ކޯޓު ރޫމްގެ ސީލިންގުން ފެން ފައިބާތީ ޔާމީންގެ ޝަރީއަތް މިއަދު ވެސް ކެންސަލް

ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިން ހިންގި ކަމުގެ ތުހުމަތުގައި ކުރީގެ ރައީސް އަބްދުﷲ ޔާމީންގެ މައްޗަށް ކޮށްފައިވާ ދައުވާގެ ޝަރީއަތުގައި މިއަދު ވެސް ކެންސަލްކޮށްފި އެވެ.

އެނގިފައިވާ ގޮތުގައި ޝަރީއަތް ނުބޭއްވުނީ ޝަރީއަތްކުރާ ކޮޓަރީގެ ސީލިންގުން ފެން ފައިބާތީ އެވެ.

ކްރިމިނަލް ކޯޓުން ބުނީ "ޝަރީއަތުގެ މާލަމަށް ފެނުގެ އަސަރުކޮށްފައިވާތީ އާއި މާލަމުގެ އެކި ހިސާބުތަކުން މިހާރު ވެސް ފެން ފައިބަމުންދާތީ، މިއަދުގެ އަޑުއެހުން ކުރިއަށް ގެންދެވެން ނެތުމުން މިއަދުގެ އަޑުއެހުން ކެންސަލް ކުރެވިފައި" ވާ ކަމަށެވެ.

މި މައްސަލައިގެ އިތުރު އަޑުއެހުންތައް ކުރިއަށް އޮތް ދެ ދުވަހަށް މިހާރު ވަނީ ތާވަލްކޮށްފަ އެވެ.

ޝަރީއަތުގެ މާލަމުގެ ސީލިންގުން ފެން ފައިބަނީ މިހާރު ކުރަމުންދާ ވިއްސާރާގައި އެތެރެއަށް ފެން އެޅުމުގެ ސަބަބުންނެވެ.

އެންމެ ފަހުން މިދިޔަ މަހުގެ 30 ގައި ބާއްވަން ހަމަޖެއްސި އަޑުއެހުން ވެސް ވަނީ ކެންސަލްކޮށްފަ އެވެ. އެ ދުވަހު ޝަރީއަތް ކެންސަލްކުރީ މައްސަލަ ބައްލަވާ އިސް ގާޒީ އަހްމަދު ޝަކީލް އާއިލީ ޒިންމާގެ ޗުއްޓީއެއް ނެންގެވުމާ ގުޅިގެންނެވެ.

ކެންސަލްވި ދެ އަޑުއެހުމަކީ ވެސް އެމްއެމްޕީއާރްސީ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހްމަދު އަދީބާއި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ހެކިބަސް ނެގުމުގެ އަޑުއެހުންތަކެވެ. މިއީ ދައުލަތުން ހުށަހަޅާ ހެކިންނެވެ. އެ މައްސަލައިގެ ޝަރީއަތުގެ އަޑުއެހުންތައް ފެށުމަށް ކްރިމިނަލް ކޯޓުގައި ބޭއްވި އަޑުއެހުމުގައި ދައުލަތުން ބުނި ގޮތުގައި ޔާމީނާއި އަދީބާ ދެމެދު ދެެއްކެވިފައިވާ ފޯނު ކޯލްތަކެއްގެ ރިކޯޑިން ކޯޓު އަމުރެއްގެ ދަށުން ހޯދުމަށް ހެކީގެ ގޮތުގައި ހުށަހަޅާފައިވާނެ އެވެ. އެ ރެކޯޑިންތައް ހުށަހެޅީ 2013 ވަނަ އަހަރުން ފެށިގެން ރަށްތަކާއި ފަޅުތައް ކުއްޔަށް ދޫކުރުމުގައި ޔާމީން ނުފޫޒު ފޯރުވިކަން ސާބިތުކުރަން ކަމަށް ދައުލަތުން ބުންޏެވެ.

Aarah massalah: Yamin aai Adeeb ge call recording thakeh

The most trusted news source in the Maldives

Mihaaru

އާރަށް ކުއްޔަށް ދިން މައްސަލައިގައި ޔާމީންގެ މައްޗަށް ކުރަނީ އެއް މިލިއަން ޑޮލަރުގެ ރިޝްވަތު ގަބޫލު ކުރުމުގެ ދައުވާ އާއި މަނީ ލޯންޑްރިންގެ ދައުވާ އެވެ. އަދި ޔާމީނަށް ރިޝްވަތު ދެއްވި ކަމަށް ބުނެ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ދައުލަތުން ރިޝްވަތު ދިނުމުގެ ދައުވާ ކުރެ އެވެ. ދައުލަތުން ބުނަނީ ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ އާރަށް ކުއްޔަށް ދިނުމުގެ މުއާމަލާތާ ގުޅިގެން ރިޝްވަތުގެ ގޮތުގައި ލިބިވަޑައިގަތް ފައިސާކަން ސާބިތުވާނެ ހެކި އެބަހުރި ކަމަށެވެ. އަދި އެ ކަމަށް ޔާމީން ނުފޫޒު ފޯރުއްވި ކަމުގެ ހެކި އެބަހުރި ކަމަށް ދައުލަތުން ބުނެފައިވެ އެވެ.