އެއްގަމު އުޅަނދު ލައިސަންސްގެ ތިއަރީ އިމްތިހާނާއި އެކަމާ ގުޅުންހުރި ތަމްރީނުތަކެއް ހިންގުމަށް މޯލްޑިވްސް ޕޮލިޓެކްނިކާ އެކު ޓްރާންސްޕޯޓު މިނިސްޓްރީން މިއަދު އެއްބަސްވެއްޖެ އެވެ.
ޕޮލިޓެކްނިކްގައި ބޭއްވި ރަސްމިއްޔާތުގައި އެ އެއްބަސްވުމުގައި ސޮއިކުރެއްވީ ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން އާއި ޓްރާންސްޕޯޓު މިނިސްޓަރު އައިޝަތު ނަހުލާ އެވެ.
ލައިސަންސްގެ ތިއަރީއާ ގުޅޭ ކަންކަން މިހާތަނަށް ކުރަމުން ދިޔައީ ޓްރާންސްޕޯޓު މިނިސްޓްރީންނެވެ. ނަމަވެސް މި އެއްބަސްވުމުގެ ދަށުން އެ ޓެސްޓު ދެން ކުރިއަށްގެންދާނީ ޕޮލިޓެކްނިކުންނެވެ.
ތިއަރީގެ އިތުރުން ވެހިކަލް އިންސްޕެކްޝަން ސެޓްފިކެޓާއި ޑްރައިވިން އެގްޒާމިނާ އަދި ޑްރައިވިން އިންސްޓްރަކްޓަރާގެ ސެޓްފިކެޓް ތިނެއްގެ ކޯސް ވެސް ޕޮލިޓެކްނިކުން ހިންގާނެ އެވެ.
އެއްބަސްވުމުގައި ސޮއިކުރެއްވުމަށް ފަހު ހަޔަ އެޑިއުކޭޝަން މިނިސްޓަރު ވިދާޅުވީ ޓްރާންސްޕޯޓު ދާއިރާއަކީ ވަރަށް ތަފާތު ސްކިލްސްތަކެއް ހިމެނޭ މަސައްކަތްތަކެއް ކަމަށެވެ. އެހެންވެ، ވަކި ފެންވަރެއްގެ ކޯސްތައް ހިނުމަކީ ވަރަށް މުހިއްމު ކަމެއް ކަމަށް އޭނާ ވިދާޅުވި އެވެ.
މިނިސްޓަރު ނަހުލާ ވިދާޅުވީ ޕޮލިޓެކްނިކުން ތަމްރީނުތައް ހިންގަން ފެށުމުން ރޯޑް ވާދިނަސް ހަދައިދޭ ގަރާޖުތަކުގައި ތިބޭނީ އެ އިންސްޓިޓިއުޓުން ދަސްކޮށްފައި ތިބި މީހުން ކަމަށެވެ.
