ދިރާސީ އަހަރުގެ ކިޔެވުން ނިމި ސްކޫލްތަކުގެ ބޮޑު ޗުއްޓީ މިއަދު ފެށިފައި ވާއިރު ކުރިއަށް އޮތީ ވިއްސާރަ ދުވަސްތަކެއް ކަމަށް މެޓް އޮފީހުން ބުނެފި އެވެ.
މެޓް އޮފީހުގެ އޮފިޝަލަކު "މިހާރު" އަށް ވިދާޅުވީ މިއަދުން ފެށިގެން މުޅި ރާއްޖެ އަށް ވެސް ވައިގަދަވެ، ވިލާގަނޑުގައި ކަނޑުތައް ވެސް ގަދަވާނެ ކަމަށް ބެލޭވެ ކަމަށެވެ. އަދި އަންނަ ހޮނިހިރު ދުވަހުން ފެށިގެން ރާއްޖޭގެ އެކި ހިސާބުތަކަށް ބޯކޮށް ވާރޭވެހޭނެ ކަމަށް ވެސް މެޓުން ލަފާކުރެ އެވެ.
"އަންނަ ހޯމަ ދުވަހު މޫސުން ކުޑަކޮށް ރަނގަޅުވާނެ ކަމަށް ލަފާކުރެވުނު ނަމަވެސް، އަނެއްކާ ވެސް ހަފުތާ ބަންދު ކައިރިވާ ވަރަކަށް މޫސުން ގޯސްވާނެ ކަމަށް ބެލެވޭ،" އޮފިޝަލް ވިދާޅުވި އެވެ.
ޖޫން، ޖުލައި އަކީ ހުޅަނގު މޫސުމުގެ އެންމެ ގަދަ ދުވަސްވަރެވެ.
ރިޕޯޓް ފޮތް ދިނުމަށް ފަހު، މިއަދު ސްކޫލްތަކުގެ ބޮޑު ޗުއްޓީ ފަށާއިރު ގިނަ ބަޔަކު ރަށްރަށަށް ދަތުރުކުރާނެތީ، މޫސުމަށް ސަމާލުވުމަށް އެ އިދާރާއިން އިލްތިމާސްކުރެ އެވެ.
ރޭ ވެސް ކަނޑުމަތީގެ ހަތް ހާދިސާއެއް ރިޕޯޓްކޮށްފައިވެ އެވެ.
މެޓް އޮފީހުން މިއަދު ވަނީ ރާއްޖޭގެ ދެކުނުގެ އަތޮޅުތަކަށް ޔެލޯ އެލާޓް ނެރެފަ އެވެ. އެއީ ތ. އަތޮޅުން ފެށިގެން އައްޑު އަށް ބޯކޮށް ވާރޭވެހި، ގުގުރާނެ ކަމަށް ލަފާކޮށްފަ އެވެ.
މުޅި ރާއްޖެ އަށް ވެސް މިއަދު ވިއްސާރަކުރާނެ ކަމަށާއި ދެކުނުގެ އަތޮޅުތަކަށް ހުޅަނގުދެކުނާއި ދެކުނުން ގަޑިއަކު ފަސް މޭލާއި 15 މޭލާ ދެމެދުގެ ބާރުމިނުގައި އަދި އެހެން ހިސާބުތަކަށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ބުންޏެވެ. އަދި ވިލާގަނޑުގައި 40 މޭލަށް ވައިގަދަވުން އެކަށީގެންވާ ކަމަށް ވެސް ބުންޏެވެ.