ހާއްސަ އެހީ އަށް ބޭނުންވާ މީހުންނަށް އިނާޔަތުގެ ގޮތުގައި ސަރުކާރުން ދޭ ފައިސާގެ އަދަދު ބޮޑުކޮށްދޭން އެދި ރައީސް އިބްރާހިމް މުހައްމަދު ސޯލިހަށް ޕެޓިޝަނެއް ހުށަހަޅަން ނިންމައިފި އެވެ.
ހާއްސަ އެހީ އަށް ބޭނުންވާ މީހުންނަށް ގާނޫނުގައިވާ ގޮތުން ކޮންމެ މަހަކު ދެމުން އަންނަނީ 2،000ރ. ގެ އިނާޔަތެކެވެ. ނަމަވެސް ޕެޓިޝަނުގައި އެދިފައި ވަނީ އެ އިނާޔަތް 5،000ރ. އަށް ބޮޑުކޮށް ދިނުމަށެވެ.
ރައީސަށް މި ޕެޓިޝަން ހުށަހަޅަނީ ހއ. އިހަވަންދޫގެ ހާއްސަ އެހީ އަށް ބޭނުންވާ ތިން ޒުވާނެއް ކަމަށްވާ މުހައްމަދު އިރުފާނާއި އަލީ ޖުއައިދު އަދި އަލީ ފަޔާޒްގެ ފަރާތުންނެވެ.
ރައީސް އިބްރާހިމް މުހައްމަދު ސޯލިހަށް އެ ޕެޓިޝަން ހުށަހަޅަން އެ މީހުން ނިންމާފައި ވަނީ ހާއްސަ އެހީ އަށް ބޭނުންވާ މީހުންގެ ދުވަސް ފާހަގަކުރުމަށް އަންނަ މަހުގެ 1 ގައި އިހަވަންދޫގައި ބާއްވާ ރަސްމިއްޔާތަށް އެ މަނިކުފާނު ވަޑައިގަތުމުންނެވެ.
މި ޕެޓިޝަނުގައި ބުނެފައި ވަނީ މިހާރު ދޭ 2،000ރ. ގެ އިނާޔަތަކީ މިހާރު ރާއްޖޭގެ ހިދުމަތްތަކާއި ތަކެތީގެ އަގު ހުރި ގޮތަށް ބަލާއިރު އެކަށީގެންވާ ވަރެއް ނޫން ކަމަށެވެ. އާންމު ދިރިއުޅުމުގެ މިންގަނޑުން ބަލާއިރު ވެސް، ކެއުންބުއިމާއި އެ ނޫން ވެސް ޒަރޫރީ ބޭނުންތައް މިހާރު ކަނޑައަޅާފައިވާ މާލީ އިނާޔަތުން ނުފުދޭ ކަމަށް ޕެޓިޝަނުގައި ވެ އެވެ.
ހާއްސަ އެހީ އަށް ބޭނުންވާ މީހުންގެ ތެރޭގައި ވެސް އާއިލީ ޒިންމާތަކާއި ގިނަ ހަރަދުތައް ކުރަން ޖެހޭ މީހުން އުޅޭ ކަމަށާއި އާއިލާއެއް ފަށަން ބޭނުންވާ މީހުން ވެސް ވަރަށް ގިނައިރު، ވަޒީފާގެ ފުރުސަތުތައް އެ މީހުންނަށް ކުޑަވުމުން ގޮންޖެހުންތައް ކުރިމަތިވެފައިވާ ޕެޓިޝަނުގައި ވެސް ބުންޏެވެ.
"ނުކުޅެދުންތެރިކަން ހުންނަ ފަރާތްތަކަކީ، ދިރިއުޅުމުގެ މުހުތާދުތައް ނުފުދި މުޖުތަމައުން އެކަހެރިވެ ނިކަމެތި ވެފައިވާ ފަރާތްތަކެކެވެ. އަދި މި ފަރާތްތަކަށް ގާނޫނުން ލިބިދޭން ޖެހޭ އެތަކެއް ހައްގުތަކާއި ހަމަހަމަ ފުރުސަތުތަކުން ވަނީ މަހްރޫމްވެފަ އެވެ،" 5،000 މީހުންގެ ސޮޔާ އެކު ހުށަހަޅަން ނިންމާފައި ޕެޓިޝަނުގައި ވެ އެވެ.
ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނަށް އިސްލާހު ގެނެސް ހާއްސަ އެހީ ބޭނުންވާ މީހުންނަށް 5،000ރ. އާއި 7،000ރ. އާ ދެމެދުގެ އިނާޔަތެއް ދިނުމަށް ރައްޔިތުންގެ މަޖިލިހަށް 2019 ވަނަ އަހަރު ބިލެއް ވެސް ހުށަހެޅި އެވެ. އެކަމަކު އެ ބިލަށް މަޖިލީހުގެ ތާއީދު ނުލިބިގެން ވަނީ ބޭރުކޮށްލައިފަ އެވެ.
