އަންނަ ހޮނިހިރު ދުވަހު ބާއްވާ ކޮމަންޑޫ ދާއިރާގެ ބައި އިލެކްޝަނަށް ނުފޫޒު ފޯރުވާނެ އަދި ކޮރަޕްޝަނަށް މަގުފަހިވާނެ އެއްވެސް ކަމެއް އެ ކުންފުނިން ނުކުރާ ކަމަށާއި އެފަދަ ތުހުމަތުތަކެއް އުޅޭ ނަމަ އަވަހަށް ތަހުގީގު ހިންގަން ފެނަކަ ކޯޕަރޭޝަނުން އިއްޔެ އެދިއްޖެ އެވެ.
"ހަމަ މިހާރުން މިހާރަށް ތަހުގީގު ކުރަންވީ،" އެފަދަ އެއްވެސް ޖަރީމާއެއް ނުހިންގާނެ ކަމުގެ ޔަގީންކަން ދެއްވަމުން ފެނަކައިގެ މެނޭޖިން ޑިރެކްޓަރު އަހުމަދު ސައީދު ވިދާޅުވި އެވެ.
އޭނާ އެހެން ވިދާޅުވި ނަމަވެސް މުޅި ގައުމުގެ ލޯ ހުއްޓިފައިވާ، ކޮމަންޑޫ ދާއިރާގެ ބައި އިލެކްޝަނާ ދިމާކޮށް، އެ ދާއިރާގައި ހިމެނޭ ތިން ރަށުގެ މީހުންނަށް ފެނަކަ އިން ގިނަ ބަޔަކަށް ވަޒީފާ ދީ، ލެޕްޓޮޕާއި ޓީވީ ފަދަ ތަކެތި ހަދިޔާ ކުރަމުންދާ ކަމުގެ ތުހުމަތު އެކި ފަރާތްތަކުން ކުރެ އެވެ.
މި އިންތިހާބު ސަރުކާރަށް މުހިންމު ވެފައި ވަނީ ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ކެންޑިޑޭޓް މުހައްމަދު ރާޝިދު ވާދަކުރައްވާތީ އެވެ. ސަރުކާރުގެ ގިނަ ވަސީލަތްތަކާއި ބައެއް ވަޒީރުންގެ ހުރިހާ ވަގުތެއް މިހާރު ހުސްކޮށްފައި ވަނީ އޭނާ އަށް އެ އިންތިހާބު ކާމިޔާބު ކޮށްދިނުމަށް ކަމަށް ބުނެ ބައެއް މީހުން އަންނަނީ ފާޑުކިޔަމުންނެވެ.
ކޮމަންޑޫ ދާއިރާގެ އިންތިހާބަށް ނުފޫޒު ފޯރުވާ ކަމުގެ ތުހުމަތު ކުރެވޭ އެއް ކުންފުންޏަކީ ފެނަކަ ކަމަށް ވާއިރު، އެކަމާ ގުޅިގެން "މިހާރު" އިން ސުވާލު ކުރުމުން އެ ކުންފުނީގެ އެމްޑީ އެ ތުހުމަތުތައް ދޮގުކުރެއްވި އެވެ.
އޭނާ ވިދާޅުވީ، ގަވައިދުން ކުރަމުން އަންނަ ކަންކަން ފިޔަވައި އެހެން އެއްވެސް ކަމެއް ކުންފުނިން ނުކުރާ ކަމަށާއި ހާއްސަކޮށް އިންތިހާބަށް އަމާޒުކޮށް، ވަޒީފާގެ ފުރުސަތެއް ހުޅުވާލާފައި ނުވާނެ ކަމަށެވެ.
ކޮމަންޑޫ ދާއިރާގައި ހިމެނޭ ފެނަކައިގެ އެއްވެސް އޮފީހަކުން މި ފަހުން އަލަށް މީހުންނަށް ވަޒީފާ ދީފައި ވާނެތޯ ސުވާލު ކުރުމުން ސައީދު ސީދާ ޖަވާބެއް ނުދެއްވަ އެވެ. ވިދާޅުވީ މި ވަގުތު ރަށްރަށުގައި ބޮޑެތި މަޝްރޫއުތައް ކުރިޔަށް ގެންދާއިރު، މުވައްޒަފުން ނެގުމުގެ ކަންކަން އަބަދުވެސް އޮންނަ ކަމަށެވެ. އެހެންވެ، އެއީ އިންތިހާބާ ގުޅޭ ކަމެއް ނޫން ކަމަށް އެމްޑީ ވިދާޅުވެ އެވެ.
އިންތިހާބާށް ނުފޫޒު ފޯރުވާނެ، ކޮރަޕްޝަނެއް މަގުފަހިވާނެ އެއްވެސް ކަމެއް ނުކުރަން. ހަމަ މިހާރުން މިހާރަށް ތަހުގީގު ކުރަންވީ -- ސައީދު
ކޮމަންޑޫ ދާއިރާގެ ރަށްރަށަށް ފެނަކައިން ތަކެތި ހަދިޔާކުރާ ކަމަށް ބުނާ ވާހަކަތަކަށް ރައްދު ދެއްވަމުން ސައީދު ވިދާޅުވީ، އެއީ ރާއްޖޭގެ ވަރަށް ގިނަ ސިއްހީ މަރުކަޒުތަކާއި ސްކޫލްތަކަށް ތަކެތި ހަދިޔާކޮށް، އަބަދުވެސް އެހީތެރިކަން ފޯރުކޮށްދެމުން އަންނަ ބައެއް ކަމަށެވެ.
އޭނާ ވިދާޅުވިގޮތުގައި، ފެނަކައިން ވަކިވަކި ފަރުދުންނަށް ތަކެތި ހޯދައިދީފައެއް ވެސް ނުވާނެ އެވެ. ސަރުކާރުގެ މުއައްސަސާއެއް ނުވަތަ ސިއްހީ މަރުކަޒެއް ފަދަ ތަނަކުން އެދިއްޖެ ނަމަ އަބަދުވެސް އެކަން ކޮށްދޭ ކަމަށް ސައީދު ވިދާޅުވި އެވެ.
"އަޅުގަނޑަށް ޔަގީންވާ ގޮތުގައި ކޮމަންޑޫ ދާއިރާގެ އެއްވެެސް ރަށަކުން އިންތިހާބާ ދިމާކޮށް އެދިފައި ނުހުންނާނެ [ތަކެތި ހޯދަން]. މާ ކުރިން ބޭނުންވެގެން އެދިފައި ހުރެދާނެ. އިންތިހާބާ ދިމާކޮށް އެފަދަ ކަމެއް ނެތް،" ސައީދު ވިދާޅުވި އެވެ.
ކޮަމަންޑޫ ދާއިރާގެ އިންތިހާބު ބޯމަތިވެފައި ވަނިކޮށް، ސަރުކާރުން ވަނީ އެ ދާއިރާ އަށް މުޅިން އަލަށް ގިނަ މަޝްރޫއުތަކެއް ވެސް ފަށައިފަ އެވެ. ދެ ކޮމަންޑޫ ގުޅައިލުމަށް 249 މިލިއަން ރުފިޔާގެ މަޝްރޫއަކާއި އައިސްޕްލާންޓް ގާއިމް ކުރުމަށް ފަސް މިލިއަން ރުފިޔާގެ މަޝްރޫއެއް ވަނީ ފަށައިފަ އެވެ.
އަދި ކޮމަންޑޫ ދާއިރާގައި ރިސޯޓެއް ތަރައްގީ ކުރަން ވެސް ވަނީ ހުޅުވާލައިފަ އެވެ.
އެއީ ސަރުކާރުން މީގެ ކުރިން ވެސް ވަރަށް ގިނަ މަޝްރޫއުތަކެއް ހިންގަމުން އަންނަ އަދި އެންމެ ގިނައިން މަޝްރޫއު ބަޖެޓު ވެސް ކޮށްފައިވާ އެއް ރަށެވެ.