ގައުމީ ޓީމުގެ މިޑްފީލްޑަރު އައިސަމް މާޒިޔާ އަށް

މި ސީޒަނުގައި ޓީސީ ސްޕޯޓްސް ކްލަބުގައި މޮޅު ކުޅުމެއް ދައްކައި ގައުމީ ޓީމުން ވެސް ފުރުސަތު ހޯދި ހުނަރުވެރި ޒުވާން މިޑްފީލްޑަރު އިބްރާހިމް އައިސަމް މާޒިޔާ އަށް ސޮއިކޮށްފި އެވެ.

އައިސަމް، 22، މާޒިޔާ އަށް ބަދަލުވީ ތިން އަހަރާއި ބައިގެ އެއްބަސްވުމެއްގެ ދަށުންނެވެ. އޭނާ އަކީ މި ފަހަރުގެ ޓްރާންސްފާ މާކެޓްގައި މާޒިޔާ އަށް ސޮއިކުރި ދެ ވަނަ ކުޅުންތެރިޔާ އެވެ. އަފްގާނިސްތާން ގައުމީ ޓީމުގެ ޑިފެންޑަރު ޝާރިފް މުހައްމަދު ވެސް ވަނީ މާޒިޔާ އަށް ބަދަލުވެފަ އެވެ.

ޒުވާން އެހެން ކުޅުންތެރިންނާ ބަލައި އައިސަމްގެ ތަފާތަކީ ޕްރެޝަރާ ކެރިގެން ކުރިމަތިލައި ހަމަޖެހިގެން ކުޅުމެވެ. އޭނާ އަކީ ޓީމުގެ އެޓޭކާއި ޑިފެންސްގެ ބެލެންސް ހިފެހެއްޓުމުގައި ވެސް ތަފާތު ދައްކާ ކުޅުންތެރިޔެކެވެ. އޭނާ އަކީ މި ވަގުތު ލީގުގައި ފާހަގަކޮށްލެވޭ ކުޅުމެއް ދައްކަމުން އަންނަ ކުޅުންތެރިއެކެވެ. އެނގިފައިވާ ގޮތުގައި އައިސަމް މާޒިޔާ އަށް ސޮއިކުރީ އެހެން ޓީމުތަކުން ވެސް އޭނާ ހޯދުމުގެ ޝައުގުވެރިކަން ފާޅުކޮށްފައިވަނިކޮށެވެ.

ކްލަބް އީގަލްސް އިން ކުރިން ފެނުނު އައިސަމް އަށް އޭރު އެ ޓީމުގެ ކޯޗު އިހުސާން އަބްދުލް ގަނީ (ސާންތީ) ވެސް ވަނީ ވަރަށް ބޮޑަށް ތައުރީފްކޮށްފަ އެވެ. މީގެ ހަތަރު ވަރަކަށް އަހަރު ކުރިން ސާންތީ ވަނީ އޭރު އުމުރުން 18 އަހަރުގައި ވެސް އައިސަމް އަށް އީގަލްސްގެ ފުރަތަމަ އެގާރައިން ފުރުސަތު ދީފަ އެވެ. އީގަލްސް އިން 2016 ވަނަ އަހަރުގެ ޕްރެޒިޑެންޓްސް ކަޕްގެ ޗެމްޕިއަންކަން ހޯދި ޓީމުގައި ވެސް ހިމެނުނު އައިސަމް ވަނީ އެ ޓީމާ އެކު ޔޫތު މުބާރާތް ވެސް ކާމިޔާބު ކޮށްފަ އެވެ.

އީގަލްސް އަށް 2017 ވަނަ އަހަރުގެ ކުރީކޮޅު ކުޅުމަށް ފަހު އައިސަމް އަލުން ފުރަތަަމަ ޑިވިޝަނުން ފެނުނީ މި ސީޒަނުގައި ޓީސީންނެވެ. އެ ޓީމުގެ ކުރީގެ ކޯޗު މުހައްމަދު އާތިފް (އާތީ)ގެ އިރުޝާދާ އެކު ތަފާތު މޮޅު ކުޅުމެއް ދައްކައި އައިސަމް ވަނީ ގައުމީ ފުޓްބޯޅަ ޓީމުގެ ފުރަތަމަ އެގާރައިން ފުރުސަތު ހޯދައިފަ އެވެ.

އައިސަމް އެންމެ ފުރަތަމަ ގައުމީ ޓީމުގެ ފުރަތަމަ އެގާރައިގައި ކުޅުނީ ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގައި ރަށުން ބޭރުގައި ގުއާމް އަތުން 1-0 އިން މޮޅުވި މެޗުގަ އެވެ. އޭގެ ފަހުން ގައުމީ ޓީމު ކުޅުނު ހުރިހާ މެޗެއްގައި އޭނާ ވަނީ ކުޅެފަ އެވެ. ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން މެޗުތަކުގެ އިތުރުން މިދިޔަ މަހު ނޭޕާލުގައި ބޭއްވި ސައުތު އޭޝިއަން ގޭމްސްގައި ވާދަކުރި ޒުވާން ގައުމީ ޓީމުގައި ވެސް އައިސަމް ހިމެނުނެވެ.

މާޒިޔާ މި ވަގުތު ދިރާގު ދިވެހި ޕްރިމިއާ ލީގުގެ އެއް ވަނައިގައި އޮތީ 11 ޕޮއިންޓުގެ ލީޑަކާ އެކު އެވެ. އެ ޓީމުން ވަނީ މިހާތަނަށް ކުޅުނު 16 މެޗުން 41 ޕޮއިންޓް ހޯދައިފަ އެވެ.

މާޒިޔާ އިން ޓީމު ވަރުގަދަކުރާ އެއް ސަބަބަކީ އޭއެފްސީ ކަޕަށް ތައްޔާރުވުމަށެވެ. މާޒިޔާ އޭއެފްސީ ކަޕްގެ ޕްރިލިމިނަރީ ދެ ވަނަ ބުރުގައި ކުޅޭނީ ބަންގްލަދޭޝް ޕްރިމިއާ ލީގުގެ ރަނަރަޕް އަބަހާނީ ލިމިޓެޑް ޑާކާއާ އެވެ. އަންނަ މަހު 5 ވަނަ ދުވަހު ޑާކާގައި އަދި 12 ވަނަ ދުވަހު މާލޭގައި ކުޅޭ ދެ ލެގުން ކުރި ލިބިއްޖެ ނަމަ މާޒިޔާ އަށް ޕްލޭއޮފުން ފުރުސަތު ލިބޭނެ އެވެ. ޕްލޭއޮފުގައި މާޒިޔާ ވާދަކުރަން ޖެހުމުގެ ފުރުސަތު ބޮޑީ އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީއާ އެވެ.