މިހާރުގެ ހޯދުން: ޖަމާވީ، ހުސްވާން ހިނދުކޮޅެއް!

ރާއްޖޭގެ ފުޓްބޯޅަ ފަގީރުވެ ނިކަމެތިވަމުން ގޮސް އެންމެން ފޫހިވެ ދަނޑުތަކަށް ވަންނާނެ މީހަކު ވެސް ނެތެވެ. ދިވެހިން އެ ކުޅިވަރަކަށް އެންމެ ފޯރި ދިން ފުޓުބޯޅަ ހަލާކުވެ ފުޓްބޯލް އެސޯސިއޭޝަން (އެފްއޭއެމް) އާއި އެތަނުގެ ވެރިންނަށް އެކި ތުހުމަތުތައް އަމާޒުވާން ފެށީ އެވެ. ރާއްޖޭގައި ކުޅިވަރެއް ހިންގަން ހުރި ހަމައެކަނި އޮފީސް ވެސް ވީރާނާ ވަމުން ދާއިރު މުވައްޒަފުންނަށް މުސާރަ ނުދޭތާ އަހަރަކާ ގާތް ވަނީ އެވެ.

ދިވެހިން މަރުދިން ކުޅިވަރު ހަލާކުކޮށްލުމުގެ ތުހުމަތާ އެކު އެކި ވާހަކަ ދައްކަނިކޮށް ޕްރޮސިކިއުޓާ ޖެނެރަލްގެ އަމުރަކަށް ފުލުހުން އެފްއޭއެމްއާ ގުޅޭ ތަހުގީގެއް ފަށައި އެ އިދާރާ އަށް ވަދެ ބަލައި ފާސްކޮށްފި އެވެ.

ޕީޖީ އޮފީހުން ބުނީ މައްސަލަ ތަހުގީގުކުރަން އަމުރުކުރީ އެކި ފަރާތްތަކުން އެފްއޭއެމަށް ދޭ ފައިސާ އަށް އެ އެސޯސިއޭޝަންގެ އިސްވެރިން ޚިޔާނާތްތެރިވެ، ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލައިގައި ކަމަށެވެ. އެހެންވެ އެކަމުގެ ތެރެއިން އެއްވެސް ހިސާބެއްގައި މަނީ ލޯންޑަރިން އާއި ވައްކަމާއި ހިޔާނާތާއި މަކަރާ ހީލަތުގެ ނުވަތަ އެ ނޫން ވެސް ޖިނާއީ ކުށެއްގެ މައްސަލައެއް ހިނގަމުންދާ ނަމަ އެ ކަމެއް ތަހުގީގުކޮށް، އެ މައްސަލައިގައި ދައުވާއެއް ކުރެވެން އޮތް ބައެއްގެ މައްޗަށް ދައުވާކުރަން ފޮނުވުމަށް އަމުރުކުރީ ކަމަށް ޕީޖީ އޮފީހުން ބުންޏެވެ.

ފީފާ އާއި އޭފްސީ އިން ކޮންމެ އަހަރަކު އެތައް ލައްކަ ޑޮލަރެއް އެފްއޭއެމަށް ފޮނުވާ ކަމަށް އެ ފަރާތްތަކުގެ ވެބްސައިޓާއި، އާންމު ކޮށްފައި ހުރި މައުލޫމާތުތަކުން އެނގެ އެވެ. މިދިޔަ އަހަރަށް އެކަނި ބެލިޔަސް ފީފާ އިން ބުނެފައިވާ ގޮތުގައި، ދެ މިލިއަނާ ގާތްކުރާ އަދަދަކަށް ވަނީ ޑޮލަރު ދީފަ އެވެ. އޭގެ އިތުރުން އޭއެފްސީ އާއި ލޯކަލް ސްޕޮންސަރުންނާއި އެ އެސޯސިއޭޝަނުން ހިންގާ އެހެނިހެން ހަރަކާތްތަކުން މިދިޔަ އަހަރު ވެސް 91 މިލިއަން ދިވެހި ރުފިޔާއާ ގާތްކުރާ އަދަދަށް ފައިސާ ލިބޭނެ ކަމަށް އެފްއޭއެމުން އަންދާޒާކުރި އެވެ.

މި ހުރިހާ ފައިސާއެއް ލިބުނަސް އެ އެސޯސިއޭޝަންގެ ވެރިން އަބަދުވެސް ބުނަމުން އަންނަނީ ފުޓްބޯޅަ އަށް ކުރިމަތިވި އެންމެ ބޮޑު ގޮންޖެހުމަކީ ކޮވިޑްގެ ބަލިމަޑުކަމާ އެކު މާލީ އަޑިގަނޑަކަށް ވެއްޓުން ކަމަށެވެ. އެކަށީގެންވާ ވަރަށް ސްޕޮންސާ ނުލިބުމާއި ސަރުކާރުން އެއްބާރުލުން ނުދޭ ވާހަކަ ދައްކަ އެވެ. ލިބޭ ފައިސާ އިން ދެކޮޅު ނުޖެހޭ ވާހަކަތަކެއް ވެސް ދައްކަ އެވެ. [އެކަމަކު، ކޮވިޑްގެ ތެރޭގައި ފުޓުބޯޅަ އަށް ފީފާ އިން ހާއްސަ ބަޖެޓެއް ކަނޑައަޅައި، މެމްބަރު ގައުމުތަކަށް ފައިސާ ވެސް ދިނެވެ.]

އަނެއްކޮޅުން އެފްއޭއެމްގެ އިސް ބައެއް ބޭފުޅުންގެ މުއްސަނދި ދިރިއުޅުމާ ފުޓްބޯޅަ އިދާރާގެ ހާލަތާ އަޅައިކިޔައި ތުންތުން މަތިން ތުހުމަތުތަކެއް ވެސް އޮތެވެ. ކުއްލިއަކަށް ފުލުހުން ފެށި ތަހުގީގުން މި ތުހުމަތަށް ބާރު ލިބި ޝައްކުތައް ބޮޑުވި އެވެ. އެއީ އެފްއޭއެމްގެ އެކައުންޓުން ތަނުގެ ވެރިންގެ އެކައުންޓަށް ފައިސާ ފޮނުވައި އެޔަށް ހިޔާނާތްތެރިވާ ކަމަށް ފުލުހުން ތުހުމަތުކުރުމާ އެކުގަ އެވެ.

އެކަމަކު "މިހާރު"ގެ "މެދުސަފުހާ" އަށް އެފްއޭއެމްގެ ރައީސް ބައްސާމް އަދީލް ޖަލީލް ދެއްވި އިންޓަވިއުގައި ކަނޑައެޅިގެން މި ތުހުމަތު ދޮގުކުރެއްވި އެވެ. އޭނާ ވިދާޅުވި ގޮތުގައި އެއްވެސް ފައިސާއެއް އޭނާގެ އެކައުންޓަށް ނުވަތަ އެފްއޭއެމްގެ އިސް ފަރާތެއްގެ އެކައުންޓަށް ވެސް ވަދެފައެއް ނުހުންނާނެ އެވެ.

އެއްވެސް ފަންޑަކަށް ހިޔާނާތްތެރި ނުވާ ކަމަށް އޭނާ ތަކުރާރުކޮށް ވިދާޅުވި އެވެ. އޭނާ ވިދާޅުވީ ތަނުގެ ހާލަތު އޮތް ގޮތުން، އޭނާގެ 50,000ރ. ގެ އެލަވަންސް ވެސް ނުނަގާތާ ދެ އަހަރު ވެއްޖެ ކަމަށެވެ.

އެކަމަކު، ފުލުހުން ކުރި ތުހުމަތާއި ބައްސާމްގެ އިންކާރުކުރެއްވުމާ އެކު "މެދުސަފުހާ" އިން ހޯދި ހޯދުންތަކުން ފެނުނީ ޝައްކު އުފެދޭ އެތައް މިލިއަން ރުފިޔާގެ މުއާމަލާތެވެ.

ކުޅިވަރުގެ އެންމެ ނުފޫޒު ގަދަ މީހާ!

ހޯދުންތަކުން އެނގުނު ގޮތުގައި ބައްސާމް އިންކާރުކުރެއްވި ނަމަވެސް އެފްއޭއެމަށް ލިބުނު ފައިސާ ބައްސާމްގެ އިތުރުން ބައެއް ކުންފުނިތަކަށް ފޮނުވާފައި އެބަހުއްޓެވެ.

އެފްއޭއެމް އަށް އެންމެ ގިނަ ފައިސާ ވަންނަނީ ފީފާ އާއި އޭއެފްސީގެ ފަރާތުންނެވެ. މި ތުހުމަތާ ގުޅޭ ގޮތުން ބައްސާމް ވިދާޅުވީ ޑޮލަރުން ޖަމާވާ އެ ފައިސާ، އެސޯސިއޭޝަންގެ ހާއްސަ ކޮމިޓީއަކުން ކަނޑައަޅާ ކުންފުނިތައް މެދުވެރިކޮށް ޑޮލަރު މާރުކުރާ ކަމަށެވެ. އާންމުކޮށް ލައްކަ ލައްކައިން ލިބޭ ޑޮލަރުތައް "މާރު ކުރުމަށް" އެފްއޭއެމް އިން ހަވާލު ކުރަނީ ބައްސާމް ވެސް ވިދާޅުވި ގޮތުގައި ރާއްޖޭގައި ފުޅާ ދާއިރާއެއްގައި ރީޓެއިލް ވިޔަފާރިކުރާ ސިބްކޯ އާއި ވީބީ އާއި އެހެން ބައެއް ކުންފުނިތަކަށެވެ. މި ދެ ކުންފުންޏަކީ އެފްއޭއެމްގެ ކުރީގެ އިންޓްރިމް ރައީސް އަދި އޮލިމްޕިކް ކޮމިޓީ (އެމްއޯސީ) ގެ ކުރީގެ ރައީސް މުހައްމަދު ޝަވީދުގެ މަސްލަހަތު ހިމެނޭ ވިޔަފާރިއެކެވެ. އަދި ސީދާ ޝަވީދުގެ ހިއްސާ ވެސް ސިބްކޯ ފުޑްސް އާއި ސިބްކޯ ހޮސްޕިޓަލިޓީގެ އޮވެ އެވެ. އަދި އޭނާއަކީ ވީބީ ބްރަދާޒްގެ މެނޭޖިން ޑިރެކްޓަރެކެވެ.

ބައްސާމް ވިދާޅުވި ގޮތުގައި ޑޮލަރު މާރުކުރުމަށް މި ކުންފުނިތައް ކަނޑައަޅާފައި ވަނީ ޑޮލަރު މާރުކުރުމަކީ ވަގުތުން ވަގުތަށް ފައިސާ ލިބެންޖެހޭ ކަމަކަށް ވާތީ، އިތުބާރު ކުރެވޭ ބަޔަކު މެދުވެރިކޮށް އެކަން ކުރުމަށެވެ. ނަމަވެސް އެފްއޭއެމުން ސިބްކޯ އަށް ފޮނުވާފައިވާ ޑޮލަރަށްވާ ވަރަށް ދިވެހި ރުފިޔާ އެފްއޭއެމްގެ އެކައުންޓަށް ވަދެފައި ހުރި ކަމަކަށް ބޭންކުގެ މުއާމަލާތްތަކުން ނުދައްކާކަން "މިހާރު" އަށް ވަނީ ކަށަވަރުވެފަ އެވެ.

ޝަވީދާ ބެހޭ ގޮތުން މީގެ ކުރިން ބައްސާމް ވިދާޅުވެފައިވާ ގޮތުގައި އޭނާއަކީ ކުޅިވަރުގެ އެންމެ ނުފޫޒު ގަދަ މީހާއެވެ.

އޭނާއަކީ އެފްއޭއެމްގެ "ނުފެންނަ ރައީސް" ކަމަށް ވެސް އެތައް ބަޔަކު ބުނެ އެވެ. ސަބަބަކީ އެފްއޭއެމްގެ ރައީސްގެ މަގާމަށް ޝަވީދުގެ "އެހީތެރިކަމާ" އެކު ނޫނީ އެއްވެސް މީހަކަށް ނާދެވިދާނެތީ ކަމަށް ވެސް އެކި ފަރާތްތަކުން ތުހުމަތު ކުރެ އެވެ.

އެފްއޭއެމްގައި އެހާ ނުފޫޒު ގަދަ އަދި މަސްލަހަތު އޮތް މީހެއްގެ ކުންފުންޏަށް ކޮންމެ ފަހަރަކު އެތައް ލައްކަ ޑޮލަރު މާރު ކުރަން ދިނުމަކީ ވެސް އޭގައި ނާޖާއިޒް ކަމެއް އުޅެދާނެ ކަމަށް ޝައްކުކުރަން ޖާގަ އޮތް ކަމެކެވެ. އަދި މީގެ ހަގީގަތް ބަލާއިރު ޑޮލަރު މާރު ކުރުމަށް ވުރެ ދުރަށް ގޮސްފައިވާ ކަމަށް ބެލެވޭ އެތައް ކަމެއް އެބަހުއްޓެވެ.

ވަކި އެކައުންޓްތަކެއްގައި އެނބުރޭ ފައިސާތަކެއް

ފުލުހުން ކުރަމުން އަންނަ ތަހުގީގުތަކުންނާއި "މިހާރު" އަށް ލިބިފައިވާ ބައެއް މައުލޫމާތުތަކުން ކަށަވަރުވެފައިވާ ގޮތުގައި ޑޮލަރު މާރު ކުރަން ފައިސާ ހަވާލުކުރި ނަމަވެސް އަނބުރާ އެފްއޭއެމްގެ އެކައުންޓަށް ވަންނަނީ އޭގެ އެއްބަޔެވެ.

ބައެއް މުއާމަލާތްތަކަށް ބަލާއިރު 2019 ވަނަ އަހަރުން ފެށިގެން 2020 އާ ދެމެދު ގާތްގަނޑަކަށް 350,000 ޑޮލަރާ ގާތްކުރާ އަދަދަކަށް އެފްއޭއެމުން ސިބްކޯ އަށް ފައިސާ ޖަމާކުރި އެވެ. އެއީ 15.42ރ. ގެ ރޭޓުން ބަލާއިރު 5.3 މިލިއަން ރުފިޔާ އެވެ. ނަމަވެސް އެފްއޭއެމަށް އަނބުރާ ވަދެފައި ހުރި ކަމަށް ދައްކަނީ އޭގެ ދެ ބައިކުޅަ އެއްބައި ފައިސާ އެވެ.

އެފްއޭއެމް އިން ސިބްކޯ އަށް ޑޮލަރު ފޮނުވުމާ އެކު ސިބްކޯ އިން ސަޕްލަޔަރުންނަށް ފައިސާ އަދާކޮށްފައި ހުރެ އެވެ. އެއީ، އޮމާން ފުޑްސްޓަފް ޓްރޭޑިން އެވެ. އެފްއޭއެމުން ސިބްކޯ އަށް ފޮނުވާ ފައިސާއާ މެދު ބޭންކުން ސުވާލު ކުރުމުން އެއީ ކޮންޓެއިނާ އަށް ފައިސާ ދެއްކުމަށް ހޯދި ޑޮލަރު ކަމަށް ކުންފުނިން ބޭންކުގައި ބުނެފައި ވެސް އެބަހުއްޓެވެ.

އެކަމަކު އެފްއޭއެމްގެ ފައިސާ އާ ގުޅޭ ވަރަށް ގިނަ މުއާމަލާތްތަކެއް ތަހުގީގު ކުރަމުން ދާތީ، ޝަވީދު އާއި ސިބްކޯ އަށާއި އެހެން ފަރާތްތަކަށް ގޮސްފައި ހުރި، އަދި އެތަންތަނުން އެފްއޭއެމް އާއި ބައްސާމްގެ އެކައުންޓަށް ވަދެފައި ހުރި ފައިސާގެ ހަގީގަތް އެނގޭނީ ތަހުގީގަށް ފަހު އެވެ.

އެފްއޭއެމުން ވެސް ބައްސާމްގެ އެކައުންޓަށް!

ބައެއް ލިޔެކިޔުންތަކުންނާއި ފުލުހުންގެ ތަހުގީގަށް ވެސް އެނގިފައިވާ ގޮތުގައި ފީފާ އިން އެފްއޭއެމަށް ފޮނުވާ ފައިސާ ސީދާ ބައްސާމްގެ އެކައުންޓަށް ވެސް ވަދެފައި އެބަހުއްޓެވެ. މިހެން 250,000 އަށް ވުރެ ގިނަ ޑޮލަރު ބައްސާމްގެ އެކައުންޓަށް ވަދެފައިވާ ހުރި ކަމަށް ތުހުމަތުކުރެވެ އެވެ. އެއީ ހަތަރު މިލިއަނެއްހާ ރުފިޔާ އެވެ.

މިއީ ސޯޝަލް މީޑިއާއިން ފެންނަ، ބައްސާމްގެ އަގުބޮޑު ދަތުރުތަކާއި މުއްސަނދި ދިރިއުޅުމާ މެދު ސުވާލު އުފައްދާ މީހުންގެ ޝައްކުތަކަށް ބާރު ލިބޭ ކަމެކެވެ.

ލިބިފައި ހުރި ބައެއް މައުލޫމާތަކުން އެނގޭ ގޮތުގައި އަމިއްލަ ދަތުރެއްގައި 2018 ވަނަ އަހަރު ބައްސާމް މިހާރުގެ އަނބިކަނބަލުންނާ އެކު ފްރާންސަށް ވަޑައިގަތް ދަތުރެއްގެ ވެސް ހުރިހާ ހަރަދަކަށް އެފްއޭއެމުން ޒިންމާވާނެ ކަމަށް ބުނެ، ލަންކާގައި ހުންނަ ފްރާންސްގެ އެމްބަސީ އަށް ސިޓީއެއް ފޮނުވާފައިވެ އެވެ.

"މިހާރު" އަށް އެނގިފައިވާ ގޮތުގައި އެފްއޭއެމުން ބައްސާމްގެ އެކައުންޓަށް ފައިސާ ވަނުމަށް ފަހު ބޭރު ގައުމުތަކަށް ވަޑައިގެން، ކުރައްވާފައިވާ އަމިއްލަ ހަރަދުތަކުގެ ވަރަށް ގިނަ ތަފްސީލް ވެސް ތަހުގީގަށް އެނގެން އެބަހުއްޓެވެ. އެފްއޭއެމުން ބައްސާމްގެ އެކައުންޓަށް ވަދެފައި ހުރީ ކޮން ފައިސާއެއްކަން އަދި ކަށަވަރެއް ނުވެ އެވެ.

އެފްއޭއެމްގެ އެކައުންޓުން ޗެކް ބޭނުންކޮށްގެން ޑޮލަރު ނަގާފައި ހުރި މުއާމަލާތްތަކެއް ވެސް ހުރުމުން ފުލުހުން އެކަން ވެސް ބަލަމުން އަންނަކަން ވަނީ އެނގިފަ އެވެ. މި ފައިސާ ނެގި މީހުންނާއި މިކަމާ ގުޅުން ހުރި ކަންކަން އަދި ތަހުގީގަށް ތިލަވެފައިވާ ވަރެއް ނޭނގެ އެވެ.

މިހާރު އާ ވާހަކަ ދެއްކި ބައެއް މީހުން ތުހުމަތުކުރާ ގޮތުން މި ފައިސާ ބައެއް ކްލަބުތަކާއި ނުފޫޒު ގަދަ އެހެނިހެން މީހުންނަށް ދެ އެވެ. އެ ފައިސާތައް ބޭނުން ކުރަނީ މަގާމުގައި ދެމި ހުރުމަށް އެކި ފަރާތްތަކަށް ނުފޫޒު ފޯރުވަން ކަމަށް ތުހުމަތުކުރެ އެވެ.

ތުހުމަތުތަކަށް ޝަވީދު އިންކާރު ކުރައްވާ!

މި ތުހުމަތުތަކާ ގުޅޭ ގޮތުން "މިހާރު"ގެ "މެދުސަފުހާ" އިން ޝަވީދާ ސުވާލުކުރުމުން އޭނާ ވިދާޅުވީ ސިބްކޯއަކީ ރާއްޖޭގައި އެންމެ ގިނައިން ކިރު އެތެރެކުރާ އެއް ކުންފުނި ކަމަށާއި އެހެންވެ ގިނަ އަދަދެއްގެ ޑޮލަރު އެކި ފަރާތްތަކުން ގަންނަ ކަމަށެވެ. އެފްއޭއެމުން ގަންނަ ޑޮލަރު އޭގެ އެންމެ ޕަސެންޓަކަށް ވެސް ނުވާނެ ކަމަށް ޝަވީދު ވިދާޅުވި އެވެ.

"މަހެއްގެ މައްޗަށް މިލިއަނެއްހާ ޑޮލަރު ގަންނަ ކުންފުންޏެއް އަޅުގަނޑުމެންނަކީ،" އިމްޕޯޓް ވިޔަފާރި އާއި ރީޓެއިލް ވިޔަފާރި ވެސް ކުރައްވާ ޝަވީދު ވިދާޅުވި އެވެ.

އޭނާ ވިދާޅުވި ގޮތުގައި އެފްއޭއެމުން އަދި އެ ނޫން ވެސް ކުންފުނިތަކުން ސިބްކޯ އިން ހޯދާ ޑޮލަރު އަނބުރާ ދޭން ޖެހޭނެ އެވެ. އެއްވެސް ފައިސާއެއް އެފްއޭއެމަށް ނުދީ ހުންނާނެ ކަމަށް ގަބޫލު ނުކުރެވޭ ކަމަށް އޭނާ ވިދާޅުވި އެވެ.

އެފްއޭއެމް އިން ސިބްކޯ އަށް ދޫކުރާ ޑޮލަރު ޝަވީދުގެ އެކައުންޓަށް ވަދެފައި ހުންނާނެތޯ ސުވާލު ކުރުމުން އޭނާ އެކަން ދޮގުކުރެއްވި އެވެ. އަދި ސީދާ އެފްއޭއެމުން ޝަވީދުގެ އެކައުންޓަށް ފައިސާ ޖަމާކޮށްފައި ހުންނާނެތޯ ސުވާލު ކުރުމުން އޭނާ އެކަން ވެސް ތަކުރާރުކޮށް ދޮގުކުރެއްވި އެވެ.

"އަޅުގަނޑަކަށް ހަމަ އެއްގޮތަކަށް ވެސް ގަބޫލެއް ނުކުރެވޭ ހުންނާނެ ހެނެއް. އަޅުގަނޑު ދުވަހަކު ވެސް ޑޮލަރެއް ނުގަންނަން. [އެހެންވީމަ] އަޅުގަނޑުގެ އެކައުންޓަށް އެފްއޭއެމުން ވަދެގެން ނުވާނެތާ ޑޮލަރު ނުގަންނަ ތަނަކުންނެއް." ޝަވީދު ވިދާޅުވި އެވެ.

އޭނާ އަދި ވިދާޅުވީ އެފްއޭމްގެ އެއްވެސް މުއާމަލާތަކާ ގުޅިގެން ރަސްމީ އެއްވެސް އިދާރާއަކުން މިހާތަނަށް އެއްވެސް ސުވާލެއް ކޮށްފައި ނުވާ ކަމަށެވެ. އަދި، އޭނާ ވެސް ޑޮލަރުގެ މުއާމަލާތް ކޮށްފައި ވާނީ، އެފްއޭއެމުން އެހެން ކުންފުނިތަކާ ވެސް އެ މުއާމަލާތްކޮށްފައިވާ ގޮތަށް ކަމަށް އޭނާ ވިދާޅުވި އެވެ. އަދި ވިދާޅުވީ އޭނާގެ ނަން ވަކިން "މިތަނަށް އައިސްގެން އުޅެނީ" ސިޔާސީ ގޮތުން ނުވަތަ އޭނާ އަކީ ކުރިން އެފްއޭއެމް ހިންގުމުގައި އުޅުއްވި ބޭފުޅަކަށް ވެދާނެތީ ކަމަށް ވެސް ވިދާޅުވި އެވެ.

ޕީޖީ ވިދާޅުވީ މި ބަލަނީ އެފްއޭއެމްގެ މައްސަލައެއް ނޫން ކަމަށް

އެފްއޭއެމަށް ލިބޭ ފައިސާ އަށް ހިޔާނަތްތެރިވާ ކަމުގެ ތުހުމަތާ އެކު ތަހުގީގު ފެށުމަށް އަމުރު ކުރެއްވި ޕްރޮސިކިއުޓާ ޖެނެރަލް ހުސައިން ޝަމީމް "މިހާރު"ގެ "މެދުސަފުހާ" އަށް ވިދާޅުވި ގޮތުގައި ގާނޫނުއަސާސީ ބުނާ ގޮތުން ޖިނާއީ މައްސަލައެއް ހިނގަމުންދާކަން އެނގޭ ނަމަ އެކަން ތަހުގީގުކުރަން އެންގުމުގެ ބާރު ޕީޖީ އަށް ލިބިގެންވެ އެވެ.

އެއީ ދުނިޔޭގެ އެހެން ގައުމުތަކުގައި ވެސް އެހާ ގިނައިން ބޭނުން ކުރާ ބާރެއް ނޫން ކަމަށާއި ވަރަށް އާދަޔާ ހިލާފު ކަންކަން ދިމާވެގެން މެނުވީ އެ ބާރު ބޭނުން ނުކުރާ ކަމަށް ޝަމީމް ވިދާޅުވި އެވެ.

"މިއީ އަޅުގަނޑުގެ ދައުރުގައި ތަހުގީގު ކުރަން އެންގި ތިން ވަނަ މައްސަލަ." ޝަމީމް ވިދާޅުވި އެވެ.

ޝަމީމް ވިދާޅުވި ގޮތުގައި ޕީޖީ އޮފީހުން މި މައްސަލައިގެ ތަހުގީގުގައި އެފްއޭއެމްގެ ފަހަތަކުން ނުދާނެ އެވެ. ތަހުގީގު ކުރަމުން އަންނަނީ އެފްއޭއެމަށް ލިބޭ ފައިސާ ނަހަމަ ގޮތުގައި ބޭނުން ކުރުމުގެ ތުހުމަތުތައް ހިނގައި އަދި ތުހުމަތަށް ވުރެ ވެސް މައްޗަށް ބައެއް ހެކިތައް ފުލުހުން ގެނެސްދިން މައްސަލަ އެވެ.

"މިއީ ވަކިވަކި މީހުންގެ އެކައުންޓުތަކަށް ފައިސާ ވަދެފައި ހުރީ. އެ ފައިސާ ދައުރުވެގެން ހުރީ އެކިއެކި ގޮތް ގޮތަށް،" ޕީޖީ ވިދާޅުވި އެވެ.

ގާނޫނާ އެއްގޮތަށް ޑޮލަރު މާރުކުރުމަކީ އޭގެ ޒާތުގައި މައްސަލައެއް ނޫން ކަމަށް ޝަމީމް ވިދާޅުވި އެވެ. ނަމަވެސް އެ ފައިސާ އަށް ދެން ވާ ގޮތް ތަހުގީގުން ބަލާނެ ކަމަށް އޭނާ ވިދާޅުވި އެވެ. އެހެންވެ ޕީޖީ އޮފީހުން އަމުރުކޮށްފައި އޮންނާނީ ހިޔާނާތާއި ވައްކަމާއި މަކަރާއި ހީލަތް ހެދުމާއި މަނީ ލޯންޑަރިން ފަދަ ހުރިހާ ކުށެއް ތަހުގީގު ކުރުމަށް ކަމަށް ޝަމީމް ވިދާޅުވި އެވެ.

"ޑޮލަރު މާރު ކުރުންތޯ. ފައިސާ ބަދަލު ކުރުންތޯ އަނބުރާ ލިބުންތޯ މިކަންކަން އަޅުގަނޑުމެން ތަހުގީގުން ބަލާނަން." އޭނާ ވިދާޅުވި އެވެ.

ފުލުހުން ބުނަނީ ސާފު ހެކި ހުރި ކަމަށް!

އެފްއޭއެމް އަށް ވަންނަ ފައިސާ ތިން ފަރާތަކުން [ކޮން ބައެއް ކަމެއް ވިދާޅެއް ނުވޭ] އޮޑިޓު ކުރާ ކަމަށާއި ދުވަހަކު ވެސް ފައިސާގެ މައްސަލައެއް ދިމާ ނުވާ ކަމަށް ބައްސާމް ވިދާޅުވި ނަމަވެސް ފުލުހުންގެ އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒް "މިހާރު"ގެ "މެދުސަފުހާ" އަށް ވިދާޅުވި ގޮތުގައި އެފްއޭއެމް އަށް ބޭރުގެ ފަރާތްތަކުން ގްރާންޓުގެ ގޮތުގައި ދޫކުރާ ފައިސާ އިން އެތަނުގެ ބައެއް ވެރިން ހިޔާނާތްތެރިވެ ނަހަމަ ގޮތުގައި މާލީ މުއާމަލާތްތައް ހިންގާކަމަށް ތުހުމަތު ކުރެވެ އެވެ.

އެފްއޭއެމް އަށް ފުލުހުން ވަދެ ބަލާ ފާސްކުރަން ޖެހުނީ އެތަނުގައި ހުރި ލިޔެކިޔުންތަކާއި ޑިޖިޓަލް ވަސީލަތްތަކުގައި މި މައްސަލަތަކާ ގުޅޭ ހެކި ގަރީނާ ލިބެން ހުރި ކަމަށް ގަބޫލު ކުރެވޭ އެކަށީގެންވާ ސަބަބުތަކެއް ހުރުމުން ކަމަށް ވެސް އޭނާ ވިދާޅުވި އެވެ.

"އެފްއޭއެމްގެ ތަހުގީގުގައި މިހާތަނަށް ކުރެވުނު މަސައްކަތުން ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓުތަކަށް ޖަމާކޮށް ބޭނުންކޮށްފައިވާ ކަން އެނގޭ ސާފު ކިތާބީ އެހި އެފްއޭއެމްގެ ބޭންކް ސްޓޭޓްމަންޓުތަކުން ފެންނަން އެބަހުރި،" ރިޔާޒް ވިދާޅުވި އެވެ.

އެފްއޭއެމް އަށް ލިބޭ ފައިސާ ނަހަމަ ގޮތުގައި ބޭނުން ކުރި ގޮތް ސާފުކޮށް އެކައުންޓް ސްޓޭޓްމަންޓުތަކުން ފެންނަން ހުރުމުން އެކަމާ ގުޅޭ ތަހުގީގުގެ ބައިގައި ވަކިން ދައުވާ ކުރުމާ މެދު ޕީޖީ އާ މަޝްވަރާ ކުރަމުން އަންނަ ކަމަށް ރިޔާޒް ވިދާޅުވި އެވެ. އަދި ތަފްސީލީ ގޮތެއްގައި ބަލަން ޖެހޭތީ އެ އިދާރާގެ ހާއްސަ އޮޑިޓެއް ހެދުމަށް އޮޑިޓާ ޖެނަރަލް އޮފީހުގައި ވެސް ފުލުހުން ރަސްމީކޮށް އަންގާފައިވާ ކަމަށް އޭނާ ވިދާޅުވި އެވެ.

ރިޔާޒް ވިދާޅުވި ގޮތުގައި މި މައްސަލަ އާ ގުޅިގެން އެފްއޭއެމް އިން ރާވާ މުބާރާތްތައް ހިންގުމަށް އެއްވެސް ހުރަހެއް ނެތެވެ. އަދި ފުލުހުން ހިފެހެއްޓި ތަކެއްޗާ ގުޅިގެން ދަތިވާ ކަމަށް އެފްއޭއެމް އިން ބުނުމުން ދަތިވެދާނެ ފަދަ އެއްވެސް އެއްޗެއް ފުލުހުންގެ ބެލުމުގެ ދަށަށް ގެނެވުނުތޯ ބަލައި އެ އެސޯސިއޭޝަނުން އެދުނު ކޮމްޕިއުޓާ ހާޑްޑިސްކުގެ އިމޭޖް އެކްސްޓްރެކްޝަން ހެދުމަށް ފަހު ވަގުތުން ހަވާލު ކޮށްފައިވާ ކަމަށް ވެސް ރިޔާޒް ވިދާޅުވި އެވެ.

"މި ތަހުގީގަކީ މާލީ މުއާމަލާތްތަކުގެ ކިތާބީ ހެކިތަކުގެ މައްޗަށް ހިންގާ ތަހުގީގެއް. މިއީ ޒާތީ ކަމެއްގެ ގޮތުގައި ސިފަ ކުރަން ޖެހޭ އެއްވެސް ސަބަބެއް ނެތް،" ރިޔާޒް ވިދާޅުވި އެވެ.

މި މައްސަލަ އަށް ބަލާއިރު ހަމައެކަނި ހިމެނެނީ ބައްސާމާއި ޝަވީދެއް ނޫނެވެ. އެ ފަރާތްތަކާ ގާތް ގުޅުން ބާއްވާ އެތައް ބައެއްގެ އެކައުންޓުތަކަށް ފައިސާ ޖަމާވެފައި ހުރި ކަމަށް ތަހުގީގުތަކުން ދައްކަ އެވެ. ކުރި ދަތުރުތަކާއި ދިޔަ ޝޮޕިން މޯލްތަކާއި ގަތް އެއްޗެހި އެނގޭ ވަރަށް ތަހުގީގަށް ހޯދައިފި އެވެ.

ފުޓުބޯޅަ ކުރިއަރުވަން ރާއްޖެ އަށް ލިބޭ ފައިސާތައް މަދު ބަޔަ ބައެއްގެ އެކައުންޓްތަކަށް ވަދެ ދެން ވާގޮތް ނޭނގޭ ހިސާބަށް ދިޔައިރު ވެސް ފީފާ އިން ފިޔަވަޅު އަޅާފާނެ ކަމަށް އޮތް ބިރަކާ އެކު މި ހުރިހާ ދުވަހު ކުޅިބަލަން ތިބީ އެވެ. ތަހުގީގީ އިދާރާތަކުން މިފަހަރު މަސައްކަތް ފެށީ މި ހުރިހާ ދިމާލަކަށް ވިސްނައިގެން ބޭރުގެ ބައެއް އިދާރާތަކުގެ ލަފަޔާ ވެސް އެކުގަ އެވެ.