ފައްޔާޒަށް ރައީސަށް ކިޔާ ވަރުގެ ހޫނު މަރުހަބާއެއް!

ށ. މިލަންދޫގެ މައި މަގުތަކުގައި ދިވެހި ގައުމީ ދިދަ އާއި އެމްޑީޕީގެ ދިދަތައް ޖަހައި، ކުދިބޮޑު އެންމެން ނަލަ ހެދިލައިގެން ނުކުމެ ތިބީ ރައީސް ނުވަތަ ނައިބު ރައީސްގެ އިންތިޒާރުގައެއް ނޫނެވެ. އެކަމަކު، މިއަދު ހަވީރު މި ރަށަށް އައި ކޮންމެ މީހެއްގެ ސިކުނޑި އަށް ވެސް ތަސްވީރު ނެގުނީ ގާތްގަނޑަކަށް އެހެންނެވެ. އެމްޑީޕީގެ ޗެއާޕާސަންގެ މަގާމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލަށް އޮތް ތާއީދު މިލަންދޫގެ މީހުން މިއަދު ދައްކައިދިނީ އެހާ ވެސް ލޯތްބާ އެކު އެވެ.

އިކޮނޮމިކް މިނިސްޓަރުގެ މަގާމާއެކު، ކެބިނެޓްގައި އެންމެ ނުފޫޒުގަދަ ކަމަށް ބުނާ ފައްޔާޒްގެ ކެމްޕެއިން ރަސްމީކޮށް މިރޭ ފެށުމަށް މިލަންދޫ އިހުތިޔާރު ކުރި ސަބަބު އޭނާ އަށް މަރުހަބާ ކިޔަން ނުކުމެ ތިބި މީހުންގެ އަދަދަށް ބެލުމުން ސާފެވެ. ރަށުގެ ބަނދަރު ސަރަހައްދު ނުވަތަ ސައިމާމަގުގެ އެއްކޮޅުގައި ހުރެ އަނެއްކޮޅަށް ބަލާއިރު، ސަފުގެ ކޮޅު ރަނގަޅަށް ނުފެންނަ ވަރަށް މީހުން ނުކުމެ ތިއްބެވެ. އެ މަގުގެ ދިގުމިނަކީ 1،152 ފޫޓު ކަމަށް ކަމަށް މިލަންދޫގެ މީހުން ބުނެ އެވެ.

ފައްޔާޒާއެކު، މި ކެމްޕެއިނުގައި އޭނާގެ ޓީމުގެ ބައެއް މެމްބަރުން ވެސް މިލަންދު އަށް ވަޑައިގެންނެވިއިރު، އެ ބޭފުޅުންގެ ބޮލުގައި ފުރަތަމަ އެޅުވީ ތާޖެކެވެ. ދެން ކޮންމެ ބޭފުޅެއްގެ ކަރުގައި މާފަތި އަޅުވައި އަތަށް މާބޮނޑިއެއް ދިނެވެ. މަރުހަބާ ކިޔަން އެއްވެ ތިބި ތުއްތު ކުދިން ތިބީ ވަރަށް ރީއްޗަށް ނަލަ ހައްދައިފަ އެވެ. އެހެން ބައެއް ޒުވާނުން ތިބީ ގައުމީ ފެންވަރުގެ ހަރަކާތަކަށް ތައްޔާރުވާހެން ސަގާފީ ހެދުން ލައިގެންނެވެ. ރަށަށް ހީވަނީ އީދެއް އައިސްގެން އުޅޭ ހެންނެވެ.

މިލަންދުއަކީ ފެށުނީއްސުރެ އެމްޑީޕީގެ ރަށެކެވެ. އެ ރަށުގައި އެމްޑީޕީގެ 880 މެމްބަރުން ތިބިއިރު 90 ޕަސެންޓަށް ވުރެ ގިނަ މީހުންގެ ތާއީދު އޮތީ އެ ޕާޓީއަށެވެ. ރަށުން ވާހަކަ ދައްކައިލެވޭ ކޮންމެ މީހަކު ވެސް ވަނީ ގާތްގަނޑަކަށް އެމްޑީޕީގެ މެމްބަރަކަށެވެ.

"ޔަގީނުން ވެސް ފައްޔާޒް މި އިންތިހާބުން މި ރަށުން އެކަނިވެސް 90 ޕަސެންޓް ނަގާނެ. އެކަމާ ޝައްކު ކުރާނެ އެއްވެސް ޖާގައެއް ނެތް. އެހާ ވަރަށް ތާއީދު އެބައޮތް،" ފައްޔާޒަށް މަރުހަބާ ކިޔަން ބަނދަރުމައްޗަށް ނުކުމެ ހުރި މެދުއުމުރުގެ މީހަކު ބުންޏެވެ.

"މި ރަށު މީހުން ފައްޔާޒު ދެކެ ލޯބިވާ އެންމެ ބޮޑު ސަބަބަކީ މެމްބަރު އަލީ ރިޒާ. އޭނާ ބުނި ކޮންމެ މީހަކަށް ރަށު މީހުން ވޯޓު އަޅާނެ."

ފައްޔާޒާއެކު މިލަންދު އަށް ރައްޔިތުންގެ މަޖިލީހުގެ ބައެއް މެމްބަރުންނާއި ސަރުކާރުގެ ކުންފުނިތަކުގެ ބައެއް އިސްވެރިން ވަޑައިގެންނެވިއިރު ބައެއް ބޭފުޅުންނަށް ވެސް ހައިރާންކަން ގެނެސްދިން އެއް ކަމަކީ ފައްޔާޒަށް މަރުހަބާ ކިޔަން ނުކުތް މީހުންގެ އަދަދެވެ.

"މިއީ ގައުމީ ކަމެއް ނޫން ވިއްޔާ. އެމްޑީޕީގެ އެތެރޭގެ އިންތިހާބެއްގައި މިހާ ގިނަ ބަޔަކު އެއް ރަށަކުން ނުކުމެ އެއް ކެންޑިޑޭޓަކަށް ތާއީދު އޮތްކަން ދައްކައިލީމާ މަންޒަރު ވަރަށް ސާފު. އަޅުގަނޑު ބުނާނީ މިއީ މެމްބަރު ރިޒާގެ މަސައްކަތޭ. އޭނާ އަށް އޮތް ތާއީދު މި ރަށުން މި ފެންނަނީ. މި މަންޒަރަށް ބަލާއިރު 90 ޕަސެންޓަށް ވުރެ މަތިން މި ރަށުން ފައްޔާޒު ނަގާނެ،" ފައްޔާޒާއެކު މިލަންދު އަށް ވަޑައިގެންނެވި ތިނަދޫ އުތުރު ދާއިރާގެ މެމްބަރު މުހައްމަދު ސަނީފް ވިދާޅުވި އެވެ.

މެމްބަރު އަލީ ރިޒާ "މިހާރު" އަށް މިލަންދޫން އޮތް އެންމެ ބޮޑު ޔަގީންކަމަކީ މި ރަށުން އެކަނި ވެސް 90 ޕަސެންޓަށް ވުރެ މަތިން ފައްޔާޒު އިންތިހާބު ކާމިޔާބު ކުރައްވާނެ ކަމެވެ.

"އެއްވެސް ބޭފުޅަކު އެ ކަމަށް ޝައްކު ނުކުރައްވާ. މި ރަށަކީ އަބަދުވެސް އެމްޑީޕީ ރަށެއް. ފައްޔާޒަށް މި ރަށުގެ އެމްޑީޕީގެ މެމްބަރުން ބޮޑު އަދަދަކުން ވޯޓު އަޅާނެ،" އޭނާ ވިދާޅުވި އެވެ.

ފައްޔާޒު އިޖާބަ ދެއްވީ މިލަންދޫގެ މީހުން ބޭނުންވާ ގޮތަށް

އަންނަ އޭޕްރީލް 16 ގައި ބާއްވާ އެމްޑީޕީގެ ޗެއާޕަސަންގެ އިންތިހާބަށް ވާދަކުރައްވާ ފައްޔާޒުގެ ކެމްޕެއިން މެނޭޖަރު އިބްރާހިމް ވަހީދު ވިދާޅުވީ، ފައްޔާޒުގެ ކެމްޕެއިން ރަސްމީކޮށް ފެށުމަށް މިލަންދޫ ކަނޑައެޅީ ރަށުގެ މީހުންގެ އެދުމަކަށް ކަމަށެވެ.

"މިލަންދުއަކީ އުތުރުން އެމްޑީޕީ އަށް އެންމެ ބޮޑު ތާއީދު އޮތް އެެއް ރަށް. އެހެންވެ، ރަށުގެ މީހުން ވަރަށް ބޮޑަށް އެދުނީ މި ރަށުގައި ކެމްޕެއިން ފަށައި ދިނުމަށް. އެކަން އަޅުގަނޑުމެން މިރޭ މި ކޮށްދެނީ،" ރަށުގެ ބަނދަރު ސަރަހައްދުގައި ބާއްވާ ފައްޔާޒުގެ ކެމްޕެއިން އިވެންޓް ރަސްމީކޮށް ފެށުމުގެ ހަފުލާ އަށް އިޝާރާތް ކުރައްވައި އިބްރާހިމް ވަހީދު ވިދާޅުވި އެވެ.

ފައްޔާޒާއެކު މާލެ އިން ވެސް ބޮޑު ޓީމެއް މި ރަށަށް އައެވެ. އިބްރާހިމް ވަހީދު ވިދާޅުވި ގޮތުގައި ރައްޔިތުންގެ މަޖިލީހުގެ 30 މެމްބަރަކާއި އެމްޑީޕީގެ ގައުމީ މަޖިލީހުގެ 45 ބޭފުޅަކު މިރޭގެ ޖަލްސާގައި ބައިވެރިވެވަޑައިގަންނަވާނެ އެވެ.

"އަޅުގަނޑުމެން މި ރަށަށް އައީމާ ފެނުނު ތާއީދު އޮތް ވަރަށް. މަރުހަބާ ކިޔަން ނުކުމެ ތިބި މީހުންނާ ވަރަށް އަވަސްކޮށް ސަލާންކޮށް ނިންމައިލަން ވެސް 45 މިނިޓް ވަރު ނެގި. ބޮޑުމަގުގެ އެއްކޮޅުން އަނެއްކޮޅަށް އެ އޮތީ ޖަމާވެފައި ތިބި މީހުން ފެންނަން. މި ތާއީދާއެކު ފައްޔާޒް މި ރަށުން 85-90 ޕސެންޓް ނަންގަވާނެ ކަމަށް މި ބަލަނީ،" އިބްރާހިމް ވަހީދު ވިދާޅުވި އެވެ.

ފައްޔާޒުގެ ތާއީދު މިލަންދޫގައި ބޮޑުވި އެއް ސަބަބަކީ އޭނާގެ ގާތް މީހުން ބުނާގޮތުގައި މި މަހުގެ ފަސްވަނަ ދުވަހު ބޭއްވި ކޮމަންޑޫ ދާއިރާގެ ބައި އިލެކްޝަނެވެ. އެ އިންތިހާބާ ގުޅިގެން ފައްޔާޒު ށ. އަތޮޅަށް ވަޑައިގަތުން ގިނަވުމާއެކު ގުޅުން އިތުރަށް ބަދަހި ވެސް ވީ އެވެ. އެހެންވެ. ށ. އަތޮޅުގެ އެހެން ބައެއް ރަށްރަށުން ވެސް މިލަންދޫގައި މިރޭ ބޭއްވާ ޖަލްސާ އަށް ގިނަ ބަޔަކު އަންނާނެ ކަމަށް ޖަލްސާ އިންތިޒާމުކުރާ ފަރާތްތަކުން ބުނެ އެވެ.

"ތިއީ އަދި މިލަންދޫން ފެނުނު މަންޒަރު. ކުރިއަށް އޮތް ތަނުގައި ތިފަދަ އެތައް ކަމެއް ފެންނާނެ،" ފައްޔާޒުގެ ކެމްޕެއިން ރޭވުމުގައި އިސްކޮށް އުޅުއްވާ އޮފިޝަލަކު ވިދާޅުވި އެވެ.