ނަޝީދުގެ އިގްތިސާދީ ވިސްނެވުމާ ދެކޮޅަށް ފައްޔާޒާއި އަމީރު ނުކުންނަވައިފި

ދަރަނި މައްޗަށް ދަރަނި ނަގައި ރާއްޖެ ބަނގުރޫޓުވުމާ ހިސާބަށް ހިނގައިދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވަމުން ގެންދަވާ ވާހަކަފުޅުތަކާ ދެކޮޅަށް އިކޮނޮމިކް މިނިސްޓަރު ފައްޔާޒް އިސްމާއިލް އާއި ފިނޭންސް މިނިސްޓަރު އިބްރާހިމް އަމީރު ނުކުންނަވައިފި އެވެ.

ރާއްޖޭގެ އިގްތިސާދީ ހާލަތާ ގުޅުވައި ނަޝީދު އާއްމުކުރައްވާ ވިސްނެވުންތަކާ ދެކޮޅަށް އެމްޑީޕީގެ ޗެއާޕާސަން ފައްޔާޒް އިސްމާއިލް އާއި މިނިސްޓަރު އަމީރު ވަނީ "ރާއްޖޭގެ އިގްތިސާދުގެ މިސްރާބު ރަނގަޅު" ކަމުގެ ރައްދުތަކެއް ދެއްވައިފަ އެވެ. މި ބަހުސް މިއަދު ހިނގީ އެ ޕާޓީގެ ގައުމީ މަޖިލީހުގެ ވަޓްސްއެޕް ގްރޫޕްގަ އެވެ.

ނަޝީދު މިހާތަނަށް ދައްކަވަމުން ގެންދެވި އިގްތިސާދީ ވާހަކަތަކާ ގުޅުވައި ފައްޔާޒް އެދިވަޑައިގަތީ، ރަނގަޅަށް އިގްތިސާދު ހިނގަނިކޮށް ހަގީގަތާ މާ ދުރު ވާހަކަތަކެއް އެމަނިކުފާނު ދައްކަވައި، ސަރުކާރު ވައްޓާލުމަށް މަސައްކަތްކުރާ މީހުންނާ އެއްބައި ނުވުމަށެވެ. ހަގީގަތާ ހިލާފު ވާހަކަ ފަތުރައި، ސަރުކާރު ވައްޓާލަން މަސައްކަތް ކުރަމުންދާ ކަމަށް ފައްޔާޒް ތުހުމަތު ކުރެއްވީ އިދިކޮޅު ޕީޕީއެމަށެވެ.

ދެ ފެކްޝަނަކަށް ހިނގަމުންދާ އެމްޑީޕީ އެތެރޭގެ ހަމަނުޖެހުން މިވަގުތު ބޮޑުވެފައި އޮތީ ރާއްޖޭގެ އިގްތިސާދީ ހާލަތާ ގުޅުވަ އެވެ. ނަޝީދު ގޮވާލައްވަމުން ގެންދަވަނީ ދަރަނި ރީސްޓްރަކްޗާ ކުރުމަށެވެ. އެމަނިކުފާނުގެ އަރިސް މެމްބަރެއް ކަމަށްވާ ހުޅުދޫ ދާއިރާގެ މެމްބަރު އިލްޔާސް ލަބީބް އެކަމާ ގުޅޭ ގޮތުން މަޖިލީހަށް ހުށަހެޅުއްވި ބިލް ބަލައިގަތުމާ އެމްޑީޕީގެ ޕާލަމެންޓްރީ ގްރޫޕުގެ ގިނަ މެމްބަރުން ދެކޮޅު ހެއްދެވުމުން ވެސް ނަޝީދު ވަނީ ހިތްހަމަނުޖެހުންފާޅުކުރައްވައިފަ އެވެ.

އެ މައްސަލައިގައި ނަޝީދުގެ ނިންމެވުމަކަށް ވީ އެމްޑީޕީގެ ވިޕްލައިންތަކަށް ތަބާނުވުމެވެ. އެކަމަށް 19 މެމްބަރަކު ތާއީދު ކުރެއްވި އެވެ. އެކަމަކު އެއީ، ޕާޓީގެ އަސާސީ ގަވާއިދުގައިވާ ގޮތުން ފިޔަވަޅު އެޅޭނެ ކަމެއް ކަމަށް ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުމުން ނަޝީދު ވަނީ ރައްދު ދެއްވައިފަ އެވެ.

އެމަނިކުފާނު ވިދާޅުވި ގޮތުގައި އިގްތިސާދީ ހާލަތާ ގުޅުވައި މަޖިލީހުގައި ސަރުކާރު ޖަވާބުދާރީ ނުކުރެވިއްޖެ ނަމަ ރާއްޖެއަށް ބޮޑު ގެއްލުމެއް ވެދާނެ އެވެ.

މި ދެބަސްވުމުގައި ތިއްބައި، ފައްޔާޒާއި އަމީރު މިއަދު ނަޝީދަށް ރައްދު ދެއްވީ މާލީ ހާލަތު ގޯސްވެދާނެ ގައުމުތަކުގެ ތެރޭގައި ރާއްޖެ ވެސް ހިމަނާފައިވާ ބީބީސީގެ އާޓިކަލްއެއް އެމަނިކުފާނު ހިއްސާކުރެއްވުމުންނެވެ.

އެ އާޓިކަލްގައި އެނަލިސްޓާ ހަވާލާދީފައިވާ ވާހަކަތަކަށް ރައްދު ދެއްވައި އަމީރު ވިދާޅުވީ ރާއްޖޭގެ އިގްތިސާދު، އެ ލިއުމުގައި ހިމަނާފައިވާ ގައުމުތަކާ ތަފާތު ކަމަށެވެ. ރާއްޖޭގެ ކަންކަން އެ އާޓިކަލްގައި ލިސްޓުކޮށްފައިވާ ގައުމުތަކާ އެއް ހާލަތަކަށް ނުދާނެ ކަމަށް ވެސް ވިދާޅުވި އެވެ.

އަމީރު އެމްޑީޕީގެ ވަޓްސްއެޕް ގްރޫޕުގައި ތަކުރާރުކޮށް މިއަދު ވެސް ވިދާޅުވީ އެހެން ގައުމުތަކެކޭ އެއްގޮތަށް ރާއްޖެއަށް ވެސް އިގްތިސާދީ ގޮތުން ގޮންޖެހުންތަކެއް ހުއްޓަސް ލިއުމުގައި ބުނާހާ ގޯސް ހާލަތަށް ނުދާނެ ކަމަށެވެ. މި ކަށަވަރުކަން އެމްއެމްއޭ އަށް ވެސް އޮތް ކަން އަމީރު ފާހަގަކުރެއްވި އެވެ.

ދަރަނި ރީސްޓްރަކްޗާ ނުކޮށް ރާއްޖެއަށް އަރައިގަނެވެން ނެތް ކަމަށް ނަޝީދު ދައްކަވާ ވާހަކަތަކާ ގުޅިގެން ފައްޔާޒް އެދިވަޑައިގަތީ، ހަގީގަތް ރަނގަޅަށް ބައްލަވައި އޭގެ މައްޗަށް ވާހަކަ ދެއްކެވުމަށެވެ. ރާއްޖޭގެ އިގްތިސާދާ ގުޅޭ މައުލޫމާތު ސާފުކޮށް ފެންނަން ހުރިއިރު، އެއާ މާދުރު ވާހަކަތަކަކުން އިދިކޮޅު ޕީޕީއެމުން ސިޔާސީ ފައިދާއަށް ކުރާ ކަންކަމަށް ހިތްވަރު ނުދެއްވަން އެދިވަޑައިގަތެވެ.

"ރައީސް ވަރަށް ގިނަ އަޅުގަނޑުމެންނާ ދެކޮޅު މީހުން އެބަ މަސައްކަތްކުރޭ، ހަގީގަތެއް ނެތް ވާހަކައެއް އެ ވާހަކަ ދެއްކި ދެއްކީނުން ހަގީގަތަކަށް ހެދޭތޯ. ބޭނުމަކީ ސަރުކާރު ވައްޓާލުމަށްޓަކައި ހަމައެކަނި އޮތް ގޮތަކީ ގައުމު ފުނޑުފުނޑުކޮށްލައިގެން ނަމަވެސް އެކަން ކުރުން. މިއީ އަޅުގަނޑުމެންގެ ދުޝްމަނުން ރާވައިގެން ކުރާ ކަމެއް. ހިންގަވާ އަޅުގަނޑުމެން މިކަމަށް ހިތްވަރު ނުދެމާ،" ފައްޔާޒް ވިދާޅުވި އެވެ.

އޭނާ ވިދާޅުވި ގޮތުގައި މައުލޫމާތުތައް ފެންނަން ހުއްޓައި އިގްތިސާދީ ދޮގުތައް ހެދުމަކީ ޕީޕީއެމުން ވަރަށް ވަރުގަދަައަށް ރާވައިގެން ކުރާ ކަމެކެވެ. އެކަމަކު ޔޫރަޕާއި އެމެރިކާގެ ފައިނޭންޝަލް އިންސްޓިޓިއުޝަންސްތަކުން ވެސް ރާއްޖޭގެ އިގްތިސާދާއި ދަރަނީގެ މައްސަލައަށް ފުރިހަމަ އިތުބާރު އޮތް ކަން އިއްޔެ ވެސް ހާމަވެގެން ގޮސްފައިވާ ކަމަށް ފައްޔާޒް ވިދާޅުވި އެވެ.

"އަޅުގަނޑު އެބަ ރާވަން ގައުމީ މަޖިލީހަށް އިގްތިސާދާ ދަރަނީގެ ފުލް އިންފޮމޭޝަން ސެޝަނެއް. އޭރުން ވަރަށް ގިނަ ޝައްކުތައް ފިލައިގެންދާނެ ކަމަށް ބެލެވޭ،" ފައްޔާޒް ވިދާޅުވި އެވެ.

ފައްޔާޒަށް ރައްދު ދެއްވަމުން ނަޝީދު ވިދާޅުވީ ރާއްޖޭގެ އިގްތިސާދާއި އެހެން ކަންކަމަށް ބައްލަވައި އެމަނިކުފާނު ފާޑުވިދާޅުނުވެ ހުންނަވާފާނެ ކަމަށް ހީނުކުރެއްވުމަށެވެ.

"ބުނާ އެއްޗެއްގެ ސަބަބުން ސަރުކާރު ވެއްޓޭނީ ނަމަ ކުރާނެ ކަމެއް ނެތް. ފެންނަ ކަންކަން ނުފެންނަ ކަމަކަށް ނުހެދޭނެ،" ނަޝީދު ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެމްޑީޕީގެ ފުރަތަމަ ވެރިކަމުގައި 2019 ގައި ދަރަނި އަދާކުރަން ދަރަނި ނެގީ އެކަން ނުކުރައްވަން އެމަނިކުފާނު އާދޭސްކުރައްވަނިކޮށެވެ. ގައުމީ އުފެއްދުންތެރިކަމުގެ ނިސްބަތުން ދަރަނި 117 ޕަސެންޓަށް އަދި ޑެފިސިޓް މިހާ ބޮޑުވެފައި ވަނީ ވެސް 2019 ގައި އަމަލުކުރި ގޮތުން ކަމަށް ނަޝީދު ވިދާޅުވި އެވެ.

"މިއީ އިލެކްޝަން އަހަރު, ދެން މިޖެހުނީ ހަރަދު ކުޑަކުރަން. އަދި މިހާރު ގުޅީފަޅުން ގޯތި ދޭ ވާހަކަ ބުނާއިރު އެއީ ރައީސުލްޖުމްހޫރިއްޔާއާ އަދި އެތައް ބަޔަކާ ކިތަންމެ ޒުވާބެއް ކޮށްގެން ވީ ކަމެއް. މި ގްރޫޕްގައި އެ ޒުވާބު އަޑު އެހި ބޭފުޅުން ތިބޭނެ،" ނަޝީދު ވިދާޅުވި އެވެ.

އިގްތިސާދީ މި ބަހުސްގެ ތެރެއިން ނަޝީދު ދެން ފެއްޓެވީ ރައީސް އިބްރާހިމް މުހައްމަދު ސޯލިހްއާ އޮތް ސިޔާސީ ވާދަވެރިކަމުގެ ވާހަކަ އެވެ.

"ފަޔާއަށާއި އަމީރު އަދި އެހެން ވަޒީރު ބޭފުޅުންނަށް ދަންނަވަން. އަޅުގަނޑު ވާދަކުރަނީ ރައީސުލްޖުމްހޫރިއްޔާ އިބޫއާ. ތި ބޭފުޅުންނަކާ ނޫން. ދެން ރައީސުލްޖުމްހޫރިއްޔާ ކަން ކުރައްވާފައިވާ ގޮތް އަޅުގަނޑު ހާމަކުރާނެ. ނުކުމެ މި ތިއްބެވީ ވާދަވެރި ސިޔާސީ ނިޒާމެއްގައި،" ނަޝީދު ވިދާޅުވި އެވެ.

"ރައީސުލްޖުމްހޫރިއްޔާ ޕްރައިމަރީގައި ވާދަކުރައްވާނެ ކަމަށް ވިދާޅުވެއްޖެ. މިހާރު މިކަންކަން ސާފުކޮށް ދިނުމަކީ އަޅުގަނޑުގެ ވާޖިބެއް."

އެ ވާހަކަފުޅުތަކުގައި ނަޝީދާ ހިޔާލުތަފާތުކަން ހާމަކުރައްވަމުން ފައްޔާޒް ވިދާޅުވީ ބޭނުންފުޅު ވާހަކައެއް ވިދާޅުވުމުގެ ކުރިން ހަގީގަތް ބައްލަވާލައްވަން ވާނެ ކަމަށެވެ. ނަޝީދު ބޭނުންފުޅު ވާހަކައެއް ދެއްކެއްވޭނެ ކަން ގަބުލުކުރައްވާ ކަމަށް ފައްޔާޒް ވިދާޅުވި އެވެ.

ފައްޔާޒް ވިދާޅުވި ގޮތުގައި ދަރަނި ނެގުމުގެ ފެންވަރު އިގްތިސާދުގައި އަދިވެސް އެބަހުއްޓެވެ. އެހެންކަމުން އަދިވެސް ދަރަނި ނަގަން ޖެހޭ ކަމަށް ދެކެވަޑައިގަންނަވާނެ ކަމަށް ވިދާޅުވި އެވެ.

".. 2019 ގައި ވެސް ދަރަނި ނަގައިގެން ކަންކަން ކުރީމާ މިއަދު ރަނގަޅު ހާލަތުގައި މި ތިބީ. ޑެޓް ޓު ޖީޑީޕީ ރޭޝިއޯ 117 ޕަސެންޓަށް އައީ ކޮވިޑާ އެއްކޮށް. ޖީޑީޕީ ހެސް ކިޔާފައި ދަށްވި އިރު ރައްޔިތުން ބަނޑަށް ޖެހުނަ ނުދީ ވިޔަފާރިތައް ފުނޑުފުނޑުވިޔަ ނުދިނުމަށް ދަރަނި އިތުރަށް ނަގަން ޖެހުނީމަ. ކޮވިޑް ނައި ނަމަ ވަރަށް ރަނގަޅުވީސް،" ފައްޔާޒް ވިދާޅުވި އެވެ.

މިނިސްޓަރު ވިދާޅުވީ ދަރަނި ނަގައިގެން ކުރިއަށް އޮތް ތަނުގައި ވެސް މަޝްރޫއުތައް ހިންގަންވީ ކަމަށެވެ.

"އަދިވެސް ދަރަނި ނަގަންވީ. ޕްރޮޖެކްޓް ހިންގަންވީ. ޕްރައިވެޓް ސެކްޓާއަށް ފައިނޭންސް ހޯދަންވީ. ރައްޔިތުންގެ އަސާސީ ކަންކަން ކޮށްދޭންވީ. މިއީ، ރައީސްގެ ވިސްނުމާއި އަޅުގަނޑުގެ ވިސްނުމުގެ ތަފާތެއް. ޒުވާބުގެ ކުރުމުގެ ނިޔަތެއް ނޫން. މި ކަންކަމާ މިނިވަންކޮށް ވާހަކަ ދެއްކި ހިޔާލު ބަދަލުކޮށްލުމުން ބިލް ރަނގަޅުވާނެ ކަމަކަށް ނުފެނޭ،" މަޖިލީހަށް ހުށަހަޅަން އުޅޭ ބިލަށް އިޝާރާތްކުރައްވައި ފައްޔާޒް ވިދާޅުވި އެވެ.

ދަރަނި ރީސްޓްރަކްޗާ ކުރަން ގޮވާލާ ބިލާ ގުޅުވައި އަމީރު ވެސް ވިދާޅުވީ މި ހާލަތު އައީ ދަރަނި ރީސްޓްރަކްޗާ ނުކޮށްގެން ނޫން ކަމަށެވެ. މި ހާލަތު އައީ ކޮވިޑާ ހެދި ދައުލަތުގެ އާމްދަނީ ބޮޑުތަނުން ދަށްވެ، ޖީޑީޕީ ދަށަށް ދިއުމުން ކަމަށެވެ.

ކުރިއަށް އޮތް ތަނުގައި ވެސް ރާއްޖޭގެ އިގްތިސާދު ކުރިއަރާނެ ކަމަށް ވިދާޅުވި އެވެ.

"ޕްރެސް ކޮންފަރެންސެއް ބާއްވާފައި ރާއްޖޭގެ ބޭންކްރަޕްސީ އިއުލާންކޮށް ދަރަނި ރީސްޓްރަކްޗާ ކުރަން ބުނީމާ މާ ގެއްލުން ގައުމަށްވާނެ،" އަމީރު ވިދާޅުވި އެވެ.

އިގްތިސާދީ ހާލަތު ހަމަ މަގަށް އަޅުވަމުން އަންނަނީ ވިސްނުންތެރިކަމާ އެކުގައި ކަމަށާއި ކުރިއަށް އޮތް ތަނުގައި ވެސް ރަނގަޅުވާނެ ކަމަށް އަމީރު ވިދާޅުވި އެވެ.

އަމީރުގެ މެސެޖާ ގުޅިގެން ނަޝީދު ވިދާޅުވީ އަމީރަށް ވެގެންވާ ނަމަ ކޮންމެ ރެއަކު ވެސް އެމަނިކުފާނާ އިގްތިސާދީ ވާހަކަ ދައްކަވާނެ ކަމަށެވެ. އެހެން ނަމަ މި ހާލަތު މިގޮތަށް މެދުވެރި ނުވީސް ކަމަށް ވިދާޅުވި އެވެ.

"މި ގޮތަށް ހުރިހާ ކަމެއް މިދަނީ ރައީސުލްޖުމްހޫރިއްޔާ ވެސް އަމަލުކުރެއްވި ގޮތުން،" ނަޝީދު ވިދާޅުވި އެވެ.