އިންޑިއާގައި އީ-ސިނގިރެޓް މަނާކޮށްފި

އީ-ސިނގިރެޓާ އެކު އާންމުވަމުންދާ ސިއްހީ މައްސަލަތަކާ މެދު އުފެދިފައިވާ ކަންބޮޑުވުމާ ގުޅިގެން އިންޑިއާ އިން މިއަދުން ފެށިގން އީ-ސިނގިރެޓް މަނާކޮށްފި އެވެ.

މިކަމާ ގުޅޭ ގޮތުން ބޮޑުވަޒީރު ނަރެންދުރަ މޯދީގެ ކެބިނެޓްގައި މަޝްވަރާތަކެއް ކުރުމަށް ފަހު، އިންޑިއާގައި އީ-ސިނގިރެޓްގެ އެއްވެސް މުއާމަލާތެއް ކުރުން މަނާކޮށްފައިކާން އިއުލާންކުރެއްވީ ފިނޭންސް މިނިސްޓަރު ނިރުމަލާ ސިތާރަމް ބޭއްވެވި ނިއުސް ކޮންފަރެންސެއްގަ އެވެ.

މިނިސްޓަރު ވިދާޅުވި ގޮތުގައި އިންޑިއާގައި އީ-ސިނގިރެޓް އުފެއްދުމާއި ވިއްކުމާއި ބޭނުންކުރުމާއި އެތެރެކުރުމާއި ބޭރުކުރުމާއި އިޝްތިހާރުކުރުމާއި ރައްކާ ކުރުން ވެސް މަނާވާނެ އެވެ. އީ-ސިނގިރެޓްގެ 400 ބްރޭންޑެއް މިހާރު ދުނިޔޭގައި ވިއްކަމުން އަންނަ އިރު، އޭގެ ތެރޭގައި 150 ރަހައިގެ އީ-ސިނގިރެޓް ހިމެނެ އެވެ. އެކަމަކު މި ބާވަތްތަކަކީ އިންޑިއާގައި މިހާތަނަށް އުފައްދާ އެއްޗެއް ނޫނެވެ.

ނަމަވެސް މި ފަހަކަށް އައިސް އިންޑިއާގެ ޒުވާނުންނާއި ފުރާވަރު ކުދިންގެ މެދުގައި ޒަމާނީ ފެޝަން ސްޓައިލް ސްޓޭޓްމަންޓެއްގެ ގޮތުގައި އީ-ސިނގިރެޓް ބޭނުންކުރަނުންދާކަން މިނިސްޓަރު ފާހަގަކުރެއްވި އެވެ.

ނިރުމަލާ ވިދާޅުވި ގޮތުގައި މީގެ ތެރޭގައި އުމުރުން ހަގު، ކިޔަވާ ކުދިން ވެސް ހިމެނުމަކީ ކަންބޮޑުވާ މައްސަލައެކެވެ.

"އީ-ސިނގިރެޓް މިހާތަނަށް ޕްރޮމޯޓްކުރަމުން އަންނަނީ އާންމުކޮށް މިކުރާ ދުންފަތުގެ އިސްތިއުމާލަށް ވުރެ ރައްކާތެރި އަދި ދުންފަތުގެ އިސްތިއުމާލުކުރުމުން ދުރުކޮށް ދޭން ވެސް މަގުފަހިކޮށްދޭ އެއްޗެއްގެ ގޮތުގައި،" މިނިސްޓަރު ވިދާޅުވި އެވެ.

"އެކަމަކު ދިރާސާތަކުން ދައްކަނީ އޭގެ އިދިކޮޅު. މިއީ އަހަރެން ދައްކާ ވާހަކައެއް ނޫން. ދިރާސާތަކުން ބުނާ ވާހަކަތައް."

އީ-ސިނގިރެޓް އިންޑިއާގައި މަނާކުރި އިރު، އެއާ ދެކޮޅަށް ފިޔަވަޅުތަކެއް އެޅުމަކީ ދެވަނަ ދައުރަކަށް މޯދީ މަގާމަށް އިންތިހާބުވެވަޑައިގަތް އިރު، 100 ދުވަހުގެ ވައުދުގެ ތެރޭގައި ވެސް ހިމެނޭ ކަމެކެވެ.

ތަފާސްހިސާބުތައް ދައްކާ ގޮތުން އިންޑިއާގައި ދުންފަތުގެ އިސްތިއުމާލާ ގުޅުން ހުރި ސިއްހީ މައްސަލަތަކުގައި އަހަރަކު ނުވަ ލައްކަ މީހުން މަރުވެ އެވެ. އަދި ރިކޯޑްތައް ދައްކާ ގޮތުން، 1.34 ބިލިއަނަށް ވުރެ ބޮޑު އާބާދީއެއް އޮތް އިންޑިއާގައި 100 މިލިއަން މީހުން ދުންފަތުގެ އިސްތިއުމާލުކުރެ އެވެ.

އިންޑިއާގައި އީ-ސިނގިރެޓް މަނާކުރި އިރު ވޭޕިންގެ ވަބާގައި އެމެރިކާ އިން މިހާތަނަށް ހަތް މީހަކު މަރުވެފައިވެ އެވެ. އެ ގައުމުން ވެސް ވަނީ އީ-ސިނގިރެޓް މަނާކުރާނެ ކަމުގެ އިޝާރާތެއް މިދިޔަ ހަފުތާގައި ދީފަ އެވެ. އެމެރިކާގެ ބައެއް ސްޓޭޓްތަކުން މިހާރު ވެސް އަންނަނީ އީ-ސިނގިރެޓާ ދެކޮޅަށް ފިޔަވަޅުތަކެއް އަޅަމުންނެވެ.

ދިޔާ އެއްޗެހި އަޅައިގެން ބޭނުންކުރާ އީ-ސިނގިރެޓް ބުއިމުން މިހާރު އާންމުންދާ ބައްޔަކީ ލިޕޮއިޑް ނިއުމޯނިއާ އެވެ.