ކުށްވެރިންގެ ފައިގައި އިލެކްޓްރޯނިކް ޓެގް އަޅުވައި އެ މީހުން މޮނިޓާ ކުރުމުގެ މަސައްކަތް ހަވާލު ކުރުމުގައި ކޮރަޕްޝަން ހިންގި ކަމަށް ބުނެ ކުރީގެ ހޯމް މިނިސްޓަރު އުމަރު ނަސީރުގެ މައްޗަށް ދައުވާކޮށްދިނުމަށް އެންޓި ކޮރަޕްޝަން ކޮމިޝަން (އޭސީސީ)އިން ޕީޖީ އޮފީހުގައި އެދިއްޖެ އެވެ.
ބޮޑެތި ކުށްތަކުގެ ތުހުމަތުކުރެވޭ މީހުންގެ ފައިގައި ޓެގު އަޅުވަން ފެށީ ކުރީގެ ރައީސް އަބްދުﷲ ޔާމީންގެ ވެރިކަމުގައި، އުމަރު ހޯމް މިނިސްޓަރުކަމުގައި ހުންނެވި އިރު އެވެ. އެ މަސައްކަތް ހަވާލު ކުރީ ސްޓެލްވާޓް މޯލްޑިވްސް ކިޔާ ކުންފުންޏަކާ އެވެ.
ޓެގް މެދުވެރިކޮށް ކުށްވެރިން ބެލެހެއްޓުމުގެ މަސައްކަތް ހަވާލު ކުރީ އުމަރާ ގާތް ގުޅުމެއް އޮންނަ ބަޔަކަށް ކަމަށް ބުނެ އޭސީސީން ޕީޖީ އޮފީހުގައި އެދުނީ، އޭނާގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާކޮށްދިޔުމަށެވެ.
އުމަރުގެ މައްޗަށް ދައުވާކޮށްދޭން އެދުނުކަން ހާމަކޮށް މިއަދު އޭސީސީއިން ނެރުނު ބަޔާނުގައި ބުނެފައި ވަނީ ސްޓެލްވާޓްގެ ހިއްސާދާރުންގެ ތެރޭގައި ހިމެނޭ ހަތަރު މީހުންނަކީ ވެސް އުމަރާ ގާތް ގުޅުމެއް އޮންނަ މީހުން ކަމަށެވެ. އެގޮތުން އޭގެ ތެރެއިން ދެ މީހުންނަކީ އުމަރުގެ ވިޔަފާރި ޕާޓްނަރުން ކަމަށްވާތީ އެއީ ދައުލަތުގެ މާލިއްޔަތު ގަވައިދުގައި ބުނާ ފަދަ ކްލޯޒް އެސޯސިއޭޓުން ކަމަށް ބުނެފައިވެ އެވެ. އެހެންވެ، އެ ކޮމިޝަނުން ބުނި ގޮތުގައި ސްޓެލްވާޓް ކުންފުނި ވާނީ އުމަރާ މަސްލަހަތު ފުށޫ އަރާ ކުންފުންޏަކަށެވެ.
މޮނިކޮން ޓެގް ބޭނުންކޮށްގެން ކުށްވެރިން ބެލެހެއްޓުމުގެ ހިދުމަތް ދޭނެ ފަރާތެއް ހޯދަން އޭރު ހޯމް މިނިސްޓްރީން އިއުލާނުކޮށް، އެކަމާ ގުޅޭ ކަންކަން ކުރިއަށްގެންދިޔައީ އާންމު އުސޫލާ ހިލާފަށް ސީދާ އުމަރުގެ ބެލުމާއި އިރުޝާދުގެ ދަށުން ކަމަށް ވެސް އެ ކޮމިޝަނުން ބުންޏެވެ. ސްޓެލްވާޓުން ދެއްކި ޓެގް ޓްރައަލް އިވެލުއޭޓް ކުރުމަށް އުމަރު އަމިއްލައަށް ޓެކްނިކަލް ކޮމެޓީއެއް ކަނޑައަޅައި އެ ކޮމެޓީ ޗެއާކަން ވެސް ކުރެއްވި ކަމަށް ބުންޏެވެ.
އޭސީސީން ބުނީ، އެ ކުންފުނިން ދެއްކި ތަކެއްޗަކީ މަސައްކަތަށް އެކަށީގެންވާ ތަކެތި ކަމަށް އެ ކޮމިޓީން ނިންމިޔަސް، މަސައްކަތް ސްޓެލްވާޓާ ހަވާލުކުރުމަށް އެ ކޮމެޓީން ނިންމާފައި ނުވާ ކަމަށެވެ.
މިފަދަ ކަންކަން ހަވާލު ކުރާ ފަރާތެއް ކަނޑައަޅާނީ އަންދާސީ ހިސާބު ބަލާ ކޮމިޓީން އެންމެ ގިނަ ޕޮއިންޓް ލިބުނު ފަރާތަށް ކަމަށް އޭރު އަމަލުކުރަމުންދިޔަ ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާއިރު، މި މަސައްކަތް ހޯމް މިނިސްޓްރީގެ އޭރުގެ ބިޑް ކޮމިޓީއަށް ހުށަހަޅާފައި ނުވާ ކަމަށް ވެސް ބުނެފައިވެ އެވެ.
އޭސީސީން ބުނެފައި ވަނީ ހަމައެކަނި ކޮމެޓީން ނިންމި ނިންމުމަށް ބިނާކޮށް ސްޓެލްވާޓާ މަސައްކަތް ހަވާލުކުރުމުގެ ހުއްދައަށާއި އެ ކުންފުންޏަށް އެޑްވާންސްގެ ގޮތުގައި 500،000ރ. ދިނުމުގެ ލަފައަށް އެދި އުމަރު ސޮއިކޮށް ފިނޭންސް މިނިސްޓްރީއަށް ސިޓީ ވެސް ފޮނުވި ކަމަށެވެ. އެ ފައިސާ ދިނީ އެ ކުންފުނިން ލޯނު ނަގަން ޖެހޭތީއާއި އެ ކުންފުންޏަށް މަސައްކަތް ފަށަން ފަސޭހައަކަށް ކަމަށް އޭސީސީއިން ބުނެފައިވެ އެވެ.