ޚަބަރު / މިނިވަން މުއައްސަސާތަކުގެ ކޮމިޓީ

އޭސީސީ އާއި އީސީގެ ނައިބު ރައީސާއި އިތުރު 3 މެންބަރުން ވަކިކުރަން ކޮމިޓީން ފާސްކޮށްފި

މިނިވަން މުވައްސަސާތަކުގެ ކޮމިޓީން ވަކިކުރަން ނިންމި އީސީގެ މެންބަރު ޑރ. މުހައްމަދު ޒާހިރު، އާސިފް، އެ ކޮމިޝަންގެ ނައިބު ރައީސް ނަޝާތު، އޭސީސީގެ ނައިބު ރައީސް ސަލާމް، އަދި އެ ކޮމިޝަންގެ މެންބަަރު ތޯހާ (ކ-ވ) --

އައިޝަތު ނުޒުހާ، މިހާރު

24 ނޮވެމްބަރ 2024 - 13:37

48 comments

އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ބައެއް މެންބަރުން މަގާމުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފި އެވެ.

ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެން ކަމަށް ބުނެ، އެ ކޮމިޓީން ކުރިން ވަނީ އޭސީސީގެ ނައިބު ރައީސް އަބްދުލް ސަލާމާއި މެންބަރު ތޯހާ މުހައްމަދާއި އީސީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރު އަދި ސިވިލް ސާވިސް ކޮމިޝަންގެ ރައީސް މުހައްމަދު ނާސިހުގެ މައްސަލައެއް ބަލަން ފަށައިފަ އެވެ.

ސިއްރުކޮށްގެން މިއަދު ކުރިއަށް ގެންދިޔަ އެ ކޮމިޓީގެ ބައްދަލުވުމުގައި ނިންމާފައިވަނީ ތުހުމަތުވާ މެމްބަރުންގެ ތެރެއިން ނާސިހު ފިޔަވައި ދެން ތިއްބެވި މެންބަރުން ވަކިކުރުމަށެވެ. ނަމަވެސް ނާސިހު ވަކި ނުކުރަން ކޮމެޓީން ނިންމި ސަބަބެއް ސާފެއް ނުވެ އެވެ.

ACC, EC adhi CSC ge baeh memberun vaki kuranee nufoozah lenbumaai sulookee massala thakakaa gulhigen

The most trusted news source in the Maldives

Mihaaru

އޭސީސީގެ މެންބަރުން ވަކިކުރަން ފޮނުވި ސިޓީ މަޖިލީހުގެ ކުރިން އިއުލާން ކުރައްވަމުން މަޖިލިހުގެ އަމީން އާންމު ފާތިމަތު ނިއުޝާ ވިދާޅުވެފައިވަނީ އޭސީސީގެ ގާނޫނުގެ 17 ވަނަ މާއްދާގެ (ހ) ގައި އެ ކޮމިޝަންގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށް ބަޔާން ކޮށްފައިވާ ކަމަށެވެ. އަދި އެ މާއްދާގެ (ށ) ގައި އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތެއް އިސް ކޮށްގެން ނުވާނެ ކަމަށް ބުނެފައިވާކަން އޭނާ ފާހަގަ ކުރެއްވި އެވެ.

އެ ދެ މާއްދާއާ ހިލާފަށް މެމްބަރަކު އަމަލު ކުރުމަކީ މެމްބަރު ކަމުން ވަކިކުރެވޭނެ ހާލަތެއް ކަމަށް ގާނޫނުގައި ބުނާއިރު، ސަލާމާއި ތޯހާ އެ މާއްދާތަކާ ހިލާފަށް އެތައް ކަމެއް ކުރައްވާފައިވާ ކަމަށް ތުހުމަތުކޮށް، މިނިވަން މުއައްސަސާތަކާ ބެހޭ ކޮމިޓީއަށް ދެ މައްސަލައެއް ލިބިފައިވާ ކަމަށް ނިއުޝާ ކުރިން ވިދާޅުވެފައިވެ އެވެ.

އީސީ އާއި ސީއެސްސީގެ މެމްބަރުން ވަކިކުރުމާ ގުޅޭގޮތުން އެ ކޮމިޓީން ފޮނުވި ސިޓީ އިއުލާން ކުރައްވަމުން އަމީންއާންމު ވިދާޅުވެފައިވަނީ ސުލޫކީ ހަމަތަކާ މެންބަރުން ހިލާފުވެއްޖެ ނަމަ އެ މެންބަރަކު މަގާމުގައި ދެމިހުރުން އެކަށީގެން ނުވާ ކަމަށް ބަލައި، މަގާމުން ވަކިކުރެވިދާނެ ކަމަށް އެ ދެ މުއައްސަސާއާ ގުޅޭ ގާނޫނުތަކުގައި ބުނާ ކަމަށެވެ.

މެންބަރުން ވަކިކުރުމުގެ މައްސަލަ މިނިވަން މުއައްސަސާތަކުގެ ކޮމިޓީން ކުރިއަށް ގެންގޮސްފައިވަނީ ސިއްރުންނެވެ.