ލައިބްރަރީން ގެންދިޔަ ފޮތް ހަވާލު ކުރީ ބައި ގަރުނު ފަހުން

އެމެރިކާގެ ނިއު ޖާޒީ ސްކޫލަކުން ގެންދިޔަ ފޮތަކަށް ވީނުވީއެއް ނޭނގިގެން އުޅޭތާ ބައި ގަރުނު ފަހުން އެ ފޮތް ސްކޫލާ ހަމައަށް ފޯރައިފި އެވެ.

އެ ފޮތް އަނބުރާ ސްކޫލަށް ލިބޭނެ ކަމުގެ އުންމީދު ކަނޑާލައިގެން ތިއްބައި ފޮތް ލިބުމުން، މެމޯރިއަލް މިޑްލް ސްކޫލުން އެކަން ސިފަކޮށްފައި ވަނީ "ގެއްލުނު ޖަވާހިރެއް އަނބުރާ ލިބުން" ފަދަ ކަމެއްގެ ގޮތުގަ އެވެ.

"ދަ ފެމިލީ ބުކް އޮފް ވާސް" އެ ސްކޫލްގެ ލައިބްރީން މީގެ 53 އަހަރު ކުރިން 1966 ގައި ގެންދިޔައީ އެތަނުން ކިޔެވި ދަރިވަރެއް ކަމަށްވާ އޭރު އުމުރުން 13 އަހަރުގެ ހެރީ ކްރޭމް އެވެ. މިހާރު އުމުރުން 65 އަހަރުގެ ހެރީ ފޮތް ރައްދު ކުރަން ގޮސް، ވަނީ ފޮތް އޭނާގެ އަތުގައި އޮންނަން ޖެހުނު ސަބަބު ވެސް ކިޔައި ދީފަ އެވެ.

ހެރީ ބުނި ގޮތުގައި ފޮތް އޭނާ އަށް ފެނުނީ ގޭގެ ބޭސްމަންޓް ސާފުކުރަން އުޅުމުގެ ތެރޭގަ އެވެ. އަދި ފޮތް ފެނުމާ އެކު، ވަގުތުން ހަނދާންތައް އާވި ކަމަށާއި އެހެންވެ ފޮތް ރައްދު ކުރަން ބޭނުންވީ ކަމަށް ބުންޏެވެ.

"ފޮތް ފެނުމާ އެކު އަހަރެން ހިތަށް އެރި އެންމެ ރަނގަޅު ގޮތަކަށް ވާނީ މި ރައްދު ކުރުމޭ. އެހެންވެ ފޮތް ހިފައިގެން ސްކޫލަށް ދިޔައީ،" ސީއެންއެން އޭނާ ބުންޏެވެ.

ލައިބްރަރީން ގެއްލިގެން އުޅުނު ފޮތް ލިބުމުން އުފާވެފައި ހުރި މެމޯރިއަލް މިޑްލް ސްކޫލްގެ ވައިސް ޕްރިންސިޕަލް ޑޮމިނިކް ޓާކިއުނޯ ވިދާޅުވީ "މިއީ ލައްކަ ދުވަހު ހޯދި ފޮތެއް" ކަމަށެވެ. އޭނާއަކީ ނަސީބު ދިމާކުކުރި ގޮތުން ހެރީއާ އެއް ދުވަސްވަރެއްގައި އެ ސްކޫލުން ކިޔެވި ދަރިވަރެއް ވެސް މެ އެވެ.

"ވަރަށް އުފާކޮށްފިން ފޮތް އެހާ ޒަމާންކޮށްފައި ވެސް ލިބުނީމަ،" އޭނާ ވިދާޅުވި އެވެ. "ހެރީ އަށް ޝުކުރު އަދާކުރަން އަހަރެމެން ގެއްލިގެން އުޅުނު ޖަވާހިރު ގެނެސް ދިނީތީ."

ހެރީއާ ބެހޭ ގޮތުން ޑޮމިނިކް ބުނީ އޭނާއަކީ ކިޔެވި ދުވަސްވަރު ވަރަށް ބޮޑަށް ކުޅިވަރާއި އިތުރު ހަރަކާތްތަކުގައި ވެސް ބައިވެރިވި ދަރިވަރެއް ކަމަށެވެ.

ފޮތް ރައްދުކުރަން ދިޔަ ނަމަވެސް ޑޮމިނިކް ފިޔަވައި ހެރީ ދަންނަ އިތުރު އެއްވެސް މީހަކާ މެމޯރިއަލް މިޑްލް ސްކޫލުން ދިމައެއް ނުވެ އެވެ.