އެންޓިކޮރަޕްޝަން ކޮމިޝަން (އޭސީސީ)ގެ މެމްބަރުން ވަކިކުރަން، ރައްޔިތުންގެ މަޖިލީހުން މިއަދު ހުށަހެޅި މައްސަލައިގައި، އެ މެމްބަރުން ޖަވާބުދާރީ ވެވަޑައިގަތުމަށް މިނިވަން މުއައްސަސާތަކުގެ ކޮމިޓީން މިއަަދު ފަސް ދުވަހުގެ މުހުލަތެއް ދީފި އެވެ.
އޭސީސީގެ މެމްބަރުން ވަކިކުރުމުގެ މަސައްކަތް ފެށުމަށް މިނިވަން މުއައްސަސާތަކާ ބެހޭ ކޮމިޓީން ފާސްކުރުމުން، ދައުރުން ބޭރުގައި ބޭއްވި މަޖިލީހުގެ ޖަލްސާގައި މިއަދު ވަނީ ގަވާއިދުގައި އޮންނަ ގޮތަށް އެކަން އިއުލާންކޮށްފަ އެވެ. އެއާއެކު ބޭއްވި މިނިވަން މުއައްސަސާތަކާ ބެހޭ ކޮމިޓީގެ ނިންމުމަކަށް ވީ އޭސީސީގެ މެމްބަރުން ލިއުމުން ޖަވާބުދާރީވެވަޑައިގަތުމުގެ ފުރުސަތު ދިނުމަށެވެ. އެއީ، އެ ނޫން ގޮތަކަށް ކުރިއަށް ގެންގޮސްފި ނަމަ ޕްރޮސެސް މާ ދިގު ވެދާނެތީ ކަމަށް މެމްބަރުން ވިދާޅުވި އެވެ.
ލިއުމުން ޖަވާބުދާރީވާން ދިން ފުރުސަތުގެ އިތުރަށް އެއްވެސް ފުރުސަތެއް އޭސީސީގެ މެމްބަރުންނަށް ދޭން ޖެހޭ ކަމަށް ގަބޫލުނުކުރައްވާ ކަމަށް ވެސް ބައެއް މެމްބަރުން ވިދާޅުވި އެވެ.
އޭސީސީގެ މެމްބަރުން ލިއުމުން ޖަވާބުދާރީވާން ފުރުސަތު ދޭން ހުށަހެޅުއްވީ ހެންވޭރު ދެކުނު ދާއިރާގެ އެމްޑީޕީ މެމްބަރު ހުސައިން ޝަހީމް (އަނދުން ހުސައިން) އެވެ. އޭނާ ހުށަހެޅުއްވީ، ލިއުމުން ޖަވާބުދާރީ ވެވަޑައިގެންނެވުމުގެ ބަދަލުގައި، ކޮމިޓީއަށް ވަޑައިގެން ނުވަތަ އޮންލައިންކޮށް ނަމަވެސް ބައްދަލުކުރައްވައި ޖަވާބުދާރީ ވެވަޑައިގަނަންވަން އެދިވަޑައިގަންނަވާ ނަމަ އެ ފުރުސަތު ވެސް ދިނުމަށެވެ. އެހެން ނަމަވެސް އެ ހުށަހެޅުމަށް ލިބުނީ އެންމެ ދެ ވޯޓެވެ.
ފަސް ދުވަސް ތެރޭގައި ލިއުުމުން ޖަވާބުދާރީ ވެވަޑައިގެންނެވުމުގެ ފުރުސަތު ދޭން ހުށަހެޅުއްވީ ގަމު ދާއިރާގެ އެމްޑީޕީ މެންބަރު މުހައްމަދު ވިސާމް އެވެ. އެ ހުށަހެޅުމަށް ތާއީދުކުރެއްވީ ވެލިދޫ ދާއިރާގެ އެމްޑީޕީ މެމްބަރު މުހައްމަދު އަބްދުﷲ ޝަފީގެވެ.
އެ ހުށަހެޅުން ފާާސްކުރީ މިއަދުގެ ބައްދަލުވުމުގައި ބައިވެރިވެވަޑައިގެންނެވި ވޯޓުގައި ބައިވެރިވެވަޑައިގެންނެވި ހަތް މެމްބަރުންގެ ތެރެއިން ފަސް މެމްބަރުންގެ ވޯޓުންނެވެ.
މިނިވަން މުއައްސަސާއެއްގެ މެމްބަރުން ވަކިކުރާ ނަމަ، މަޖިލީހުގެ ޖަލްސާއެއްގައި އެކަން އިއުލާނުކުރުމަށް ފަހު، މައްސަލަަ ފޮނުވާނީ މިނިވަން މުއައްސަސާތަކުގެ ކޮމިޓީއަށެވެ. އެ ކޮމިޓީން ދިރާސާކުރުމަށް ފަހު އެކުަލަވައިލާ ރިޕޯޓް މަޖިލީހުގެ މެމްބަރުން ދިރާސާކުރަން ތިން ދުވަސް ދޭން ޖެހެ އެވެ. އެ ރިޕޯޓަށް މަޖިލީހުގެ ތަޅުމުގައި ބަހުސް ކުރާނީ އެއަށް ފަހުގަ އެވެ. އެއީ ދެ ގަޑިއިރުގެ ބަހުސެކެވެ.