އެމްޑީޕީގެ ވެރިކަމެއް އޮންނަ ހާލަތްތަކުގައި ވެސް ޕާޓީގެ އެންމެ އިސްވެރިޔަކީ ޗެއާޕާސަން ކަމަށް ކަނޑައަޅައި، ރައީސްކަމުގައި ހުންނަވާ ބޭފުޅެއްގެ އިސް މުޝީރަކަށް ޗެއާޕާސަން އައްޔަން ކުރަން ޖެހޭ ގޮތަށް އަސާސީ ގަވައިދަށް އިސްލާހު ހުށަހަޅައިފި އެވެ.
މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްގައި އެ ޕާޓީން މިހާރު އަމަލުކުރަމުންދާ، 2022 ވަނަ އަހަރު ފާސްކޮށްފައިވާ އަސާސީ ގަވާއިދަށް ބަދަލުތަކެއް ގެންނަން ވަނީ ނިންމައިފަ އެވެ. އެކަމާ މެދު ބަހުސް ކުރުން ހޮނިހިރު ދުވަހުގެ ހެނދުނަށް ތާވާލުކޮށްފައިވާއިރު ވޯޓަށް އެހުން އޮތީ އެ ދުވަހުގެ ރެ އެވެ.
އެމްޑީޕީގެ އާ އަސާސީ ގަވައިދުގެ ޑްރާފްޓް އެ ޕާޓީން އާންމުކޮށްފައިވާއިރު، މިހާރު އަމަލުކުރަމުންދާ ގަވައިދުގައި އޮތް މުހިންމު މާއްދާއެއް ވަނީ އުނިކޮށްފަ އެވެ. އެއީ ޕާޓީ ވެރިކަމުގައި އޮންނަ ހާލަތްތަކުގައި ޕާޓީގެ އިސްވެރިޔަކީ ރައީސުލްޖުމްހޫރިއްޔާ ކަމަށް ކަނޑައަޅާފައި އޮތް މާއްދާ އެވެ.
އޭގެ ބަދަލުގައި އާ ޑްރާފްޓްގައިވާ ގޮތުން ޕާޓީގެ އެންމެ އިސް ފަރާތަކީ ޗެއާޕާސަން އެވެ. އަދި ޗެއާޕާސަން ކަން އަދާކުރައްވާ ބޭފުޅަކު ދައުލަތުގެ މުސާރައެއް ލިބޭ އެހެން މަގާމެއް އަދާކޮށްގެން ނުވާނެ އެވެ. އޭގެ ތެރޭގައި ރައިސުލްޖުމްހޫރިއްޔާގެ މަގާމު ވެސް ހިމެނެ އެވެ.
އާ ގަވައިދުގެ ޑްރާފްޓްގައި ބުނެފައިވަނީ ރައީސުލްޖުމްހޫރިއްޔާގެ މަގާމަށް އެމްޑީޕީގެ ކެންޑިޑޭޓަކު އިންތިހާބުވެއްޖެ ނަމަ، ސަރުކާރު އެކުލަވާލުމުގައި އާއި މުހިންމު ސިޔާސަތުތައް ކަނޑައެޅުމުގައި ޕާޓީގެ ގައުމީ މަޖިލީހާ މަޝްވަރާ ކުރަންޖެހޭނެ ކަމަށް އެއްބަސްވުމެއްގައި ސޮއިކުރަން ޖެހޭނެ ކަމަށެވެ.
އަދި ޕާޓީ ވެރިކަމުގައި އޮންނައިރު ސަރުކާރާއި ޕާޓީގެ ގުޅުން ރަނގަޅުކުރުމަށްޓަކައި ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން ހަދަން ޖެހޭނެ ކަމަށް ޑްރާފްޓްގައި ބަޔާންކޮށްފައިވެ އެވެ.
އަސާސީ ގަވައިދަށް މި ބަދަލުތައް ގެނެސްފިނަމަ، ޕާޓީގެ ޗެއާޕާސަންގެ މަގާމު މިހާރަށް ވުރެ ބާރުގަދަވެގެންދާނެ އެވެ.
ޕާޓީގެ ލީޑަޝިޕްއާ ގުޅޭ އެހެން ބަދަލުތަކެއް ވެެސް އާ ގަވައިދުގެ ޑްރާފްޓްގައި ހިމަނާފައިވާއިރު، ރައީސް އާއި ނައިބު ރައީސްގެ މަގާމު ވަނީ އުވާލައިފަ އެވެ. އަދި، އޭގެ ބަދަލުގައި ޗެއާޕާސަންގެ ނައިބު (ސިޔާސީ) ގެ މަގާމު ވަނީ އިތުރުކޮށްފަ އެވެ.
މިހާރު ތިބެނީ ޗެއާޕާސަންގެ ނައިބު މާލީ އާއި އިދާރީ އެވެ. މި ތިން މަގާމުގެ ތެރެއިން އެއް މަގާމަކީ އަންހެން ބޭފުޅަކަށްވާން ޖެހޭނެ ކަމަށް ބަޔާންކޮށްފައިވެ އެވެ.
އާ ގަވައިދުގައިވާ ގޮތުން ވެސް ޗެއާޕާސަން ހިމެނޭ ގޮތަށް ސެކްރެޓޭރިއަޓްގެ މުވައްޒަފުން އެތެރޭގެ އިންތިހާބުތަކުގައި ވާދަކުރުމާއި ކެމްޕެއިންތަކުގައި އަމަލީ ގޮތުން ބައިވެރިވުމަކީ މަނާކަމެކެވެ.
ގަވައިދުގެ ޑްރާފްޓްގައި ބުނަނީ:
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގައި ވާދަކުރަން ބޭނުންވާ ނަމަ އެ އިންތިހާބެއް ބޭއްވުމުގެ މަދުވެގެން އެއް މަސް ދުވަހުގެ ކުރިން އެކަން ލިޔުމުން ޗެއާޕާސަނަށް އަންގަން ޖެހޭނެ.
- އެފަދަ އެންގުމެއް މުވައްޒަފަކު އަންގައިފި ނަމަ އެ އިންތިހާބެއް ނިމެންދެން އޭނާ މަސްއޫލިއްޔަތަކުން ދުރުކުރަން ޖެހޭނެ އަދި ވާދަކުރި މަގާމަށް އިންތިހާބުވެއްޖެ ނަމަ އޭނާގެ ސެކްރެޓޭރިއަޓްގެ ވަޒީފާއިން ވަކިވާނެ.
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގެ ކެންޑިޑޭޓަކަށް ތާއީދުކޮށް އެކަން ހާމަކޮށް އަމަލީ ގޮތުން ކެމްޕެއިނުގައި މަސައްކަތްކޮށްގެން ނުވާނެ.
- ސެކްރެޓޭރިއަޓްގެ މުވައްޒަފެއްގެ މަސްލަހަތު ފުށުއަރާ ފަދަ މީހެއް އިންތިހާބެއްގައި ވާދަކުރާ ނަމަ ނުވަތަ އިންތިހާބުގެ އިންސާފުވެރިކަމާ މެދު ސުވާލު އުފެދިދާނެ ފަދަ ހާލަތެއް އޮތް ނަމަ އެ މުވައްޒަފަކު ވަގުތީ ގޮތުން މަގާމުގެ މަސްއޫލިއްޔަތު އަދާކުރުން މަނާކުރުމުގެ ބާރު، އެ އިންތިހާބެއް ރާވާ ހިންގާ ކޮމިޓީއަށް ލިބިގެންވޭ.