކުއްޖާއަށް ވިސްނޭ ފަދަ ގޮތަކަށް ބުނެދޭށެވެ. އެގޮތަށް އަމަލުކުރާ ނަމަ ކުއްޖާއާ ވާހަކަ ނުދައްކާ އެތަނުން ދުރަށް ދާށެވެ. އަދި އެގޮތަށް ވާހަކަ ދައްކާ ނަމަ އަޑު ނީވޭނެކަމަށް ބުނާށެވެ. އަދި ރީއްޗަށް ވާހަކަ ދައްކަން ތައްޔާރުވުމުން އަންނާށޭ އޭރުން އަޑު އަހާނަމޭ ބުނާށެވެ.
ހަގީގަތާ ދެކޮޅު ވާހަކަ ދެއްކުން
އަޅާނުލާ ދޫކޮށްލަން ނުވާ ސަބަބު:
ފަހަރެއްގައި ދަރިފުޅު ނުކުރާކަމެއް ކުރީ އޭނާ ކަމަށް ބުނުމަކީ އެހާ ބޮޑު ކަމަކަށް މައިންބަފައިންނަށް ނުވެދާނެ އެވެ. ފަހަރެއްގައި ވޯލްޓް ޑިޒްނީ ވޯލްޑަށް ދިޔައިމޭ ދަރިފުޅު އޭނާގެ އެކުވެރިޔެއް ގާތު ބުނެފާނެ އެވެ. ނަމަވެސް ހަގީގަތުގައި އޭނާއަކީ ދުވަހަކުވެސް މަތިންދާބޯޓަކަށް ވެސް ނާރާ ކުއްޖަކަށް ވެދާނެ އެވެ. މިކަހަލަ ދޮގު ހަދައިގެން ވާހަކަ ދެއްކުމަކީ ކިތަންމެ ކުޑަޔަސް ވަގުތުން ފިޔަވަޅު އަޅަން ޖެހޭނެ ކަމެކެވެ. ސަބަބަކީ އަމިއްލަ ނަފްސަށް މޮޅު މީހަކަށް ވާންވެގެން ދޮގެއް ހަދާލުމަކީ އެންމެ ރަނގަޅު ކަމެއް ކަމަށް ކުއްޖާއަށް ވިސްނި އޮޓޮމެޓިކުން އޭނާއަށް ދޮގު ހެދެން ފެށޭނެތީ އެވެ. އަދި އޭނާ ކުރަން ބޭނުން ނުވާ ކަމެއް ކުރުމުން ދުރުވުމަށް ވެސް ދޮގު ހަދައިގެން ފަރުޖައްސަން ދަސްވާނެ އެވެ.
މިކަންތައް ހުއްޓުވާނެ ގޮތް:
ދަރިފުޅު ކިތަންމެ ކުޑަ ދޮގެއް ހެދިޔަސް ވަގުތުން އޭނާ ގެނެސް އެކަނި ތަނެއްގައި ބައިންދައިގެން އެކަން އޮންނަ ގޮތް ވިސްނޭ ވަރަށް ކިޔައިދޭށެވެ. ޑިޒްނީ ވޯލްޑަށް ދިއުމަކީ ހަގީގަތުގައި ވެސް ވަރަށް މަޖާވާނެ ކަމެއް ކަމަށާއި އެއް ދުވަހަކުން އޭނާއަށް ވެސް އެތަނަށް ދެވިދާނެ ކަމަށް އުންމީދު ކުރެވިދާނެ ކަމަށް ބުނެވިދާނެ އެވެ. ނަމަވެސް އެކުވެރިޔާ ގާތު އެތަނަށް ދިޔައިމޭ ކިޔައިގެން ދޮގު ހެދުމަކީ ގޯހެއްކަން ވިސްނައިދޭށެވެ. އަދި ދޮގު ހަދާ ނަމަ އޭނާ ތެދެއް ހެދިޔަސް މީހުން ގަބޫލު ނުކުރާނެ ކަން ވެސް ވިސްނައިދޭށެވެ. އަދި ދޮގު ހަދައިގެން ސަލާމަތް ނުވޭނެކަން އޭނާއަށް ގަބޫލު ކުރެވޭ ވަރަށް އަމަލުން ދައްކާށެވެ. މިސާލަކަށް، ދަތް އުނގުޅައިފީމޭ ބުނެ ދޮގު ހަދާ ނަމަ އަލުން ދަތް އުނގުޅަން ފޮނުވާށެވެ. އަދި ދަތް އުނގުޅިތޯ ޔަގީން ކުރާށެވެ.
