އަހަރުތަކަކަށް ފަހު ފުވައްމުލަކަށް ފުޅަނގި މޫސުން، ގިނަ ބަޔަކަށް ބޮޑު މަޖަލެއް!

އެއީ މީގެ މީގެ ވިއްސަކަށް އަހަރު ކުރި އެވެ. ހުޅަނގު މޫސުން ނިމޭ ދުވަސްވަރާ ދިމާކޮށް ރަށުގެ ހުޅަނގު ފަރާތު ގޮނޑުދޮށުގައި ފުޅަނގި ހޮވަން މީހުން ގޯންޏާއި ތެލި ފަދަ ތަކެތި ހިފައިގެން ނުކުމެ އުޅޭ ހަނދާންވެ އެވެ. އޭރު ފުޅަނގި ހޮވަން އަތިރިމައްޗަށް ނުކުންނަ ކޮންމެ މީހަކު މަދުވެގެން ވިއްސަކަށް ފުޅަނގި ނަގަ އެވެ. އޭރު ވެސް އެއީ ކުޑަކުދިންނާއި ބޮޑެތި މީހުން ވަރަށް ފޯރިއާ އެކު ކުރަމުން އައި ކަމެކެވެ.

ފުވައްމުލަކު ބަހުރުވައިން ކިޔާ "ހުޅަންމަހަ" އެންމެ ގިނައިން ރަށަށް އަރަނީ ހުޅަނގު މޫސުމުގައި ކަމަށްވެ އެވެ. މިފަހަރު ވެސް ފުޅަނގި އަރަން ފެށީ ހުޅަނގު މޫސުމް ނިމެން ގާތްވެފައި ވަނިކޮށް، މީގެ ހަތަރު ވަރަކަށް ދުވަސް ކުރިން ކަމަށް އެ ރަށުގެ ބައެއް މީހުން ބުންޏެވެ.

މި ފަހަރު ވެސް އެންމެ ގިނައިން ފުޅަނގި އަރަނީ ރަށުގެ ނެރެނގަޑު ފަންނާއި ގެން މިސްކިތް ފަންނާ ދެމެދަށް ކަމަށްވެ އެވެ. އެ ސަރަހައްދަށް ފުޅަނގި އަރަން ފެށުމާ އެކު، ކޮންމެ ދުވަހަކު ވެސް ރަށުގެ ގިނަ އަދަދެއްގެ ބަޔަކު އެ ތަނަށް ކުޑަކުދިން ވެސް ގޮވައިގެން ޖަމާވެ އެވެ.

ފުވައްމުލަކުން ވާހަކަ ދެއްކި މީހަކު ބުނީ މިއިން ދުވަހަކު ވެސް ރަށަށް ފުޅަނގި ނާރާ މިންވަރަށް މި ފަހަރު ފުޅަނގި އަރަމުން އަންނަ ކަމަށެވެ.

"މިދިޔަ 15 ވަރަކަށް އަހަރުގެ ތެރޭގައި ވެސް މި މިންވަރަށް ފުޅަނގި އަރާ ތަނެއް ނުފެނޭ. އާއްމު މީހަކު ހައެއްކަ އެތި ނަގާ. ބައެއް މީހުން 100 ވަރަކަށް ފުޅަނގި ވެސް ނަގާފައި އެބަހުރި،" އޭނާ ބުންޏެވެ.

މަސްވެރިކަމާ ބެހޭ ތަޖުރިބާކާރުން ވިދާޅުވާ ގޮތުގައި ފުޅަނގި އެންމެ ގިނައިން އަރާ ރަށްތަކުގެ ތެރޭގައި ފުވައްމުލައް ހިމެނެ އެވެ. އެ ރަށަށް އެހާ ގިނައިން ފުޅަނގި އަރާ މައިގަނޑު ސަބަބެއް ކަމަށް ވަނީ މާކަނޑު މެދުގައި އޮންނަ ރަށަކަށް ވުމުން ކަމަށް ވެސް އެ ބޭފުޅުން ވިދާޅުވެ އެވެ.

"ފުޅަނގި އަކީ ފަރުމަތީގައި ނުވަތަ ފަޅުތެރޭގައި އާއްމުކޮށް އުޅޭ ބާވަތުގެ މަހެއް ނޫން. އެއީ މާކަނޑުގައި އާއްމުކޮށް އުޅޭ މަހެއް. ފުވައްމުލައް ވަށައިގެން މާކަނޑު އޮތުމުން އެހާ ގިނައިން އެ ރަަށަށް ފުޅަނގި އަރަނީ. ރާއްޖޭގެ އެހެން ބައެއް ރަށްތަކަށް ވެސް މަދުމަދުން ފުޅަނގި އަރާ،" އޭނާ ވިދާޅުވި އެވެ.

ފުޅަނގި މި ފަހަރު މާ ގިނަ

ފުޅަނގި ގޮނޑުދޮށަށް އަރަނީ ކަންނެލިތައް ކާންވެގެން ފަހައިގަތުމުންނެވެ. ބައެއް ފަހަރު އުދުހިގެން މައްޗަށް އަރަނިކޮށް މާހޯރަތައް ކާލަ އެވެ. ގިނަ ފަހަރަށް ގޮނޑުދޮށަށް އަރަނީ ހޯރަތަކަށް އަތު ނުވާން ވެގެންނެވެ. ނަމަވެސް ގޮނޑުދޮށަށް އަރާ ތަނުން މީހުން ތިބެނީ ހިފަން ތައްޔާރަށެވެ. އެހެންވެ ފުޅަނގި އަށް ސަލާމަތްވާނެ ފުރުސަތެއް ނުލިބެ އެވެ.

ފުޅަނގި އަރާ ނަމަ ގިނަ އަދަދަކަށް ހޯރަ ރަށުގެ މަތީގައި އުދުހި އުޅެ އެވެ. އެއާ އެކު، ރަށުގައި ކަންނެލީގެ މަސްވެރިކަމާއި ހަނދީގެ މަސްވެރިކަން ވަރަށް ރަނގަޅު ކަމަށްވެ އެވެ.

"މި ފަހަރު މިއީ އާދަޔާ ހިލާފަށް ގިނައިން ފުޅަނގި އަރާ މޫސުމެއް. އެއާ އެކު، ކަންނެއްޔާއި ހަނދީގެ މަސްވެރިކަން ވަރަށް ރަނގަޅު. މިއަދު ވެސް ވަރަށް ގިނަ ބަޔަކު މަހަށް ނުކުމެ އެބަ އުޅޭ،" ފުވައްމުލަކު މަސްވެރިއަކު ބުންޏެވެ.

އޭނާ ބުނީ މަހަށް ނުކުމެ އުޅޭ އިރު ފުޅަނގި ވަރަށް ގިނައިން އުދުހޭ ތަން ފެންނަ ކަމަށެވެ. ނަމަވެސް ކަނޑުމަތިން އެ ފެންނަ މިންވަރަށް ގޮނޑުދޮށަށް ނާރާ ކަމަށް އެ މީހާ ބުންޏެވެ.

"ކަންނެލި ފުޅަނގި ފަހާ ވަރަކަށް އެއްގަމަށް އަރާނީ. އެހެން ނޫނީ އުދުހިލާފައި އަނެއްކާ ވެސް އަޑި އަށް ފީނައިގަންނާނެ. ހޯރަ ވެސް މި ފަހަރު ވަރަށް ބައިވަރު އެބަ ފެނޭ. މީގެ ކުރީ އަހަރުތަކުގައި ފެންނަ ވަރަށް ވުރެ އެތައް ގުނައެއް އިތުރު،" އެ ރަށުން ވާހަކަދެއްކި މީހާ ބުންޏެވެ.

ފުޅަނގި އަކީ ތޮޅި ފާޑަށް ހުންނަ، ގާތްގަނޑަކަށް ހަ އިންޗި ދިގު މަހެކެވެ. އާއްމުކޮށް އެ މަސް ނަގާ މީހުން ގަރުދިޔަ ކެއްކުމަށާއި މަސް ހިއްކައިގެން އަދި ތެލުލައިގެން ކާން ބޭނުންކުރެ އެވެ. ކުރީ ޒަމާނުގައި ފުޅަނގި އަރާ ދުވަސްވަރު، ރަށުގެ މަގުމަތީގައި ތޮށަލި މަތީގައި ނުވަތަ ޓިނުގަނޑެއްގެ މަތީގައި ގިނަ އަދަދަކަށް ފުޅަނގި އަވީލާފައި ހުއްޓާ ފެނެ އެވެ.

ފުޅަނގި ހޮވަން ގިނަ ބަޔަކު އަތިރި މައްޗަށް

ފުޅަނގި ހޮވަން ބައްޕައާ އެކު ކުޑައިރު ރަށުގެ އަތިރި މައްޗަށް ނުކުންނަ ހަނދާން އެބަހުއްޓެވެ. އޭރު ވެސް ގިނަ ކުޑަކުދިންނާ އެކު ގޮނޑުދޮށަށް ދަނީ މައިންބަފައިންނެވެ. ބައެއް ދުވަސް ދުވަހު ހެނދުނުން ފެށިގެން ހަވީރު ވަންދެން ވެސް އަތިރިމަތީގައި ފުޅަނގި ހޮވަން އުޅުނު ހަނދާންވެ އެވެ.

ޒަމާންތަކަކަށް ފަހު، ފުވައްމުލަކުގެ ބައެއް ސަރަހައްދުތަކަށް ފުޅަނގި އަރަން ފެށުމުން މިދިޔަ ދެ ހަފުތާއެއްހާ ދުވަހު ގިނަ އަދަދެެއްގެ ބަޔަކު، ކުޑަކުދިން ގޮވައިގެން ރަށުގެ ހުޅަނގު ފަރާތަށް ނުކުތެވެ. ބައެއް މީހުން އެ ތަނަށް ދަނީ ކުޑަކުދިންގެ ފޫހިފިލުވައިދިނުމަށެވެ.

"އަޅުގަނޑުމެން ކުޑައިރު ވެސް މިއީ ވަރަށް މަޖާކަމެއް. އެހެންވެ މި ފަހަރު އަޅުގަނޑު ވެސް އައީ ދަރިފުޅު ގޮވައިގެން މި މަންޒަރު ދައްކާލަން. ވަރަށް ގިނަ ބަޔަކު ކުޑަކުދިން ގޮވައިގެން ކޮންމެ ދުވަހަކު ނުކުމޭ. ވަރަށް އެކުވެރިކޮށް މަޖާކޮށް ކުރާ ކަމެއް މިއީ،" ފުޅަނގި ހޮވަން ނުކުމެ އުޅުނު މީހަކު ބުންޏެވެ.

އެ ރަށުގެ ބައެއް މީހުން ނަގާފައިވާ ފޮޓޯތަކާއި ވީޑިއޯތަކުން، އެތައް ސަތޭކަ ބަޔަކު ފުޅަނގި ހޮވަން ނުކުމެ އުޅޭ ތަން ފެނެ އެވެ. އަދި އެ ފޮޓޯތަކާއި ވީޑިއޯތަކުން ޝޯޝަލް މީޑިއާތަކުގެ ޓައިމްލައިންތައް ވަނީ ފުރާލައިފަ އެވެ.

ފުޅަނގި އެރުމަކީ ފުވައްމުލަކުން ފެންނަ އާދަޔާ ހިލާފު ކަންތައްތަކުގެ ތެރެއިން އެއް ކަމެވެ. ނަމަވެސް، މޫސުމަށް އައިސްފައިވާ ބަދަލާ ގުޅިގެން މިދިޔަ ދިހަ ވަރަކަށް އަހަރުގެ ތެރޭގައި ފުޅަނގި ރަށަށް ނާރާ ކަމަށްވެ އެވެ. އެކަމަކު މި ފަހަރު މިއޮތީ އަނެއްކާ ވެސް ކުޑައިރުގެ މަތިން ހަނދާންކޮށްލާނެ ފުރުސަތެއް ލިބިފަ އެވެ.

"އަހަރެން ބޭނުމެއް ނޫން މި ދުވަސްކޮޅު ނިއުސް ފީޑަށް އަންނަ ފުވައްމުލަކު މީހުން ބަލަން. ވަރަށް ދެރަވޭ ފުޅަނގި ހޮވަން ނުދެވޭތީ،" މާލޭގައި ދިރިއުޅޭ ފުވައްމުލަކު މީހަކު ފޭސްބުކްގައި ލިޔެފައިވެ އެވެ.

ފުޅަނގި އަކީ ފުވައްމުލަކަށް ހުޅަނގު މޫސުމުގެ އިތުރުން، އިރުވައި މޫސުމުގައި ވެސް ގިނަ އަދަދަކަށް އަރާ އެއްޗެކެވެ. އެހެން ކަމުން މިފަހަރު ދެ މޫސުމުގައި ވެސް ފުޅަނގި އެރުމަކީ އެކަށީގެންވާ ކަމެއް ކަމަށް އެ ރަށުގެ ބައެއް މީހުން ބުނެ އެވެ.