މޫސުން ލަފާކުރުމުގެ ރޮނގުން ރާއްޖެއިން ތަމްރީނުވި ފުރަތަމަ ދިވެހި އޮފިޝަލް 47 އަހަރުގެ ހިދުމަތަށް ފަހު މިއަދު ރިޓަޔާކުރައްވައިފި އެވެ.
މޯލްޑިވްސް މީޓިއޮރޮލޮޖިކަލް ސެންޓަރުން ސޯޝަލް މީޑިއާގައި ކުރި ޕޯސްޓުގައި ބުނީ، އަލީ ޝަރީފު، މީޓިއޮރޮލޮޖިކަލް އޮބްޒާވަރެއްގެ ގޮތުގައި ހިދުމަތް ފެއްޓެވީ 1978 ވަނަ އަހަރު ކަމަށެވެ. މި ދިގު މުއްދަތުގައި އޭނާގެ އަގުހުރި މަސައްކަތުން އެ އިދާރާއަށް ގިނަ ފައިދާތަކެއް ވެފައިވާ ކަމަށް ވެސް ބުންޏެވެ.
މޫސުން ލަފާކުރުމާ ގުޅޭގޮތުން ތަމްރީނުވުމަށް ފަހު އަލީ ޝަރީފު ވަނީ ވައި އަދި ކަނޑުގެ މޫސުން ލަފާކުރާނެ ގޮތުގެ އެލާޓުތައް ނެރުއްވައިފަ އެވެ.
އެ އިދާރާއިން ބުނި ގޮތުގައި އަލީ ޝަރީފުގެ 47 އަހަރުގެ ދިގު ކެރިއަރުގައި މި ސަރަހައްދާއި ބޭރުގެ އޭޖެންސީތަކާ ގުޅުން ބަދަހިވެގެން ދިޔަ ކަމަށެވެ. އޭގެ ނަތީޖާއެއްގެ ގޮތުން މޫސުމާ ބެހޭ ގައުމީ އިދާރާއަށް ބޮޑެތި ކުރިއެރުންތައް ލިބިގެންދިޔަކަން ފާހަގަކުރި އެވެ.
އޭނާ ވަނީ ރީޖަނަލް އިންޓެގްރޭޓެޑް މަލްޓި ހަޒާޑް އާލީ ވޯނިން ސިސްޓަމް ފޯ އެފްރިކާ އެންޑް އޭޝިއާގައި ވެސް ރާއްޖެ ތަމްސީލުކުރައްވައިފަ އެވެ.
ބައިގަރުނުގެ ހިދުމަތަށް ފަހު ރިޓަޔާކުރެއްވިއިރު އަލީ ޝަރީފު ހުންނެވީ ޑެޕިއުޓީ ޑިރެކްޓާ ޖެނެރަލަށެވެ.
ދައުލަތަށް ކޮށްދިން ދިގު މުއްދަތުގެ ހިދުމަތް ބަލައިގަނެ، ސަރުކާރުން ވަނީ ޖުލައި، 2024 ގައި ގައުމީ އިނާމު ދެއްވައިފަ އެވެ.