ހުޅުމާލެ އެޗްޑީސީގެ ދަށުގައި އޮތުމަކީ ލޯނު އެއްބަސްވުމުގެ ޝަރުތެއް

ހުޅުމާލޭގައި ހައުސިން މަޝްރޫއުތަކާއި ތަރައްގީގެ އެކި ކަންކަމަށް ލޯނު ނަގަން ހުޅުމާލޭގެ ބިން ރަހުނުކޮށްފައި ވާއިރު އެޗްޑީސީގެ ފުރިހަމަ ބާރުގެ ދަށުގައި ހުޅުމާލެ ބޭއްވުން، ބޭންކްތަކުން ލޯނު ދިނުމުގައި ޝަރުތުކޮށްފައިވާ ކަމަށް އެކަން އެނގޭ ބައެއް ބޭފުޅުން ވިދާޅުވެއްޖެ އެވެ.

ހުޅުމާލެ އަށް އެންމެ ފުރަތަމަ ވަކި ރަޖިސްޓްރީއެއް ހަދައިދީ ހުޅުމާލެ އަކީ އެޗްޑީސީގެ މިލްކެއް ކަމުގެ ލިޔުމެއް ހޯދަން ޖެހުނު ސަބަބަކީ ވެސް ކުންފުނީގައި ރަހުނު ކުރާނެ ރަނގަޅު އެސެޓެއް ނެތުމުން، ވިޔަފާރި އުސޫލުން ކުންފުނި ހިންގުމަށް ބޭނުންވާ ލޯނު ހޯދަން ދަތިވުން ކަމަށް މިކަމުގައި އުޅުއްވި ބައެއް ބޭފުޅުން "މިހާރު" އަށް ވިދާޅުވި އެވެ. އޭގެ ފަހުން ދިޔައީ އެކި ދުވަސްވަރު އެކި ކަންކަމަށް ލޯނުތައް ނަގަމުންނެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭ ދެ ވަނަ ފިޔަވަހީގެ ބިން ހިއްކަން ބޭނުންވާ ފައިސާ ހޯދުމަށް ލޯނު ނެގީ ވެސް ހުޅުމާލޭ ފޭސް 1 މޯޖޭގްކޮށްފަ އެވެ.

ފޭސް 2 ހިއްކައި ނިމުމުން އެ ބައި ވެސް ހިމެނޭ ގޮތަށް ފޭސް 1 އާ އެއްކޮށް ހުޅުމާލޭގެ އާ ރަޖިސްޓްރީއެއް ހައުސިން މިނިސްޓްރީން، މިހާރުގެ މޭޔަރު ޑރ. މުހައްމަދު މުއިއްޒު މިނިސްޓަރު ކަމުގައި ހުންނެވިއިރު ދެއްވައިފަ އެވެ. އަދި އޭގެ ފަހުން ފޭސް 2 ގައި ފްލެޓް އެޅުމާއި އެހެން ކަންކަމަށް ވެސް މި ރަޖިސްޓްރީ ބޭނުންކޮށްގެން ލޯނުތައް ނެގި އެވެ. މި ލޯނުތައް ދިން އިރު ވެސް ހުޅުމާލޭގެ ބިމުގެ އަގަށް ނޭދެވޭ ބަދަލެއް އަންނަ ކަމެއް ނުކުރުމާއި އެ ބިން އެޗްޑީސީގެ ދަށުގައި ބޭއްވުން ޝަރުތުކޮށްފައިވާ ކަމަށް އެކަން އެނގޭ ބައެއް ބޭފުޅުން ވިދާޅުވި އެވެ.

"މި ލޯނުތައް ދިން އިރު ބޭންކުތަކުން ކުރި އެ ޝަރުތުތަކާ ހިލާފްވެއްޖެ ނަމަ ލޯނު ޑިފޯލްޓްވާނެ ކަމަށް ލޯނު އެއްބަސްވުމުގައި އޮންނާނެ. އެހެންވެ ކައުންސިލުން މިހާރު މި ކަންތައް ކުރާ ގޮތުން ދައުލަތުން އެތައް މިލިއަން ޑޮލަރެއް ދައްކަން ޖެހި ބޮޑު ގެއްލުމަކާ ކުރިމަތިވުމުގެ ފުރުސަތު އެބަ އޮތް،" އެއްބަސްވުންތަކުގެ މައުލޫމާތު އެނގިވަޑައިގަންނަވާ ބޭފުޅަކު ނަން ހާމަ ނުކުރަން ޝަރުތުކޮށް ވިދާޅުވި އެވެ.

އޭނާ ވިދާޅުވީ އެއްބަސްވުންތަކުގައި ޝަރުތުކޮށްފައި ހުރި ކަންކަމުގެ ތެރޭގައި އެޗްޑީސީގެ ބާރުގެ ދަށުން ހުޅުމާލޭގެ ބިން ނުނެގުން ހިމެނޭ ކަމަށެވެ.

މާލޭ ސިޓީ ކައުންސިލުން ހުޅުމާލޭގެ ރަޖިސްޓްރީ ބާތިލްކުރީ ކައުންސިލްގެ މެޖޯރިޓީ އޮންނަ ޕީޕީއެމް އިން ހުޅުމާލޭ ދެ ވަނަ ފޭސްގައި ޖަލްސާއެއް ބާއްވަން އުޅުމުން އެކަން ކުރެވޭނީ އެޗްޑީސީން ހުއްދަ ނަގައިގެން ކަމަށް ބުނުމުން އެކަމާ ދެބަސްވުމަށް ފަހުގަ އެވެ. ކައުންސިލުން ބުނަނީ ހުޅުމާލެ އަކީ ކައުންސިލްގެ އިހްތިސާސްގެ ތެރޭގައި އޮތް ތަނެއް ކަމަށާއި އެތަނަށް ހިނގާނީ ކައުންސިލްގެ ބާރު ކަމަށެވެ.

ނަމަވެސް ލާމަރުކަޒީ ގާނޫނުގައި ބަޔާންކޮށްފައިވާ ގޮތުގައި އެ ގާނޫނަށް އަމަލުކުރަން ފެށި އިރު އާންމު ރައްޔިތުންނަށާއި ސަރުކާރުގެ އިދާރާތަކަށް ދޫކޮށްފައިވާ އެންމެހައި ވަސީލަތްތަކާއި ބިނާތަކާއި ނުއުފުލޭ ހަރުމުދަލާއި، ގައުމީ ސަލާމަތަށް ކަނޑައަޅާފައިވާ ތަންތަނުގެ މިލްކުވެރިކަން ލިބިގެންވަނީ މި ގާނޫނަށް އަމަލުކުރަން ފެށުމުގެ ކުރިން އެތަނެއްގެ މިލްކުވެރިކަން އޮތް ފަރާތަކަށެވެ. ގާނޫނަށް އަމަލުކުރަން ފެށުމުގެ މާ ކުރިން އެޗްޑީސީ އުފައްދާފައި ވަނީ ހުޅުމާލޭގެ ބިމުގެ ބޮޑު ބައި ކުންފުނީގެ ރައުސުލްމާލްގައި ހިމެނޭ ގޮތަށް އެ ބިމަކީ ކުންފުނީގެ މިލްކެއްގެ ގޮތުގައި ކަނޑައަޅައިފަ އެވެ.