އައިސް ކްރީމް އުފައްދާ ބެން އެންޑް ޖެރީސްގެ އައިސް ކްރީމް އިޒްރޭލުގައި އުފައްދައި، ވިއްކުން ހުއްޓައިލަން އެ ކުންފުނިން ނިންމައިފި އެވެ.
މިގޮތަށް ނިންމީ އިޒްރޭލުން ހުޅަނގު އައްސޭރީން ފޭރިގެންފައިވާ ފަލަސްތީނުގެ ބިންތަކުގެ މައްސަލާގައި ބެން އެންޑް ޖެރީސް އިން ފަލަސްތީނާ އެކުގައި އޮތްކަމާއި އިޒްރޭލުގެ އަނިޔާވެރި އަމަލުތަކާ ދެކޮޅުކަން ހާމަކޮށް ދިނުމުގެ ގޮތުންނެވެ.
ދެހާސް ވަނަ އަހަރުން ފެށިގެން އިނގިރޭސިވިލާތުގެ ޔުނިލީވާގެ ދަށުން ހިންގަމުން އަންނަ ކުންފުނިން ނެރުނު ބަޔާނެއްގައި ބުނީ އެ ނިންމުމަކީ ކުންފުނީގެ ފޭނުންނާއި ކުންފުންޏާ އެކީގައި ތިބި ވިޔަފާރި ޕާޓްނަރުންގެ ވެސް ވިސްނުން ކަމަށެވެ. އެހެންވެ އިޒްރޭލުގައި ބެން އެންޑް ޖެރީސްގެ އައިސް ކްރިމް އުފައްދައި، ޑިސްޓްރިބިއުޓްކުރަން ހަދާފައި އޮތް އެއްބަސްވުން މި އަހަރުގެ ނިޔަލަށް ހަމަވުމުން އެ އާ ނުކުރާނެ ކަމަށް ބުންޏެވެ.
"ފަލަސްތީނުގެ ބިންތައް ގަދަކަމުން ފޭރިގަނެގެން އިޒުރޭލުން އުޅުމަކީ އަހަރެމެން ގަބޫލުކުރާ ކަމެއް ނޫން،" ބެން އެންޑް ޖެރީސްގެ ބަޔާނުގައި ބުންޏެވެ. "އެހެންވެ އުސޫލު އަހަރެމެން ގަބޫނުކުރާތީ، އިޒްރޭލާ އެކު ހަދާފައި އޮތް އެއްބަސްވުން ބަދަލުކުރަން ވިސްނާތާ ވެސް އެތައް ދުވަހެއްވެއްޖެ. އެހެންވެ މި އަހަރުގެ ފަހުކޮޅު އެއްބަސްވުމުގެ މުއްދަތު ހަމަވުމުން އެ އާނުކުރަން ވާނީ ނިންމާފައި."
މި ނިންމުމަށް އިޒްރޭލުގެ ބޮޑުވަޒީރު ނަފުތާލީ ބެނެޓާއި ސަރުކާރުގެ ބައެއް މިނިސްޓަރުން ފާޑު ވިދާޅުވެފައިވެ އެވެ.
"އެއީ ހަމަ އާއި އުސޫލުތަކުން ބަލާއިރު ވެސް ގޯސް ނިންމުމެއް. އަދި ނިންމުމަކީ ގޯހެއްކަން މާލީ ގޮތުން ވެސް ހާމަވެގެން ދާނެ،" ބޮޑުވަޒީރު ވިދާޅުވި އެވެ.
ބެން އެންޑް ޖެރީސްގެ ވިޔަފާރި އިޒްރޭލުގައި ހުއްޓައިލަން ނިންމި އިރު، އެތަނުގައި އެ ކުންފުނީގެ ދެ "ސްކޫޕް ޝޮޕް" ހިންގަ އެވެ.
ބެން އެންޑް ޖެރީސް އަކީ 1978 ގައި އެމެެރިކާގައި އުފެދުނު ކުންފުންޏެކެވެ.
