އެމްޑީޕީގެ އެންމެ އިސްފަރާތަކީ ޗެއާޕާސަން ކަމަށް ކަނޑައަޅައި، ޕާޓީގެ ހިންގުމަށް ބޮޑެތި ބަދަލުތަކެއް ގެންނަ ގޮތަށް ކުރީގެ ޗެއާޕާސަން ފައްޔާޒު އިސްމާއިލް ހުށަހެޅުއްވި އަސާސީ ގަވައިދުގެ އިސްލާހުތައް ކޮންގްރެސްއިން ފާސްކޮށްފި އެވެ.
ފައްޔާޒު ހުށަހެޅުއްވި އިސްލާހުތަކާ މެދު ބަހުސްކުރުމަށް ފަހު މިއަދު ކޮންގްރެސްގައި ނެގި ވޯޓުގައި އެ އިސްލާހުތައް ފާސްކުރަން ފެންނަ ކަމަށް 546 މަންދޫބުން ވޯޓު ދެއްވި އެވެ. ފާސްކުރަން ފެންނަ ކަމަށް ވޯޓު ނުދެއްވީ 19 މަންދޫބުންނެވެ.
ޗެއާޕާސަން ކަމުގައި ފައްޔާޒު ހުންނެވިއިރު އެކި ރަށްރަށަށް ދަތުރުކުރައްވައި އާންމު މެންބަރުންގެ މަޝްވަރާގެ މަތިން އޭނާ ވަނީ އެމްޑީޕީގެ މުޅި އަސާސީ ގަވައިދު ބަދަލުކުރަން އިސްލާހު ހުށަހަޅުއްވައިފަ އެވެ. ޕާޓީން މިހާރު އަމަލުކުރަމުންދާ، 2022 ވަނަ އަހަރު ފާސްކޮށްފައިވާ އަސާސީ ގަވާއިދަށް ބަދަލުތަކެއް ގެންނަން ފުރުސަތު ހުޅުވާލުމުން އެކަން ކުރެއްވީ ވެސް ފައްޔާޒު އެކަންޏެވެ.
އޭގެފަހުން ފައްޔާޒުގެ އިސްލާހުތަކަށް އިސްލާހު ހުށަހަޅަން އެމްޑީޕީން ހުޅުވާލި އެވެ. އެ ފުރުސަތުގައި އެމްޑީޕީގެ ޕާލިމެންޓްރީ ގްރޫޕްގެ މެންބަރު އިބްރާހިމް ނާޒިލު އިސްލާހެއް ހުށަހެޅުއްވި އެވެ. އެ އިސްލާހު ވެސް މިއަދުގެ ކޮންގްރެސްގައި ވަނީ ފާސްކޮށްފަ އެވެ.
ފައްޔާޒު ހުށަހެޅުއްވި އަސާސީ ގަވައިދުގެ މުހިންމު ކަންކަން
އާ ގަވައިދުގައިވާ ގޮތުން ޗެއާޕާސަން ހިމެނޭ ގޮތަށް ސެކްރެޓޭރިއަޓްގެ މުވައްޒަފުން އެތެރޭގެ އިންތިހާބުތަކުގައި ވާދަކުރުމާއި ކެމްޕެއިންތަކުގައި އަމަލީ ގޮތުން ބައިވެރިވުމަކީ މަނާކަމެކެވެ.
ގަވައިދުގެ ޑްރާފްޓްގައި ބުނަނީ:
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގައި ވާދަކުރަން ބޭނުންވާ ނަމަ އެ އިންތިހާބެއް ބޭއްވުމުގެ މަދުވެގެން އެއް މަސް ދުވަހުގެ ކުރިން އެކަން ލިޔުމުން ޗެއާޕާސަނަށް އަންގަން ޖެހޭނެ.
- އެފަދަ އެންގުމެއް މުވައްޒަފަކު އަންގައިފި ނަމަ އެ އިންތިހާބެއް ނިމެންދެން އޭނާ މަސްއޫލިއްޔަތަކުން ދުރުކުރަން ޖެހޭނެ އަދި ވާދަކުރި މަގާމަށް އިންތިހާބުވެއްޖެ ނަމަ އޭނާގެ ސެކްރެޓޭރިއަޓްގެ ވަޒީފާއިން ވަކިވާނެ.
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގެ ކެންޑިޑޭޓަކަށް ތާއީދުކޮށް އެކަން ހާމަކޮށް އަމަލީ ގޮތުން ކެމްޕެއިނުގައި މަސައްކަތްކޮށްގެން ނުވާނެ.
- ސެކްރެޓޭރިއަޓްގެ މުވައްޒަފެއްގެ މަސްލަހަތު ފުށުއަރާ ފަދަ މީހެއް އިންތިހާބެއްގައި ވާދަކުރާ ނަމަ ނުވަތަ އިންތިހާބުގެ އިންސާފުވެރިކަމާ މެދު ސުވާލު އުފެދިދާނެ ފަދަ ހާލަތެއް އޮތް ނަމަ އެ މުވައްޒަފަކު ވަގުތީ ގޮތުން މަގާމުގެ މަސްއޫލިއްޔަތު އަދާކުރުން މަނާކުރުމުގެ ބާރު، އެ އިންތިހާބެއް ރާވާ ހިންގާ ކޮމިޓީއަށް ލިބިގެންވޭ
އެމްޑީޕީގެ އާ އަސާސީ ގަވައިދުގެ އިސްލާހުގައިވާ ގޮތުން މިހާރު އަމަލުކުރަމުންދާ ގަވައިދުގައި އޮތް މުހިންމު މާއްދާއެއް ވަނީ އުނިކޮށްފަ އެވެ. އެއީ ޕާޓީ ވެރިކަމުގައި އޮންނަ ހާލަތްތަކުގައި ޕާޓީގެ އިސްވެރިޔަކީ ރައީސުލްޖުމްހޫރިއްޔާ ކަމަށް ކަނޑައަޅާފައި އޮތް މާއްދާ އެވެ.
އޭގެ ބަދަލުގައި އާ ޑްރާފްޓްގައިވާ ގޮތުން ޕާޓީގެ އެންމެ އިސް ފަރާތަކީ ޗެއާޕާސަން އެވެ. އަދި ޗެއާޕާސަން ކަން އަދާކުރައްވާ ބޭފުޅަކު ދައުލަތުގެ މުސާރައެއް ލިބޭ އެހެން މަގާމެއް އަދާކޮށްގެން ނުވާނެ އެވެ. އޭގެ ތެރޭގައި ރައިސުލްޖުމްހޫރިއްޔާގެ މަގާމު ވެސް ހިމެނެ އެވެ.
އާ ގަވައިދުގެ ޑްރާފްޓްގައި ބުނެފައިވަނީ ރައީސުލްޖުމްހޫރިއްޔާގެ މަގާމަށް އެމްޑީޕީގެ ކެންޑިޑޭޓަކު އިންތިހާބުވެއްޖެ ނަމަ، ސަރުކާރު އެކުލަވާލުމުގައި އާއި މުހިންމު ސިޔާސަތުތައް ކަނޑައެޅުމުގައި ޕާޓީގެ ގައުމީ މަޖިލީހާ މަޝްވަރާ ކުރަންޖެހޭނެ ކަމަށް އެއްބަސްވުމެއްގައި ސޮއިކުރަން ޖެހޭނެ ކަމަށެވެ.
އަދި ޕާޓީ ވެރިކަމުގައި އޮންނައިރު ސަރުކާރާއި ޕާޓީގެ ގުޅުން ރަނގަޅުކުރުމަށްޓަކައި ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން ހަދަން ޖެހޭނެ ކަމަށް ޑްރާފްޓްގައި ބަޔާންކޮށްފައިވެ އެވެ.
ޕާޓީގެ ލީޑަޝިޕާ ގުޅޭ އެހެން ބަދަލުތަކެއް ވެެސް އާ ގަވައިދުގެ ޑްރާފްޓްގައި ހިމަނާފައިވާއިރު، ރައީސް އާއި ނައިބު ރައީސްގެ މަގާމު ވަނީ އުވާލައިފަ އެވެ. އަދި، އޭގެ ބަދަލުގައި ޗެއާޕާސަންގެ ނައިބު (ސިޔާސީ) ގެ މަގާމު ވަނީ އިތުރުކޮށްފަ އެވެ.
މިހާރު ތިބެނީ ޗެއާޕާސަންގެ ނައިބު މާލީ އާއި އިދާރީ އެވެ. މި ތިން މަގާމުގެ ތެރެއިން އެއް މަގާމަކީ އަންހެން ބޭފުޅަކަށްވާން ޖެހޭނެ ކަމަށް ބަޔާންކޮށްފައިވެ އެވެ.