ޔާމީން ސަޕޯޓަރުންނާ އެކު: އެމަނިކުފާނަށް ލިބެން ޖެހޭ އިނާޔަތް މިއަދު ފިނޭންސުން ވަނީ ދޫކޮށްފައި. -- ފޮޓޯ: ފަޔާޒު މޫސާ / މިހާރު
16 ޖެނުއަރީ 2022 - 15:02
ކުރީގެ ރައީސް އަބްދުﷲ ޔާމީނަށް ޖަލު ހުކުމެއް އިއްވާފައި ހުންނެވި ދެ އަހަރުގެ މުއްދަތަށް ދައުލަތުގެ ބަޖެޓުން ކުރީގެ ރައީސުންނަށް ދޭން ޖެހޭ އިނާޔަތުގެ ގޮތުގައި 2.4 މިލިއަން ރުފިޔާ އެމަނިކުފާނަށް ޖަމާކޮށްދީފި އެވެ.
ފިނޭންސް މިނިސްޓްރީން އެމަނިކުފާނަށް މި އިނާޔަތް ހަމަޖައްސައިދިނީ ބަންދުކުރި ދުވަހުން ފެށިގެން މިނިވަންވުމާ ހަމައަށް ލިބިވަޑައިގަންނަވަން ޖެހޭ އިނާޔަތްތައް ދޫކޮށްދެއްވަން ވަކީލުން އެދިވަޑައިގަތުމާ ގުޅިގެންނެވެ. މަނީ ލޯންޑްރިންގެ ކުށުގައި އެމަނިކުފާނަށް ނޮވެމްބަރު، 28، 2019 ގައި އިއްވި ފަސް އަހަރުގެ ޖަލު ހުކުމް ބާތިލްކޮށް ސުޕްރީމް ކޯޓުން އެމަނިކުފާނު މިނިވަންކުރީ މިދިޔަ ނޮވެމްބަރު މަހުގެ ތެރޭގަ އެވެ.
ޔާމީން މިނިވަންވުމާ އެކު ދައުލަތުން އެ މަނިކުފާނަށް ދޭން ޖެހޭ ސެކިއުރިޓީ އާއި އިނާޔަތްތައް ހަމަޖައްސައިދޭން ފެށީ ޖަލު ހުކުމުގެ ދެ އަހަރު ނުހިމަނަ އެވެ.
ފިނޭންސް މިނިސްޓްރީގެ މީޑިއާ އެގްޒެކެޓިވް މުހައްމަދު ޝަނޫން މިއަދު ވިދާޅުވީ ޔާމީންގެ ލޯޔަރުންގެ ހުށަހެޅުއްވުން ދިރާސާކޮށް، އެމަނިކުފާނަށް ގާނޫނީ ގޮތުން ލިބެން ޖެހޭ އިނާޔަތް މިދިޔަ ހަފުތާގައި ޖަމާކޮށްފައިވާ ކަމަށެވެ. އަދި މިދިޔަ ޑިސެމްބަރުގެ އިނާޔަތްތައް ވެސް ޖަމާކޮށްފައިވާ ކަމަށް ވިދާޅުވި އެވެ.
މާލީ އިނާޔަތް: 50،000ރ. (ދައުރަކަށް)
ދިރިއުޅުއްވާ ތަނުގެ ހަރަދު: 50،000ރ.
އޮފީސް ހިންގުމުގެ ހަރަދު: 175،000ރ.
ބޭސްފަރުވާގެ ހަރަދު (އަހަރަކަށް) : 700،000ރ.
ގާނޫނުގައި ކަނޑައަޅާފައިވާ މި އިނާޔަތަށް ބަލާއިރު ޔާމީނަށް ދެ އަހަރަށް ގާތްގަނޑަަކަށް 6.6 މިލިއަން ރުފިޔާ ދައުލަތުން ހަމަޖައްސައިދޭން ޖެހެ އެވެ. އެކަމަކު 2.4 މިލިއަނަށް ޔާމީންގެ ވަކީލުން އެދިވަޑައިގަތީ ކްރިމިނަލް ކޯޓުން ހުކުމް އިއްވުމާ ހަމައަށް ވެސް އެމަނިކުފާނު މަހަކު 100،000ރ. ނަންގަވާތީ އެވެ.
އެއީ، މާލީ އިނާޔަތުގެ ގޮތުގައި 50،000ރ. އަދި ދިރިއުޅޭ ތަނުގެ ހަރަދުގެ ގޮތުގައި 50،000ރ. އާއެކު ޖުމްލަ 100،000ރ. އެވެ.
ޔާމީނަށް ދެމުން އައި އިނާޔަތް 2019 ގައި ކަނޑާލީ، ރައީސުލްޖުމްހޫރިއްޔާ އޭނާ މަގާމުގައި ހުންނެވިއިރު ޖިނާއީ ކުށެއް ކުރި ކަން ޝަރީއަތަށް ސާބިތުވާ ވަގުތުން ފެށިގެން އެ މަނިކުފާނާއި އަނބިކަނބަލުންނަށް ގާނޫނުގެ ދަށުން ލިބިދޭ އެއްވެސް ރައްކާތެރިކަމަކާއި އިނާޔަތެއް ނުލިބޭނެ ކަމަށް ގާނޫނުގައި އޮތުމުންނެވެ.
މި އަހަރަަށް ލަފާކުރާ ބަޖެޓް ފާސްކުރިއިރު ޔާމީނަށް ދޭންޖެހޭ އިނާޔަތްތައް ބަޖެޓުގައި ހިމަނައިފައެއް ނުވެ އެވެ. އެއީ ބަޖެޓް މަޖިލީހުން ފާސްކުރއިރު، އެ މަނިކުފާނުގެ މައްޗަށް ޖިނާއީ ކުށެއް ސާބިތުވެފައި ވާތީ އެވެ. ޔާމީނަށް އިނާޔަތް ދޭން ހަމަޖެއްސީ ހާއްސަ ބަޖެޓުންނެވެ.
ޔާމީނަށް މަނީ ލޯންޑްރިންގެ ދައުވާ ކުރީ އެ މަނިކުފާނުގެ ނަމުގައި އޮތް އެކައުންޓަކަށް އެމްއެމްޕީއާރުސީގެ ޚިޔާނާތުގެ ފައިސާ ދައުރުކުރި ކަމަށް ތުހުމަތު ކުރެވޭ އެސްއޯއެފުން ޖަމާކުރި މައްސަލައިގަ އެވެ. އެ ފައިސާ އެންޓި ކޮރަޕްޝަން ކޮމިޝަން (އޭސީސީ) އާ އެކު ހެދި އެސްކްރޯ އެކައުންޓެއްގައި ބެހެއްޓުމަށް އެ މަނިކުފާނު އެއްބަސްވެ ވަޑައިގަތުމަށް ފަހު، އެހެން ފައިސާތަކެއް އެސްކްރޯ އެކައުންޓަށް ޖަމާކޮށް އަދި އެސްއޯއެފުން ޖަމާކުރި ފައިސާ އިސްލާމިކް ބޭންކްގެ ޖެނެރަލް އިންވެސްޓްމަންޓް އެކައުންޓަކަށް ބަދަލުކޮށް، އޭގެ އަސްލު އޮޅުވައިލި ކަމަށް ބުނެ އެވެ.
ސުޕްރީމް ކޯޓުން އިއްވި ހުކުމުގައި ބުނީ ޔާމީން ޖަލަށް ލުމަށް ހުކުމްކުރުމުގައި އަސްލަކަށް ބެލި، ވޮޑަމުލާގެ ފައިސާ އެސްއޯއެފަށް ޖަމާވިކަމާ މެދު ޝައްކު އުފެދޭ ކަމަށެވެ. މައްސަލަ ދިރާސާކުރި އިރު، އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔާތުގެ މައްޗަށް ޚިޔާނާތުގެ ކުށް ސާބިތުވެފައި ވަނީ އެސްއޯއެފަށް ޖަމާވި ވޮޑަމުލާގެ ޗެކްކަން ވަނީ އެނގިފައި ކަމަށް ފަނޑިޔާރު ވިދާޅުވި އެވެ. ނަމަވެސް ޔާމީންގެ މައްސަލާގައި މި ޗެކް ހުށަހަޅައިފައެއް ނުވެ އެވެ.
ޔާމީނަށް ތުހުމަތުކޮށް، މަނީ ލޯންޑްރިންގެ އިތުރު ދެ މައްސަލައެއް ކްރިމިނަލް ކޯޓަށް ވަނީ ހުށަހަޅައިފަ އެވެ. އެއީ، އެމްއެމްޕީއާރުސީ މެދުވެރިކޮށް ރ. ފުއްގިރި ދޫކުރި މުއާމަލާތާއި ވ. އާރަށް ދޫކުރުމުގެ މުއާމަލާތާ ގުޅިގެންގެންނެވެ. އެ އިން ކޮންމެ މައްސަލައެއްގައި މަނީ ލޯންޑަރިންގެ ދައުވާއަކާއެކު ރިޝްވަތު ގަބޫލުކުރުމުގެ ދައުވާއެއް ކޮށްފައިވެ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
ވަހީދު
18 January 2022
މޭކަރާނެތާ އެހުރިހާ ފައިސާއެއް ޚަރަދު ކުރާނީ އެމްޑީޕީއާއި ދެކޮޅަށް ގައުމުގެ މިނިވަންކަމަށް ވިއްޔާ.
ފުތާ
17 January 2022
ކެނެރީގޭ ނަޝީދު އަތުން އޭނާގެ ވެރިކަމުގައި ލިބުނު ގެއްލުމުގެ ބަދަލު ހޯދަން ގޮވާލަން މިހާރު އެހެރީ ތިން ހަތަރު ތަނުން މުސާރަ ނަގައިގެން އަބަދު ރާއްޖޭން ބޭރުގައި
ސެމިނަލްމަންކް
17 January 2022
ރައްޔިތުންގެ ފައިސާތައްކެވުނު ވަރުމަދުވެގެން އަނެއްކާ ލާރިތަކެއް ކާލަނީދޯ ކަލެއަށްވާ ސާބަސް
ކެމިކަލްއަލީ
17 January 2022
އޭނައެކައުންޓަށް ޖަމާކުރަންޖެހޭނީ ޑޮލަރުން 2،4 މިލިއަން ޑޮލަރު ޖަމާކޮށްލަދީ
ޙިނި
17 January 2022
ރިހާކުރު ފުޅި ވަގައްނިގިމީހާ 10 އަހަރައް ޖަލައް، އަދިވެސް ހުރީ ޖަލުގަ
އާކުރުބެ
17 January 2022
ދުނިޔޭގައި އުޅެންވީ ވަކިބަޔެކެވެ. ކުށްވެރިވިޔަސް ފަސްތަރީގެ ޕްރޮޓެކްޝަން ސެންޓަރަށެވެ. މާސިންގާ އިނާޔަތާ ހިމާޔަތެވެ. އާދައިގެ މުވައްޒަފުންނަށް ދޭންވީމާ ބޮޑުލާރިޔާ ހަމައެވެ. އަޅެ ގާނޫނެއް ހެދިޔަސް ހަދަންވާނީ އިސްލާމު ގޮތަކަށެވެ´ ވެރިކަމާހެދި މީހުން މަރުދަންޖެހޭ ސަބަބެއް އެބައޮތްތާއެވެ.
ބަޑިތަކުރު
17 January 2022
މިރާއްޖޭގައި މީނާ ވެރިކަން މިކުރިގޮތަށް ނޫނީ ވެރިކަން ކުރާނެކަމެއް ނެތްތާއެވެ. މައްސަލަތައްވެސް ބޮޑުންނަށް މޮޅުގޮތްވެގެން ނިމި، މިއޮއްގެން ދައުލަތުން އެ މާތްމީހާ ބެލުމާ ހަވާލުވީއެވެ. އާދައިގެ މީހާއަށް މުސާރައިން ޖަމާކުރިއެއްޗަކާއެކު 65 އަހަރުން ފެށިގެން 79 އަހަރާ ހަމައަށް ޕެންޝަނެއް ލިބޭއިރު، މިވެރިންނާ ޖެހުނީމާ ހުރިހާ ހޭދައެއް ކުރަން މިޖެހެނީ ދައުލަތުންނެވެ. އެވެސް އިންތިހާއަށް ބޮޑެތި އަދަދުތަކުންނެވެ.
އިސްމާލި
17 January 2022
ޔާމީން އެކަންޏެއް ނޫން. ކުރީގެ ރައީސުންނޭ ކިޔާ ވަކި ބަޔަކަށް އަހަރެމެންގެ އަތުން އަހަރަކު އެތައް މިލިއަން ރުފިޔާއެއް ހަރަދުކުރަމުން މި ދަނީ ކީއްވެގެންތަ؟ އަމިއްލަ ގޭގައި އުޅޭ އިރުވެސް އެތަނަސް ވެސް އަހަރެމެން ފައިސާ ދޭން ޖެހޭތަ؟ އޮފީސް ހިންގާށޭކިޔައި ދޭ ފައިސާ ހަރަދުކުރަނީ އޮފީސް ހިންގަންތޯ ބަލާތަ؟ އެހެން ނޫނަސް ކޮން އޮފީހެއް ހިންގާކަށްތަ؟ ރައްޔިތުންނަށް ފައިދާ ނުވާ ކަމެއް ކުރަން ކީއްކުރާ އޮފީހެއް؟ ބޭސް ފަރުވާ އަށް ދެނީ ނަގުދު ފައިސާތަ؟
އަދި ސަލާމަތެއް ނޯންނާނެ
17 January 2022
ނޫސްތަކުގައި ތިގޮތަށް ރައީސް ޔާމީނަށް ލިބިލެއްވި ފައިސާގެ ޢަދަދު ހާމަކުރުމުން އެމަނިކުފާނަކަށް ސަލާމަތެއް ނޯންނާނެއެވެ. އެމަނިކުފާނުގެ ވަށައިގެން އެނބުރޭ ކުޅަނދު މަދު ކުދިންކޮޅު ހިތަށް އަރާނީ އޭގެން ބައެއް ތިމަންނަމެންނަށް ޙައްޤުވާނެ ކަމަށެވެ. އެމަނިކުފާނު މިނިވަން ކުރުމަށް ތިމަންނަމެން ވެސް ރެއާއިދުވާލު ހަޅޭއް ލެވީމެވެ. އެހެންވެ އެކިއެކި ކަންކަން ނުވެގެން އެހީއެއް ލިބޭތޯ މިހާރުވެސް ދިގު ކިޔޫ އެއް އޮންނާނެކަން ކަށަވަރެވެ.
ދުރުމި
17 January 2022
އަސްލު 2 މިލިޔަން ރުފިޔާ ރައީސް ޔާމިން އަށް ލިބުނު ގެއްލުމުގެ ބަދަލު އަށްވުރެ މާ މަދު ކޯޓުން އެއޮތީ ނިއްމާފަ ކުށެއް ނުކުރާ ކަމަށް އެހެން ވީމާ ރައީސް ޔާމިން އަށް ލިބުނު ގެއްލުމުގެ ބަދަލު ހޯދުމަށް ގޮވާލަން.
ރިހާކުރު
17 January 2022
ޔާމިނުއަށް މަގުފުރެދިފަ ތިބޭ ބަޔަކަށް އިރުހަނދާ ތަރިތައް ޔާމިނަށް ދިނަސް މަދުކަމަށް ހީވެފަ އޮންނަނީ! ޔާމީނަށް ބަދަލު ލިބޭކަށް ނުޖެހޭ! ޔާމީނަކީ މުޖުރިމެއް! ބޮޑު އަނިޔާވެރިއެއް! ޔާމީނަށް ހައްގު އަދަބު ދިނުމަށް ގޮވާލަން! ވެރިކަމުގަ ހުރެ ހިންގީ އެތަކެއްހާސް ޖަރީމާ! ރައްޔިތުން މަޖުލީހަށް ބޭނީ އަތް ސްޕްރިމްކޯރޓް ފުރާޅުން ނެގީ ޓިނު މީހުން ޖަލަށް އަޅަމުންގޮސް ސިޔާދު ގާސިމުވެސް ޖަލަށްލީ! މިވަރު މުޖުރިމަކަށް ދޭންވީ ދައުލަތުގެ ބަޖެޓްތޯ؟ސިކުނޑި ހަމަތަ ކަލޭގެ