ޕީޕީއެމުން ވަކިކުރީ އިދިކޮޅު ލީޑަރު، އަދި ކުރީގެ ރައީސް އަބްދުﷲ ޔާމީން ރިޔާސީ އިންތިހާބުގައި ވާދަކުރެއްވުމާ ދެކޮޅަށް އެ ޕާޓީގެ ތެރޭގައި ހިނގާ ކަންކަން ފެންމަތި ކުރެއްވުމުން ކަމަށާއި އަދިވެސް އެ މަސައްކަތް ހިނގަމުންދާ ކަމަށް މާލޭ ސިޓީގެ ވިލިމާލެ ދާއިރާގެ ކައުންސިލަރު ނަހުލާ އަލީ އަނެއްކާ ވެސް ތުހުމަތު ކުރައްވައިފި އެވެ.
ނަހުލާ ވަކިކުރީ ޕީޕީއެމުން ބުނެފައިވާ ގޮތުގައި، ޕާޓީގެ އަސާސީ ގަވާއިދާ ހިލާފު އަމަލުތަކެއް ހިންގެވުމުންނެވެ. އެއް ކަމަކަށް، ވިލިމާލެ ދާއިރާ އަށް ޕީޕީއެމުން ނެރުނު ކެންޑިޑޭޓް ފާތުމަތު ނާޒިމާއާ ދެކޮޅަށް މަސައްކަތް ކުރެއްވުމެވެ. ނަހުލާ ވޯޓު ހޯދައިދޭން މަސައްކަތް ކުރެއްވީ އެ ގޮނޑި އަށް ކުރިމަތިލެއްވި އެމްއެންޕީގެ ކެންޑިޑޭޓަށް ކަމުގެ ސާފު ހެކި ހުރި ކަމަށް ޕީޕީއެމުން ބުންޏެވެ.
މި ތުހުމަތުތަކުގެ މައްޗަށް، ނަހުލާ ތަކުރާރުކޮށް ދައްކަވަނީ ރައީސް ޔާމީނާ ދެކޮޅަށް ޕާޓީގައި ބަޔަކު އުޅުމެވެ.
"ރައީސް ޔާމީނަށް ތާއީދުކުރާ ބަޔަކު ބޭރުކޮށް ރައީސް ޔާމީނަށް ނިކަމެތިކަން ދޭން ބަޔަކު ޕީޕީއެމްގެ ތެރޭގައި މަސައްކަތް ކުރޭ، މީ ހަގީގަތް،" ނަހުލާ ވިދާޅުވި އެވެ.
"އެ ބޭފުޅުންގެ ރަނިންމޭޓް ސުޖާއަކީ. މި ވާހަކަ ހަގީގަތަށް ދައްކަން ކެރުނީ އަޅުގަނޑަށް. އެ ބަޔަކަށް ރަނގަޅީ ރައީސް ޔާމީނަށް ވާދަ ނުކުރެވުނިއްޔާ. ވެރިކަމުގެ ދަހިވެތި ކަމުގައި."
ޕީޕީއެމްގެ މެމްބަރުންގެ އިތުރުން މުޅި ރާއްޖެ ވެސް ބޭނުން ވަނީ ރައީސް ޔާމީން ވެރިކަމަށް ގެންނަން. އެހެންވީމާ އެމަނިކުފާނާ ދެކޮޅަށް ޕާޓީގެ ތެރެއިން މަސައްކަތެއް ނުކުރާނެ. ނަހުލާ އެ ކުރައްވާ ތުހުމަތު ބަލަން ކޮމިޓީއަށް ހުށަހަޅުއްވާފައެއް ވެސް ނެތް. -- ތޮލާލް
މާލެ ސިޓީ ކައުންސިލްގައި ވިލިމާލެ ދާއިރާ ތަމްސީލްކުރައްވާ އަދި ޕީޕީއެމްގެ ހަރަކާތްތަކުގައި ވަރަށް އިސް ދައުރެއް އަދާކުރައްވާ މެމްބަރު އިބްރާހިމް ޝުޖާއު (ސުޖާ)ގެ އިތުރުން ޕާޓީގެ ތެެރެއިން ޔާމީނާ ދެކޮޅަށް އުޅުއްވަނީ ކޮން ބައެއް ކަމެއް ނަހުލާ ވިދާޅެއް ނުވި އެވެ. ރަސްމީކޮށް ނަންތައް ޕާޓީ އަށް ވެސް ހުށައެއްނާޅުއްވަ އެވެ.
ނަހުލާގެ ތުހުމަތުތައް:
- ޔާމީން ނޫން ބޭފުޅަކު ވެރިކަމަށް ގެންނަން ޕާޓީން ބަޔަކު މަސައްކަތްކުރުން.
- އިސްކޮށް އުޅުއްވާ ކަމުގެ ތުހުމަތު އެޅުވީ ސުޖާއަށް
- އަޑީގައި ބަޔަކު ތިބި ކަމަށް ވިދާޅުވޭ.
- އެކަމުގައި އޭނާއަށް ބިރުދައްކައި އިންޒާރުތައް ދެމުންދާ ކަމަށް.
- އެއީ، އޭނާ އޮފީހަށް ނުކުންނަން ވެސް ބިރުވެރިވާ ފަދަ މާހައުލެއް ކަމަށް.
- ރައީސް ޔާމީނަކީ އަންހެނުންނަށް ފުރައްސާރަކުރަން ފުރުސަތު ދެއްވާ ލީޑަރެއް ނޫން ކަމަށާއި އެކަން ވެސް ކުރަމުންދަނީ އެމަނިކުފާނާ ދެކޮޅު މީހުން ކަަމަށް ނަހުލާ ވިދާޅުވި.
"ޔާމީން ނޫން ގިބްލައެއް ނެތް، ނަހުލާ އުޅެނީ ސަމާލުކަން ހޯދަން"
ޔާމީނާ ދެކޮޅު ހަރަކާތުގައި އިސްކޮށް އުޅުއްވާ ކަމަށް ނަހުލާ ކުރެއްވި ތުހުމަތު ސުޖާ ދޮގުކުރެއްވި އެވެ.
އޭނާ ވިދާޅުވި ގޮތުގައި ނަހުލާގެ ހަގީގަތެއް އެކުލެވިގެން ނުވާ ވާހަކަތަކުގައި އޮތީ ސަމާލުކަން ހޯދުމެވެ. ޕީޕީއެމްގެ އެއްވެސް މެމްބަރަކު ޔާމީނާ ދެކޮޅަށް އެއްވެސް ކަމެއް ނުކުރާނެ ކަމަށް ވިދާޅުވި އެވެ.
"އެއްވެސް ހަގީގަތެއް ނެތް ތުހުމަތުތަކެއް. އަޅުގަނޑު އަދި ޕާޓީގެ އެހެން އެއްވެސް މީހެއްގެ ސިޔާސީ ގިބްލައެއް ނެތް ރައީސް ޔާމީން ނޫން،" އޭނާ ވިދާޅުވި އެވެ.
ސުޖާ ވަނީ ނަހުލާ ޕާޓީން ވަކިކުރަން ޖެހުނު ގިނަ ސަބަބުތައް ތަފްސީލްތަކާ އެކު ވިދާޅުވެދެއްވައިފަ އެވެ. އަދި ޕާޓީގެ ކެންޑިޑޭޓާ ދެކޮޅަށް މަސައްކަތް ކުރި ކަން ދޭހަވާ ފަދަ ފޭސްބުކްޕޯސްޓްތައް ވެސް ހިއްސާކުރެއްވި އެވެ. އެއީ، ޕީޕީއެމުން ކެންޑިޑޭޓަކު ނެރެން ތައްޔާރުވަމުން ދަނިކޮށް ނަހުލާ ވަކިން ކެންޑިޑޭޓަކު ނެރެން އާދޭސްކުރި ކަމަށް ބުނެފައިވާ ޕޯސްޓެކެވެ.
ސުޖާ ވިދާޅުވި ގޮތުގައި ވިލިމާލެ އަންހެނުންގެ ކޮމިޓީގެ ބައި އިލެކްޝަނުގައި ކެންޑިޑޭޓެއް ނެރުމުގެ ޒިންމާ ހަވާލުކުރީ އެ ދާއިރާގެ ކައުންސިލަރު އަދި ސްޓިއަރިން ކޮމިޓީގެ މެމްބަރެއްގެ ގޮތުން ނަހުލާއާ އެވެ. އެކަމަކު ޕީޕީއެމުން ކަނޑައެޅި ތާރީހް ހަމަވިއިރު ވެސް ނަހުލާ އަށް އެކަން ނުވީ ކަމަށް އޭނާ ވިދާޅުވި އެވެ.
ހުޅުމާލެ ދާއިރާގެ ކައުންސިލަރަށް ވިޔަސް އޭނާ ވިލިމާލެ ދާއިރާގެ ގޮނޑި، ޕީޕީއެމަށް ކާމިޔާބުކޮށްދޭން މަސައްކަތް ކުރަން ޖެހުނީ، އިންތިހާބުތައް ޕާޓީތައް މުހިއްމުވާތީ ކަމަށް ސުޖާ ވިދާޅުވި އެވެ.
އޭނާ ވިދާޅުވީ ނަހުލާ އެ ދާއިރާއަށް ކެންޑިޑޭޓަކު ދެއްކީ، ޕީޕީއެމުން ފާތުމަތު ނާޒިމާގެ ފޯމު ބަލައިގެންފައި ވަނިކޮށް ކަމަށާއި ފަހުން މަސައްކަތް ކުރެއްވީ އޭނާއާ ދެކޮޅަށް ކަަމަށެވެ. މިއީ، އެއްވެސް މެމްބަރަކު ކުރިއަސް ޕީޕީއެމުން ބަލައިގަންނާނެ ޒާތުގެ ކަންކަމެއް ނޫން ކަން ސުޖާ ފާހަގަކުރެއްވި އެވެ.
"އެމްއެންޕީގެ ކެންޑިޑޭޓަށް ތާއީދު ހޯދަން ނަހުލާ އުޅުނު ކަމުގެ ހެކި ހުރެގެން އެ މައްސަލަ ސުލޫކީ ކޮމިޓީއަށް ފޮނުވީ، އޭނާގެ ހިތްހަމަނުޖެހުން އޮތީ އެކަމާ،" ސުޖާ ވިދާޅުވި އެވެ.
"އަޅުގަނޑަކީ ނަހުލާ އެ ވިދާޅުވާ ފަދަ ފުރައްސާރަކުރުން ފަދަ ދަށު ދަރަޖައިގެ ކަންކަން ކުރާ އަދި ކުރާނެ މީހެއް ވެސް ނޫން."
ވިލިމާލެ ކެންޑިޑޭޓް ހޯދުމުގެ މަސައްކަތުގައި ނޫޅުއްވުނު ސަބަބަކަށް ނަހުލާ ދައްކަނީ ޕާޓީން އޭނާއަށް ކުރިން ވެސް ފިޔަވަޅު އަޅާފައިވުމެވެ. އެ ފިޔަވަޅަކީ ޕޯޑިއަމްތަކުގައި ވާހަކަ ނުދެއްކުމާއި އިންތިހާބެއްގައި ވާދަނުކުރެވުމުގެ އިތުރުން ދަތުރުތަކުގައި ބައިވެރި ނުވެވުމެވެ.
ޕީޕީއެމުން ބުނީ އެ ފިޔަވަޅުތަކަކީ ނަހުލާއަށް އޭނާގެ ދާއިރާގެ ޒިންމާތައް އަދާނުކުރެއްވެންވީ ސަބަބެއް ނޫން ކަަމަށެވެ.
ނަހުލާ ތުހުމަތު ބަލަން ހުށައެއްނާޅާ
ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވެސް ވިދާޅުވީ ނަހުލާގެ ތުހުމަތުތަކަކީ "ކަނޑައެޅިގެން ދޮގެއް" ކަމަށެވެ. އޭނާ ޕާޓީން ވަކިކުރީ ވިލިމާލެ ދާއިރާގެ ކެންޑިޑޭޓާ ދެކޮޅަށް ކެމްޕޭން ކުރެއްވި ކަމުގެ ސާބިތު ހެކި ލިބުމުން ކަމަށެވެ.
އިންތިހާބުގައި ޕީޕީއެމާ އިދިކޮޅު ކެންޑިޑޭޓު ހޮވަން، "ރައީސް ޔާމީން ވިދާޅުވެގެން ކަަމަށް" ގިނަ ވާހަކަތަކެއް ނަހުލާ އެކި މީހުންގެ ގާތުގައި ދައްކަވައި ފިތުނަ އުފެދޭ ގޮތަށް ކަންކަން ކުރައްވާފައިވާ ކަން ވެސް އޭނާގެ މައްސަލަ ބެލިއިރު ސުލޫކީ ކޮމިޓީއަށް ފާހަގަވި ކަމަށް ތޮލާލް ވިދާޅުވި އެވެ.
ތޮލާލް ވިދާޅުވި ގޮތުގައި ރައީސް ޔާމީނާ ދެކޮޅަށް މަސައްކަތް ކުރާނެ އެކަކު ވެސް ޕާޓީއަކު ނެެތެވެ.
"ޕީޕީއެމްގެ މެމްބަރުންގެ އިތުރުން މުޅި ރާއްޖެ ވެސް ބޭނުން ވަނީ ރައީސް ޔާމީން ވެރިކަމަށް ގެންނަން. އެހެންވީމާ އެމަނިކުފާނާ ދެކޮޅަށް ޕާޓީގެ ތެރެއިން މަސައްކަތެއް ނުކުރާނެ. ނަހުލާ އެ ކުރައްވާ ތުހުމަތު ބަލަން ކޮމިޓީއަށް ހުށަހަޅުއްވާފައެއް ވެސް ނެތް. ހަމަ ތުހުމަތެއް ކުރައްވަނީ،" ތޮލާލް ވިދާޅުވި އެވެ.
އޭނާ ވިދާޅުވި ގޮތުގައި ނަހުލާ އެ ވިދާޅުވާ ވާހަކަ ތަފްސީލާ އެކު ޕާޓީ އަށް ރަސްމީކޮށް ހުށަހެޅުއްވި ނަމަ ބަލާނެ އެވެ. އެކަމުގައި ފިޔަވަޅު ވެސް އަޅާނެ އެވެ.