ސިޔާސީ ޕާޓީތަކުން ހުށަހަޅާ މެމްބަރުންގެ ފޯމްތައް ކަށަވަރު ކުރުމަށްޓަކައި ސޮއިކުރާ މީހާގެ ނަން އާންމުކުރަން އިލެކްޝަންސް ކޮމިޝަން (އީސީ) އިން ފަށައިފި އެވެ.
ސިޔާސީ ޕާޓީތަކާ ގުޅޭ މީހުންގެ ނަން ހާމަކުރަން އީސީން ނިންމީ ޕާޓީތަކަށް ވަންނަ މީހުންގެ ފޯމް އޮޅުވާލައި އެހެން ޕާޓީތަކަށް ބަދަލުކުރާ ކަމުގެ ތުހުމަތު ބޮޑުވުމާ ގުޅިގެންނެވެ.
އީސީން މިއަދު ކުރި އިއުލާނެއްގައި ބުނީ މެމްބަރުންގެ ގޮތުގައި ދަފްތަރު ކުރުމަށް ސިޔާސީ ޕާޓީތަކުން ހުށަހަޅާފައިވާ ފޯމްތަކުގެ ސައްހަކަން ކަށަވަރު ކުރުމަށް އެ ފަރާތްތަކުގެ ނަމާއި އައިޑީ ކާޑުގެ ފަހު ތިން ނަމްބަރު އެ ކޮމިޝަންގެ ވެބްސައިޓުގައި އާންމުކޮށްފައިވާ ކަމަށެވެ.
އީސީން ބުނީ ޕާޓީތަކުން ދަފްތަރު ކުރުމަށް ހުށަހަޅާފައިވާ ފަރާތްތަކުގެ ފޯނަށް މެސެޖެއް ވެސް ފޮނުވާފައިވާ ކަމަށެވެ.
އެ ލިސްޓާ ގުޅޭ ގޮތުން އެއްވެސް ޝަކުވާއެއްވާ ނަމަ އަންނަ އާދީއްތަ ދުވަހުގެ ކުރިން އީސީ އަށް ހުށަހެޅުމަށް އެ އިއުލާނުގައި ބުނެފައިވެ އެވެ.
އެ އިއުލާނުގައި ޖުމްހޫރީ ޕާޓީގެ 23 ފޯމާއި އެމްޑީޕީގެ 105 ފޯމާއި އެމްއެންޕީގެ 245 ފޯމުގައިވާ ނަންތައް ވަނީ އާންމު ކޮށްފަ އެވެ.