ބްރިޓްނީ 13 އަހަރަށް ފަހު ބައްޕަގެ ބާރުގެ ދަށުން "މިނިވަންވެއްޖެ"

އެމެރިކާގެ މަޝްހޫރު ލަވަކިޔުންތެރިޔާ ބްރިޓްނީ ސްޕެއާސްގެ ނަފްސާނީ މައްސަލަތަކާ ހެދި އޭނާގެ ހުރިހާ ކަމެއް ބެލެއްހެޓުމުގެ ގާނޫނީ ބާރުވެރިކަން ނުވަތަ "ކޮންޒަވޭޓަޝިޕް" ބްރިޓްނީގެ ބައްޕައާ ހަވާލުކޮށްފައި އޮންނަތާ 13 އަހަރު ފަހުން އެކަން ނިމުމަކަށް ގެނެސް ބްރިޓްނީ "މިނިވަން" ވެއްޖެ އެވެ.

ކޮންޒަވޭޓަޝިޕަކީ ދިމާވާ ކަމަކާ ހެދި މީހެއްގެ ކަންކަން އަމިއްލަ ނުބެލެހެއްޓޭ ހާލަތެއް މެދުވެރިވުމުން ނުވަތަ ނުކުޅެދުންތެރިކަމެއްގެ ސަބަބުން އެ މީހެއްގެ ކަންކަން ބެލެހެއްޓުމުގެ ބާރު އެހެން މީހަކާ ކޯޓުން ހަވާލުކުރުމެވެ.

"ކޮންޒަވޭޓަޝިޕް" ގެ މައްސަލާގައި ދެ ބަފައިން ކޯޓުގައި އަރާރުންވެ މައްސަލަ ވަރަށް ބޮޑަށް ގޯސްވެފައި ވަނިކޮށް ބައްޕަ ޖެމީ ސްޕިއާސް ކޮންޒަވޭޓަޝިޕް ދޫކޮށްލަން ނިންމިކަން ހާމަކުރީ ބުރާސްފަތި ދުވަހު އެމެރިކާގެ ލޮސް އެންޖެލިސްގެ ސުޕީރިއާ ކޯޓްގައި ބޭއްވި އަޑުއެހުމުގަ އެވެ.

މިދިޔަ މަހު ބްރިޓްނީ ބުނެފައިވާ ގޮތުގައި ބައްޕަގެ "ކޮންޓްރޯލް ދަށުގައި ހުރެގެން" ދެން ދުވަހަކު ވެސް އޭނާ ޕަފޯމްކުރާކަށް ސްޓޭޖަކަށް ވެސް ނާރާނެ އެވެ. ބްރިޓްނީ ބުނީ އޭނާގެ އަމިއްލަ މަސައްކަތުން ހޯދާ ފައިސާ އާއި މުޅި މިލްކިއްޔާތު އޮތީ ބައްޕަގެ މުށުތެރޭގައި ކަމަސެވެ. އެކަމަކު އޭނާ އަކީ އަމިއްލަ އަށް ހުރިހާ ކަމެއް ބެލެހެއްޓޭ ހާލަތުގައި ހުރި މީހެއް ކަމަށާއި ބައްޕަގެ ކޮންޓްރޯލްގައި އުޅެން ބޭނުން ނުވާ ކަމަށް ބުނެފައިވެ އެވެ.

މި މައްސަލާގައި ބްރިޓްނީގެ މަންމަ ލީން ސްޕެއާސް ވެސް ހުރީ ދަރިފުޅުގެ ދިފާއުގަ އެވެ. އޭނާ ވެސް ދާދި ފަހުން ބުނީ އެހެން މީހަކު ބްރިޓްނީ ކޮންޓްރޯލްކުރަން ޖެހޭ ސަބަބެއް މިހާރު ނެތް ކަމަށެވެ. އެހެންވެ ޖެމީ އަށް ދަރިފުޅުގެ "ކޮންޒަވޭޓަޝިޕް" އޮތުމަކީ ގަބޫލުކުރާ ކަމެއް ނޫން ކަމަށް ބުންޏެވެ.

ކެރިއަރުގެ ތަންކޮޅެއް ކުރީގައި މަސްތުވާތަކެއްޗާއި އަހުލާގީ ގިނަ މައްސަލަތަކެއްގެ ތެރެއަށް ވެއްޓި ރިހެބްގައި ބްރިޓްނީ ދުވަސްތަކެއް ވަންދެން ފަރުވާ ވެސް ހޯދަން ޖެހުނެވެ. އޭނަގެ "ކޮންޒަވޭޓަޝިޕް" ގެ ހާޖާނުގަނޑު އުފެދުނީ އެ މައްސަލަތަކާ އެކީގައި 2008 ގަ އެވެ.

އޭގެ ފަހުން ބްރިޓްނީ ގެންދިޔައީ ބައްޕައާ ދެކޮޅަށް އެތައް ވާހަކައެއް ދައްކަމުންނެވެ.

ބްރިޓްނީ ހިމެނެނީ އެމެރިކާގައި އުފެދުނު އެންމެ ކާމިޔާބު އަންހެން ލަވަކިޔުންތެރިންގެ ތެރޭގަ އެވެ.

ދެ ދަރިން ތިބި 39 އަހަރުގެ ބްރިޓްނީ އަކީ މިހާރު އުޅެނީ އިރާނަށް ނިސްބަތްވާ ސާމް އަސްގަރީ، 27، ކިޔާ ޕާސަނަލް ޓްރެއިނަރަކާ ލޯބީގެ ގޮތުން ގުޅިގެންނެވެ.