އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލްއާ އިދިކޮޅަށް މަސައްކަތް ކުރެއްވުމަކީ ކުރެއްވުނު ގޯސްކަމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ރައީސްގެ މަގާމުގައި ވެސް ހުންނެވި ނަޝީދު އެ ޕާޓީގެ ގައުމީ މަޖިލީސް މެމްބަރުންގެ ވަޓްސްއެޕް ގްރޫޕެއްގައި ވިދާޅުވީ ފައްޔާޒްއާ އިދިކޮޅަށް ދެން ނާރުއްވާނެ ކަމަށެވެ. ބޭނުންފުޅު ވަނީ އެކުގައި ކުރިއަށް ވަޑައިގަތުމަށް ކަމަށް ވެސް ވިދާޅުވި އެވެ.
"އެއް ފަހަރު [މަޖިލިސް މެމްބަރު ހުސެއިން ޝަހީމް] ހުސެއިން އަޅުގަނޑު ލައްވާ އެކަން ކުރުވި. އެއީ އަޅުގަނޑަށް ކުރެވުނު ގޯސް ކަމެއް," ނަޝީދު ވިދާޅުވި އެވެ.
އެމަނިކުފާނުގެ ވިސްނުންފުޅު ބަދަލުވެ ފައްޔާޒްއާ އެކުގައި ހުންނެވި ކަމަށް ވިދާޅުވި އިރު, އެމްޑީޕީގެ ތެރޭގައި "ބްރޯ ހެދިގެން" އުޅުއްވަނީ ކަމަށް ކުރިން ފައްޔާޒަށް ވަރަށް ބޮޑަށް ނަޝީދު ފާޑުވިދާޅުވެފައިވެ އެވެ. އަދި މިނިސްޓަރު ކަމުން ވަކިކުރެއްވުމުގެ މަސައްކަތުގައި ވެސް އިސްކޮށް އުޅުއްވާފައިވެ އެވެ. އެކަމަކު ފަހުން ވިދާޅުވީ އެއީ ޕާޓީ ތެރޭގައި ހިނގައިދިޔަ ސިޔާސީ މަސައްކަތެއް ކަމަށެވެ.
އޭގެ ފަހުން، ޗެއާޕާސަންގެ އިންތިހާބުގައި ވެސް ނަޝީދުގެ ފެކްޝަނުން ބޮޑެތި ތުހުމަތުތަކެއް ފައްޔާޒަށް ކޮށްފައިވެ އެެވެ.
އެކަމަކު އިންތިހާބު ކާމިޔާބު ކުރެއްވުމުން ނަޝީދު ވަނީ އެމްޑީޕީގެ އޮފީހުގައި ފައްޔާޒްއާ ބައްދަލުކުރައްވައިފަ އެވެ.
ފައްޔާޒްއާ އެކުގައި ހުންނެވި ކަމަށް ނަޝީދު މިއަދު ވިދާޅުވީ އެމްޑީޕީގެ ގްރޫޕް ތެރޭގައި ހެންވޭރު ދެކުނު ދާއިރާގެ މެމްބަރު ހުސެއިން ކުރެއްވި ޝަކުވާއަކާ ގުޅިގެންނެވެ. އޭނާގެ ކަންބޮޑުވުމަކަށް ވީ އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) ކޮންގްރެސްގައި އިސްކޮށް އުޅުއްވުމެވެ.
ވެރިކަން ހިންގުން ބަރުލަމާނީ ނިޒާމަކަށް ބަދަލުކުރުމަށް އެމްޑީޕީގެ ކޮންގްރެސްގައި ނިންމަން ގަރާރު ހުށަހެޅުއްވުމަށް ފަހު ބަރުލަމާނީ ކެމްޕޭން މެނޭޖަރަކަށް ނަޝީދު ހަމަޖައްސަވާފައި ވަނީ އިބްރޭ އެވެ. ޗެއާޕާސަންގެ އިންތިހާބުގައި ފައްޔާޒްގެ ކެމްޕޭން މެނޭޖަރަކަށް ހުންނެވި އިބްރޭ ވަނީ ނަޝީދުގެ ހުށަހެޅުން ގަބޫލު ވެސް ކުރައްވައިފަ އެވެ.
"ކޮންގްރެސްގެ ކަންކަމުގައި އިސްކޮށް، ކޮންގްރެސްއަށް ހުށަހެޅޭ އެންމެ ހައްސާސް ކަމެއް ހަވާލުވެ އެކަމުގައި ކެމްޕޭން މެނޭޖަރަކަށް ހުރުމަކީ ހުތުރު ކަމެއް. އަދި މަސްލަހަތު ގެއްލި ރައީސް ނަޝީދު ހުށަހަޅުއްވާފައިވާ ގަރާރު ނުވަތަ ހުށަހެޅުމަށް ވެސް ބައެއްގެ ނުރުހުން ވެސް އަދި ބަޔަކަށް އެކަން އޮޅެން ވެސް މަގު ފަހިވެދާނެ ކަމެއް ކަމުގައި އަޅުގަނޑު ދެކެނީ," އަނދުން ހުސެއިން ވިދާޅުވި އެވެ.
އެކަމަކު ފައްޔާޒާއި ގައުމީ މަޖިލީހުގެ މިކަމުގައި ވާހަކަ ދެއްކެވި ގިނަ މެމްބަރުން ބުރަވެވަޑައިގަތީ އިބުރޭ ކޮންގްރެސްގެ އިންތިޒާމްތަކުގައި އިސްކޮށް އުޅުއްވުމުގައި މައްސަލައެއް ނެތް ކަމަށެވެ. ބަރުލަމާނީ ނިޒާމުގެ ކެމްޕޭން މެނޭޖަރެއްގެ ގޮތުގައި މަސައްކަތް ކުރެއްވޭނީ ހުށަހެޅުއްވި ގަރާރުގައިވާ ގޮތަށް ކޮންގްރެސްގައި މެމްބަރުން އެގޮތަށް ނިންމައިފި ނަމަ ކަން ވެސް ބައެއް މެމްބަރުން ފާހަގަކުރެއްވި އެވެ.
އެމްޑީޕީގެ ޗެއާޕާސަން ފައްޔާޒް ވިދާޅުވީ ކޮންގްރެސްގެ ހުރިހާ ކަމެއް ކުރިއަށް ގެންދަވަނީ އޭނާއަށް އެނގިވަޑައިގެން ބެއްލެވުމުގެ ދަށުން ކަމަށެވެ. ކޮންގްރެސްގެ އިންތިޒާމްތަކުގައި އިބްރޭ އުޅުއްވުން މައްސަލައެއް އޮތް ކަމަށް ދެކެވަޑައިނުގަންނަވާ ކަމަށް ވެސް ފައްޔާޒް މެމްބަރުންނަށް ސާފުކޮށްދެއްވި އެވެ.
މި މަހުގެ 19 ގައި ބާއްވަން ނިންމާފައިވާ އެމްޑީޕީގެ ކޮންގްރެސްއަށް އެންމެ މުހިއްމު ހުށަހެޅުމެއްގެ ގޮތުގައި މިހާތަނަށް އެޖެންޑާކޮށްފައި އޮތީ ބަރުލަމާނީ ނިޒާމުގެ ގާރާރެވެ.
އެ ގަރާރުގައި ބުނެފައި ވަނީ ގާނޫނުއަސާސީގައި ވެރިކަމުގެ ނިޒާމާއި އިންތިހާބީ އުސޫލުތައް ކަނޑައަޅާފައިވާ ގޮތުން ރިޔާސީ އިންތިހާބެއްގައި އެއް ޕާޓީން އެ އިންތިހާބު ކާމިޔާބުކޮށް މުތުލަގު ބާރުތަކާ އެކު ސަރުކާރު ހިންގުން ނާދިރު ކަމަށެވެ. ރިޔާސީ އިންތިހާބުގެ ތެރޭގައި އެހެން ޕާޓީތަކާއެކު ކޯލިޝަނެއް ހަދަން ޖެހުމުގެ ސަބަބުން ސަރުކާރު ހިންގުން ގަޑުބަޑުވެ ރައްޔިތުންނަށް ވެފައިވާ ވައުދުތައް ނުފުއްދޭ ކަމަށާއި ސަރުކާރާ މެދު ޕާޓީގެ އާންމު މެމްބަރުންގެ އިތުބާރު ކުޑަވަމުން އަންނަ ކަމަށް އެ ގަރާރުގައި ބުނެފައި ވެ އެވެ.
އެ މައްސަލަތައް ހައްލު ކުރުމަށް އެ ގަރާރުގައި ހުށަހަޅާފައިވަނީ ސަރުކާރުގެ އެންމެ އިސްވެރިޔަކީ ރައްޔިތުންގެ މަޖިލީހުގެ މެމްބަރުން އިންތިހާބު ކުރާ އަދި މަޖިލީހުގެ އަގުލަބިއްޔަތު ލިބިފައިވާ ބޮޑުވަޒީރަކު ކަމަށް ކަނޑައެޅުމަށާއި ދައުލަތުގެ އެންމެ އިސް ވެރިޔާ ކަމަށް ރައީސުލްޖުމްހޫރިއްޔާ އައްޔަން ކުރާނީ ރިޔާސީ އިންތިހާބުގެ ވޯޓުގައި އެންމެ ގިނަ ވޯޓު ލިބޭ މީހާ ކަމަށް ކަނޑައަޅައި ގާނޫނުއަސާސީ އެގޮތަށް ބަދަލު ކުރުމަށެވެ.
ބަރުލާމާނީ ނިޒާމަކަށް ބަދަލުވާން ނަޝީދު ހުށަހަޅުއްވާފައި ވިޔަސް ވެރިކަމުގެ ދެ ވަނަ ދައުރަކަށް ކުރިމަތިލައްވާނެ ކަން އިއުލާންކުރައްވައި ރައީސް އިބްރާހިމް މުހައްމަދު ސޯލިހް އާއްމުކުރައްވާފައި ވަނީ ރިޔާސީ ނިޒާމުގައި ކުރިއަށް ވަޑައިގަތުމުގެ ވިސްނުންފުޅެވެ. އެމްޑީޕީ އިސްވެ އެހެން ޕާޓީތަކާ އެކު އިންތިހާބު ކާމިޔާބު ކުރެއްވޭނީ އެމަނިކުފާނު ނުކުމެވަޑައިގެން ކަމަށް ރައީސް ވިދާޅުވެފައިވެ އެވެ.
ބަރުލަމާނީ ނިޒާމަކަށް ބަދަލުވާން ނަޝީދު ދައްކަވާ ވާހަކަފުޅުތަކަށް ރައީސް އިބްރާހިމް މުހައްމަދު ސޯލިހް ތަކުރާރުކޮށް ވިދާޅުވަމުން ގެންދަވަނީ އެއީ ރައްޔިތުންގެ ވޯޓަކުން ނިންމެން އޮތް ކަމެއް ކަމަށެވެ.
