ރާއްޖެ ސަސްޕެންޑްކޮށްފާނެ ކަމުގެ އިންޒާރު ފީފާއިން ދީފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ތިން ވަނަ ފަރާތެއް ނުފޫޒު ފޯރުވާނަމަ އެ މައްސަލަ ފީފާގެ ކަމާ ބެހޭ ކޮމިޓީތަކަށް ހުށަހަޅާނެ ކަމަށާއި އެހެންވެއްޖެ ނަމަ ރާއްޖެ ސަސްޕެންޑްކޮށްފާނެ ކަމުގެ އިންޒާރު ފީފާ އިން ދީފައިވާ ކަމަށް އެފްއޭއެމުން ބުނެފި އެވެ.

އެފްއޭއެމްގެ މިހާރުގެ ލީޑަޝިޕާ ކުޅިވަރާ ބެހޭ ވަޒީރު އަހުމަދު މަހުލޫފާ ދެމެދު މައްސަލަތަކެއް ޖެހިފައިވާއިރު، ކްލަބްތަކަށް ނުފޫޒުފޯރުވައިގެން އެފްއޭއެމްގެ ލީޑަޝިޕް ބަދަލުކުރަން މަހުލޫފު އިސްވެ މަސައްކަތްކުރައްވަމުން އަންނަ ކަމަށް އެފްއޭއެމުން ވަނީ ތުހުމަތުކޮށްފަ އެވެ. އަދި މަހުލޫފު ވަނީ ސަރުކާރުން އެފްއޭއެމްގެ ކަންތައްތައް ރަނގަޅު ކުރަން ކުރަމުން އަންނަ މަސައްކަތަށް އެއްބާރުލުން ނުދޭ ކްލަބްތަކަށް ސަރުކާރުގެ ފަރާތުން މާލީ އެހީތެރިކަން ނުލިބުމުގެ ފުރުސަތު އެބައޮތް ކަމަށް ވިދާޅުވެފަ އެވެ.

އެފްއޭއެމުން މިކަން އިއުލާންކުރީ އެ އެސޯސިއޭޝަނުގެ ލީޑާޝިޕް ބަދަލުކުރުމަށްޓަކައި އެކްސްޓްރާ އޯޑިނަރީ ކޮންގްރެސް އެއް ބާއްވަން ވިކްޓްރީ ސްޕޯޓްސް ކްލަބުން ހުށަހެޅި ހުށައެޅުމާ އެއްގޮތަށް ކޮންގްރެސް ބޭއްވެން ނެތްކަން އިއުލާންކޮށް ނެރުނު ބަޔާނުގަ އެވެ. އެފްއޭއެމުން ބުނީ އެ މައްސަލައިގައި ފީފާއާ މަޝްވަރާކޮށްފައިވާ ކަމަށާއި އެކްސްޓްރާ އޯޑިނަރީ ކޮންގްރެސް ނުބާއްވަން ނިންމީ އޯޑިނަރީ ކޮންގްރެސް ކުރިއަށް އޮތުމުން ކަމަށެވެ. އެ ކޮންގްރެސް ތާވަލުކޮށްފައިވަނީ އަންނަ މަހު 25 ވަނަ ދުވަހަށެވެ.

އެ ބަޔާނުގައި ބުނެފައިވަނީ އެފްއޭއެމްގެ ކަންތައްތައް މިނިވަން މުސްތަގިއްލުކަމާ އެކު ކުރިއަށް ދިއުމަށް ވެސް ފީފާ އިން އަންގާފައިވާ ކަމަށެވެ.

"މި އިދާރާގެ މަސްލަހަތު ހިމެނޭ ކަންކަމުގެ ތެރެއަށް އިތުރު ފަރާތްތަކުން ވަނުމާއި ވަކިން ހާއްސަކޮށް އެފްއޭއެމް މެމްބަރު ކްލަބްތަކާއި އެފްއޭއެމް އާއި ފުޓްބޯޅަ މަސްލަހަތު ހިމެނޭ ފަރާތްތަކާ އެކު ދިވެހިރާއްޖޭގެ ކުޅިވަރު ވަޒީރު މުއާމަލާތު ކުރައްވަމުން ގެންދަވާ ގޮތާ ރިއާޔަތްކޮށް އެކަން ނުހުއްޓުވައިނަމަ ދިވެހިރާއްޖޭގެ މައްސަލަ ފީފާގެ ކަމާ ބެހޭ ކޮމިޓީތަކަށް ހުށަހަޅާނެ ކަމަށާއި މިކަމުގެ ސަބަބުން ދިވެހިރާއްޖެ ސަސްޕެންޑް ކުރަން ޖެހިދާނެ ކަމުގެ ބިރުވެރި އިންޒާރު ފީފާއިން ދީފައިވާކަން ނުހަނު ކަންބޮޑުވުމާ އެކު ފާހަގަކުރަމެވެ." އެފްއޭއެމުން މިއަދު ނެރުނު ބަޔާނުގައިވެ އެވެ.

ކުޅިވަރާ ބެހޭ މިނިސްޓްރީއާ އެފްއޭއެމާ ދެމެދު އެއްވެސް މައްސަަލަ އެއް އޮތްކަން މިއަދާ ހަމައަށް ވެސް އެނގިފައިނުވާ ކަމަށާއި އެއްވެސް ކަމެއްގައި އެފްއޭއެމާއި ރަސްމީ ހައިސިއްޔަތަކުން ކުޅިވަރާ ބެހޭ މިނިސްޓްރީން މުއާމަލާތްކޮށްފައި ނުވާކަމަށް އެފްއޭއެމުން ބުނެ އެވެ.

"ވީމާ ފުޓްބޯޅައިގެ ގަވާއިދުތަކުގެ އިންތަކާއި މިންތަކުގެ ބޭރުން ކުރަމުންމިދާ އެންމެހާ ކަންކަން ކުރުން ހުއްޓާލުމަށް ނަސޭހަތްތެރިވަމެވެ. އަދި މި ކަންކަމުގެ ތެރެއަށް މި އިދާރާ (އެފްއޭއެމް)ގެ މެމްބަރު ކްލަބްތަކުން ބައިވެރިނުވުމަށް އިލްތިމާސްކުރަމެވެ." އެފްއޭއެމްގެ ބަޔާނުގައިވެ އެވެ.

ސަރުކާރުގެ ކުޅިވަރު ސިޔާސަތާއި ފުޓްބޯޅަ ތަރައްގީކޮށް އެހެން ހަރުފަތަކަށް ގެންދިއުމަށް ކުރެވޭ އެންމެހާ ކަންތައްތަކަށް އެފްއޭއެމްގެ އެއްބާރުލުން ފުރިހަމަ އަށް ލިބޭނެކަމަށް އެ ބަޔާނުގައިވަނީ ބުނެފަ އެވެ.

ކުޅިވަރާ ބެހޭ ވަޒީރު މަހުލޫފު މީގެ ކުރިން "މިހާރަ"ށް ދިން އިންޓަވިއުއެއްގައި ވިދާޅުވެފައިވަނީ އެފްއޭއެމްއާ މައްސަލަތައް ދިމާވީ އެ އިދާރާގެ ކަންތައްތައް ރަނގަޅު ކުރަން އުޅުމުން ކަމަށާއި އެ މިނިސްޓްރީ ކުރާ ކޮންމެ ކަމެއް ކުރާނީ އިމުގެ ތެރެއިން ކަމަށެވެ.

އެމްއެމްޕީއާރުސީގެ 1.3 ބިލިއަން ރުފިޔާގެ ހިޔާނާތުގެ ފައިސާ ވަން ސްކޯސް އޮފް ފްލެެއާ (އެސްއޯއެފް) ކުންފުންޏާ އެކު ކުރެއްވި ފައިސާގެ މުއާމަލާތާ ގުޅިގެން ކުޅިވަރާ ބެހޭ ވަޒީރު މަހުލޫފު ގޭގައި މަޑުކުރައްވަން ރައީސް އިބްރާހިމް މުހައްމަދު ސޯލިހް އިއްޔެ ވަނީ އަންގަވައިފަ އެވެ.