އެމްޑީޕީގެ އެތެރޭގެ އިންތިހާބެއްގައި އިންސާފުވެރިކަމާ މެދު ސުވާލު އުފެދޭ ހާލަތެއް އޮވެއްޖެ ނަމަ އެ ޕާޓީގެ ޗެއާޕާސަން ހިމެނޭ ގޮތަށް އޮފީހުގެ މުވައްޒަފުން މަސްއޫލިއްޔަތުން ވަގުތީ ގޮތުން އެކެހެރި ކުރެވޭ ގޮތް ހަދަން އަސާސީ ގަވާއިދަށް އިސްލާހު ހުށަހަޅައިފި އެވެ.
މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްގައި އެ ޕާޓީން މިހާރު އަމަލުކުރަމުންދާ، 2022 ވަނަ އަހަރު ފާސްކޮށްފައިވާ އަސާސީ ގަވާއިދަށް ބަދަލުތަކެއް ގެންނަން ވަނީ ނިންމައިފަ އެވެ.
އޭގެ ތެރެއިން އެންމެ ފާހަގަކޮށްލެވޭ ބަދަލަކަށް އޮތީ ޕާޓީގެ މުވައްޒަފުން އެތެރޭގެ އިންތިހާބުތަކުގައި ވާދަކުރުމާއި ތާއީދުކުރުމާ ގުޅޭ ގޮތުން އޮތް މާއްދާ އެވެ.
މިހާރު އަމަލުކުރަމުންދާ އަސާސީ ގަވައިދުގައިވާ ގޮތުން، ޗެއާޕާސަން ހިމެނޭ ގޮތަށް ޕާޓީގެ ސެކްރެޓޭރިއަޓްގައި ވަޒީފާ އަދާކުރާ މުވައްޒަފުންނަކީ ޕާޓީގެ ހުރިހާ މެންބަރުންނަށް ވެސް ހަމަހަމަކަމާއެކު ހިދުމަތް ދޭންޖެހޭ ބަޔަކަށް ވާތީ އެއްވެސް މުވައްޒަފަކު ޕާޓީގެ އެތެރޭގެ އެއްވެސް އިންތިހާބެއްގައި ބައިވެރިވެ ނުވަތަ އެތެރޭގެ އިންތިހާބުތަކުގައި ވާދަކުރާ ފަރާތްތަކަށް ތާއީދު ކުރާކަން ހާމަކޮށް އަމަލީ ގޮތުން މަސައްކަތް ކޮށްގެން ނުވާނެ އެވެ.
އަންނަ ހޮނިހިރު ދުވަހު ފާސްކުރަން ތައްޔާރުވަމުން އަންނަ އާ އަސާސީ ގަވާއިދުގައި މި މާއްދާ ވަނީ އިތުރަށް ތަފުސީލުކޮށް އާ ކަންކަން ހިމަނައިފަ އެވެ.
އެގޮތުން އާ ގަވައިދުގައިވާ ގޮތުން ވެސް ޗެއާޕާސަން ހިމެނޭ ގޮތަށް ސެކްރެޓޭރިއަޓްގެ މުވައްޒަފުން އެތެރޭގެ އިންތިހާބުތަކުގައި ވާދަކުރުމާއި ކެމްޕެއިންތަކުގައި އަމަލީ ގޮތުން ބައިވެރިވުމަކީ މަނާކަމެކެވެ.
ގަވައިދުގެ ޑްރާފްޓްގައި ބުނަނީ:
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގައި ވާދަކުރަން ބޭނުންވާ ނަމަ އެ އިންތިހާބެއް ބޭއްވުމުގެ މަދުވެގެން އެއް މަސް ދުވަހުގެ ކުރިން އެކަން ލިޔުމުން ޗެއާޕާސަނަށް އަންގަން ޖެހޭނެ.
- އެފަދަ އެންގުމެއް މުވައްޒަފަކު އަންގައިފި ނަމަ އެ އިންތިހާބެއް ނިމެންދެން އޭނާ މަސްއޫލިއްޔަތަކުން ދުރުކުރަން ޖެހޭނެ އަދި ވާދަކުރި މަގާމަށް އިންތިހާބުވެއްޖެ ނަމަ އޭނާގެ ސެކްރެޓޭރިއަޓްގެ ވަޒީފާއިން ވަކިވާނެ.
- ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގެ ކެންޑިޑޭޓަކަށް ތާއީދުކޮށް އެކަން ހާމަކޮށް އަމަލީ ގޮތުން ކެމްޕެއިނުގައި މަސައްކަތްކޮށްގެން ނުވާނެ.
- ސެކްރެޓޭރިއަޓްގެ މުވައްޒަފެއްގެ މަސްލަހަތު ފުށުއަރާ ފަދަ މީހެއް އިންތިހާބެއްގައި ވާދަކުރާ ނަމަ ނުވަތަ އިންތިހާބުގެ އިންސާފުވެރިކަމާ މެދު ސުވާލު އުފެދިދާނެ ފަދަ ހާލަތެއް އޮތް ނަމަ އެ މުވައްޒަފަކު ވަގުތީ ގޮތުން މަގާމުގެ މަސްއޫލިއްޔަތު އަދާކުރުން މަނާކުރުމުގެ ބާރު، އެ އިންތިހާބެއް ރާވާ ހިންގާ ކޮމިޓީއަށް ލިބިގެންވޭ
މި އިސްލާހު އަސާސީ ގަވާއިދުގައި ހިމަނަން މަސައްކަތް ކުރަމުންދާއިރު، އެމްޑީޕީގެ ޗެއާޕާސަންގެ މަގާމުގައި ހުންނެވި ކުރީގެ ރައީސް މުހައްމަދު ނަޝީދު ގެންދަވަނީ ޕާޓީގެ ރިޔާސީ ޕްރައިމަރީގައި ވާދަކުރައްވާކަން އިއުލާން ކުރައްވާފައިވާ ކުރީގެ ޗެއާޕާސަން ފައްޔާޒު އިސްމާއިލުގެ ކެމްޕެއިންގައި ބައިވެރިވެވަޑައިގަންނަވަމުންނެވެ.
ފައްޔާޒަށް ތާއިދުކުރައްވައި އޭނާ އިންތިހާބު ކުރައްވަން މަސައްކަތް ކުރައްވާނެ ކަމަށް ނަޝީދު ވިދާޅުވަމުން ގެންދަވާއިރު ޗެއާޕާސަންގެ ނައިބުގެ މަގާމުގައި ހުންނެވި މުހައްމަދު ޝިފާޒު ވެސް އެ ކެމްޕެއިންގައި ބައިވެރިވެވަޑައިގަންނަވަ އެވެ.
ބެލެވޭ ގޮތުގައި ސިޔާސީ އެކި ފެކްޝަންތައް އޮތް އެމްޑީޕީގެ އަސާސީ ގަވައިދަށް މި ބަދަލު ގެންނަން މަސައްކަތް ކުރަނީ ފައްޔާޒުގެ ކެމްޕެއިންގައި ނަޝީދު ބައިވެރިވެވަޑައިގަތުން ހުއްޓުވުމަށެވެ.
ނަޝީދު މީގެކުރިން ވިދާޅުވެފައިވާ ގޮތުގައި ޗެއާޕާސަން ކަމުގައި ހުންނަވައިގެން ރިޔާސީ ރޭހަށް ނުކުތުމަކީ އެންމެ ރަނގަޅު ކަމެއް ކަމަށް ގަބޫލުނުކުރައްވާ ކަމަށެވެ.
ފައްޔާޒުގެ އިތުރުން ޕާޓީގެ ރިޔާސީ ޓިކެޓް ހޯދަން އިންތިހާބަށް ނުކުންނާނެ ކަން މިހާތަނަށް އިއުލާން ކުރައްވާފައިވަނީ އެމްޑީޕީގެ ކުރީގެ ރައީސް އަބްދުﷲ ޝާހިދާއި ކުރީގެ ނައިބު ރައީސް ފައިސަލް ނަސީމް އަދި ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދެވެ.