އެމްޑީޕީގެ ބައެއް މީހުންނަށް ޒާހިރު ގޯސްވެއްޖެ، އެމްޑީ ދެއްވީ ވަކިނުކުރާނެ ކަމުގެ އިޝާރާތެއް!

އިއްޔެ ބޭއްވި ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެންޑިޑޭޓް މުހައްމަދު ރާޝިދު (ރާޑޯ) އަށް ވޯޓު ދޭން ޖެހޭނެ ކަމަށް ވިދާޅުވެ، ފެނަކައިގެ މުވައްޒަފުންނަށް ބިރު ދެއްކެވި ކަމަށް ތުހުމަތު ކުރެވޭ އެ ކުންފުނީގެ އޮޕަރޭޝަންސް ހެޑް ޒާހިރު އުސްމާން މަގާމުން ވަކި ނުކުރައްވާނެ ކަމުގެ އިޝާރާތެއް މެނޭޖިން ޑިރެކްޓަރު އަހުމަދު ސައީދު މިއަދު ދެއްވައިފި އެވެ.

ޒާހިރު ކަމަށް ބުނާ މީހަކު، ކޮމަންޑޫގެ ފެނަކަ ބްރާންޗުގެ މުވައްޒަފުންނާ ބައްދަލުކޮށް ވާހަކަ ދައްކާ އޯޑިއޯއެއް މީގެ ދެ ދުވަހެއް ކުރިން [ކޮމަންޑޫ ދާއިރާގެ ބައި އިލެކްޝަންގެ ކެމްޕެއިންގެ ތެރޭގައި] ސޯޝަލް މީޑިއާގައި ވަނީ ލީކުކޮށްލައިފަ އެވެ. އެ އޯޑިއޯގައި އޭނާ ބުނާ ގޮތުން ފެނަކައިގެ އެމްޑީ އަށް އެއްބާރުލުން ދޭ ކަމަށް ވާނީ އެމްޑީޕީގެ ކެންޑިޑޭޓަށް ވޯޓު ދީގެންނެވެ.

ރާޝިދަށް ވޯޓު ދޭން ބޭނުން ނުވާ މީހުންނަށް އޮތް ގޮތަކީ އޭނާގެ އަތަށް އެ މީހެއްގެ އައިޑީ ކާޑު ދިނުމަށް ފަހު، ވޯޓުލާން ނުދިއުން ކަމަށާއި އެ ތަނުގައި ދައްކާ ވާހަކަތައް ބޭރު ކޮށްފި ނަމަ "ކަނޑައި ވައްޓާލާނެ" ކަމަށް ބުނެ ވެސް އެ އޯޑިއޯގައި އިންޒާރު ދެ އެވެ.

"އޮޕްޝަންތަކެއް މި ދެނީ. އަހަރުމެން ބުނާ ބަސް ނާހާ މީހަކަށް އަހަރުމެންނަށް އެހީތެރިކަމެއް ވެވޭކަށް ނޯންނާނެ. ރާޑޯ އަކަށް ނޫން ވޯޓު ދެނީ، މި ދެނީ [އެމްޑީޕީ] ތިލަފަތަށް،" އެ އޯޑިއޯގައި ޒާހިރު ކަމަށް ބުނާ މީހާ ބުންޏެވެ.

އެ އޯޑިއޯ ލީކުވެ، އެތައް ބައެއްގެ ނުރުހުމާއި ފާޑުކިޔުން ސަރުކާރަށާއި އެމްޑީޕީ އަށް އަމާޒުވި ނަމަވެސް ބައި އިލެކްޝަންގެ ވޯޓުގެ ނަތީޖާ އިން ރާޝިދު މޮޅުވުމާ ހަމައަށް ހަނު ތިބި އެމްޑީޕީގެ ބައެއް އެކްޓިވިސްޓުން ވެސް މިހާރު ވަނީ ޒާހިރު މަގާމުން ދުރުކުރުމަށް ސޯޝަލް މީޑިއާގައި ގޮވަމުންނެވެ. އެކަމަކު، އިންތިހާބުގެ ނަތީޖާ އިއުލާންކުރުމާ ހިސާބަށް އެ އެކްޓިވިސްޓުން ރާޝިދާ ދެކޮޅަށް އެއްވެސް ވާހަކައެއް ނުދައްކަ އެވެ.

އެކަމާ ގުޅޭ ގޮތުން "މިހާރު" އިން ސުވާލު ކުރުމުން ފެނަކައިގެ އެމްޑީ މިއަދު ވިދާޅުވީ، އެމްޑީޕީ އަށް ވޯޓު ހޯދާނީ މީހުންގެ ލޯތްބާއި އޯގާތެރިކަމާއެކުގައި ކަމަށާއި ބިރު ދެއްކުމުގެ އަމަލުތަކެއް ފެނަކަ ކުންފުނީގެ މުވައްޒަފުންނެއް ނުހިންގާނެ ކަމަށެވެ.

"އެމްޑީޕީ އަށް ލިބޭ ވޯޓެއް ލިބެނީ ލޯބިން. ހިތުން ބޭނުންވެގެން ވޯޓެއް ނޫނީ އެމްޑީޕީ އަށް ނުލިބޭނެ. ފެނަކައަކީ މުވައްޒަފުންނަށް މަޖުބޫރު ކޮށްގެން ވޯޓު ހޯދާނެ ތަނެއް ނޫން. އަޅުގަނޑުމެންގެ މުވައްޒަފުން އެފަދަ ކަމެއް ނުކުރާނެ،" ކޮމަންޑޫ ދާއިރާގެ ބައި އިލެކްޝަންގެ ކެމްޕެއިނަށް އެ ދާއިރާ އަށް ވަޑައިގެންނެވި ގޮތަށް ފޯކައިދޫގައި މި ވަގުތު ހުންނެވި ސައީދު ވިދާޅުވި އެވެ.

ސައީދު ވިދާޅުވިގޮތުގައި، ޒާހިރުގެ އޯޑިއޯއެއް ކަމަށް ބުނެ، ސޯޝަލް މީޑިއާގައި އުޅޭ އޯޑިއޯގެ ސައްހަ ކަމާ މެދު ވެސް ސުވާލު އުފެދެ އެވެ. އަދި މީސްމީހުން ވަޒީފާ އިން ވަކިކުރުމުގެ ވިސްނުމަށް ވެސް އޭނާ ތާއީދެއް ނުކުރައްވަ އެވެ.

"އަޅުގަނޑަކަށް ހިއެއް ނުވޭ އެހެން އޯޑިއޯއެއް ލީކުވިއެކޭ ކިޔާފައި [ވަޒީފާތަކުން] ވަކިކުރުމަކީ ރަނގަޅު ވިސްނުމެއް ހެނެއް. އެހެން ވަކި ކުރަންޏާ އެމްޑީޕީގެ ތެރެއިން ވެސް ގިނަ ބަޔަކު ވަކި ކުރަންޖެހޭ،" ސައީދު ވިދާޅުވި އެވެ.

"އަޅުގަނޑަކަށް ހިއެއް ނުވޭ އެއީ ރަނގަޅު އޯޑިއޯއެއް ހެން ވެސް،" އޭނާ ވިދާޅުވި އެވެ.

އިންތިހާބުގެ ނަތީޖާ އިއުލާން ކުރުމާ ހަމައަށް މި މައްސަލައިގައި އެމްޑީޕީގެ މެމްބަރުން ހަނު ތިބި މައްސަލައިގައި އެމްއެންޕީގެ ނައިބު ރައީސް އަދި ވިލިމާލެ ދާއިރާގެ މެމްބަރު އަހުމަދު އުޝާމް ކުރެއްވި ޓުވީޓެއްގައި ވިދާޅުވީ، ފެނަކަ އިން ކުރި ގާނޫނާ ހިލާފު ކަންކަމާ ގުޅިގެން ވަކިކުރަންވީ އެ ކުންފުނިގެ އެމްޑީ ކަމަށެވެ.

"ފެނަކައިގެ އެމްޑީގެ އެންގުމަށް ނޫން ގޮތަކަށް ފެނަކައިގެ ވެރިން ކޮމަންޑޫ ދާއިރާ އަށް ގޮސް މުވައްޒަފުންނަށް ބިރު ނުދެއްކީސް. އެމްޑީޕީ އެކްޓިވިސްޓުން ވެސް އިންތިހާބު ނިމެންދެން އެކަމާ ބަހެއް ނުބުނޭ،" އެމްއެންޕީގެ ކެންޑިޑޭޓް އަބްދުލް ހަންނާންގެ ކެމްޕެއިންގައި ކޮމަންޑޫ ދާއިރާގައި ދުވަސްތަކެއް ހޭދަަކުރެއްވި އުޝާމް ވިދާޅުވި އެވެ.