މާލޭގެ ކުނި ނަގަން ވެމްކޯއާ އެކު ހެދި އެއްބަސްވުން އާނުކޮށް، ކައުންސިލުން ކުނި ނަގާ ގޮތަށް ފާސްކޮށްފި

މާލެ އާއި ވިލިމާލޭގެ އާންމު ތަންތަނާއި ޕާކުތައް ސާފުކޮށް ބޭއްވުމަށާއި ކުނި ނެގުމަށް ވެމްކޯއާ އެކު ހަދާފައިވާ އެއްބަސްވުމުގެ މުއްދަތު އަންނަ ޑިސެމްބަރަށް ހަމަވުމުން އެ އެއްބަސްވުން އާ ނުކުރުމަށް މާލޭ ސިޓީ ކައުންސިލުން މިއަދު ފާސްކޮށްފި އެވެ.

ވެމްކޯއާ އެކު ހަދާފައިވާ އެއްބަސްވުން އެންމެ ފަހުން އާކުރީ ޑިސެމްބަރު 26، 2019 ގައި ކުރީގެ ކައުންސިލުންނެވެ. ތިން އަހަރަށް ހެދި އެ އެއްބަސްވުމުގެ މުއްދަތު މިއަހަރުގެ ޑިސެމްބަރު 26 އަށް ހަމަވާނެތީ އެ އެއްބަސްވުން އާނުކޮށް މާލެއިން ކުނި ނެގުމުގެ މަސައްކަތް ކައުންސިލުން ކުރާ ގޮތަށް ހުށަހެޅުއްވީ ޑެޕިއުޓީ މޭޔަރު އަހުމަދު ނަރީޝް އެވެ.

ކައުންސިލުން ބޭއްވި ޖަލްސާގައި އެ ކައުންސިލުގެ ސެކްރެޓަރީ ޖެނަރަލް މުޖުތަބާ ޖަލީލް ވަނީ ވެމްކޯއާ އެކު ހަދާފައިވާ އެއްބަސްވުމުގައި ބަޔާންކުރާ ކަންކަމާއި އެ މަސައްކަތް ކައުންސިލުން ކޮށްފި ނަމަ، ލިބޭނެ ފައިދާތައް ކިޔައިދެއްވައިފަ އެވެ.

މުޖުތަބާ ވިދާޅުވީ ވެމްކޯއާ އެކު ހެދި އެއްބަސްވުމުގައިވާ ގޮތުން ގޯޅިތައް ހިމެނޭ ގޮތަށް މާލެ އާއި ވިލިމާލޭގެ އާންމު ހުރިހާ ތަނަކާއި ޕާކުތަކުން ކުނި ނަގަން ޖެހޭ ކަމަށް އޮންނަ ކަމަށެވެ. އެކަމަކު ފަހަކަށް އައިސް ވެމްކޯ އިން ކުނި ނަގަނީ ވަކި ގޮތަކަށް ބަހައްޓައިފިއްޔާ ކަމަށާއި އެހެން ނޫން ނަމަ، ކުނި ފުންޏެއް ހުއްޓަސް އެ ނުނަގާ ކަމަށް ވިދާޅުވި އެވެ.

އޭނާ ވިދާޅުވި ގޮތުގައި ވެމްކޯ އިން އެ މަސައްކަތް ރަނގަޅަށް ނުކުރާތީ ކައުންސިލުގެ މުވައްޒަފުން ނިކުމެ، ކުނި ނަގަން ޖެހެ އެވެ. އަދި ކައުންސިލުން ކުނި ނެގުމުން އެ ކުނިތައް އުކާލަންދާ ކައުންސިލުގެ ޕިކަޕަށް ވެސް ޗާޖުކުރާ ކަމަށެވެ.

އެ ކައުންސިލު އައިފަހުން ވެމްކޯ އިން ވަނީ 45.6 މިލިއަން ރުފިޔާގެ ބިލު ކައުންސިލަށް ފޮނުވާފައި ކަމަށާއި އޭގެ ތެރެއިން 38.7 މިލިއަން ކައުންސިލުން މިހާރު ދައްކާފައިވާ ކަމަށް އޭނާ ވިދާޅުވި އެވެ.

މުޖުތަބާ ވިދާޅުވި ގޮތުގައި ވެމްކޯއަށް މަހެއްގެ މައްޗަށް 2.28 މިލުއަން ރުފިޔާ ކައުންސިލުން ދައްކަން ޖެހެ އެވެ. އެއީ މުޅި އަހަރަށް ބަލާ ނަމަ، 30.98 މިލިއަން ރުފިޔާ ކަމަށް އޭނާ ވިދާޅުވި އެވެ. ކުނި ނަގައި ސާފުކުރުމަށް ވެމްކޯ އިން 180 މުވައްޒަފުން ބޭނުންކުރާ ކަމަށާއި އެވަރުންވެސް އެކި ތަންތަނަށް ކުނިފުނިތައް ޖަހާފައި ހުންނާތީ އާންމުންގެ ފަރާތުން ޝަކުވާ ލިބޭ ކަމަށް އޭނާ ވިދާޅުވި އެވެ.

"މި ކޮންޓްރެކްޓުގެ ދަށުން ޖުމްލަ 180 މުވައްޒަފުން އެބަ ގެންގުޅޭ އެ ކުންފުނިން. އެއީ 150 މީހުން މާލެއަށް އަދި 30 މީހުން ވިލިމާލެއަށް. އެކަމަކު ބައެއް ފަހަރަށް ޝަކުވާ ލިބޭ ހަމަ އެކި މަގުތަކުގައި ކުނިފުނި ޖެހިފައި ހުންނާތީ،"

މުޖުތަބާ ވިދާޅުވީ ކައުންސިލުން ކުނި ނެގުމުގެ މަސައްކަތްކުރާ ނަމަ، މާލެ ތެރެ ސާފުކޮށް ބެލެހެއްޓޭނެ ކަމަށެވެ. އެކަން ކުރާނެ ގޮތުގެ ޕްލޭނެއް ހުށަހަޅުއްވަމުން އޭނާ ވިދާޅުވީ ވެމްކޯ އިން މިހާރު މާލެއަށް ނަގާފައިވާ އަދަދަށް ވުރެ 85 މީހުންނާއި ވިލިމާލެއަށް 15 މީހުން އިތުރުކޮށްފި ނަމަ، އެތަންތަން ސާފުކޮށް ބޭއްވޭނެ ކަމަށެވެ.

"މުވައްޒަފުންނަށް 10،000ރ. ދެނީ ނަމަ އެއް މިލިއަނުން މުވައްޒަފުންގެ ހަރަދު އެބަ ބެލެހެއްޓޭ. މިހާރު ވެމްކޯ އިން ދެނީ 8،000ރ. އެވްރެޖްކޮށް. މުވައްޒަފުންނަށް ވެމްކޯ އިން އެބަ ހަރަދުކުރޭ އަހަރަކު 17.3 މިލިއަން. ކައުންސިލުން އެކަން ކުރާނަމަ 12 މިލިއަނަށް ކުރެވޭ،"

އެ ކޮންޓްރެކްޓްގެ ދަށުން ވެމްކޯއިން ބޭނުންކުރާ ކަމަށް އޮންނަނީ ތިން ވެހިކަލް ކަމަށާއި އެކަމަކު ކައުންސިލުން ކުޑަ 9 ޕިކަޕާއި ފަސް ބޮޑު ޕިކަޕް ބޭނުންކުރާނެ ކަމަށް އޭނާ ވިދާޅުވި އެވެ.

"މުޅި ޖުމްލަ 3.57 މިލިއަނަށް ވެހިކަލް ގަނަވޭނެ. އެއީ މާކެޓް ރޭޓުން ބަލާ ނަަމަ. މުޅި ނިސްބަތުން އެބަ 30 މިލިއަން ވެމްކޯއަށް ހަރަދުކުރަން މިހާރު. އަޅުގަނޑުމެންގެ ހިސާބުން 15 މިލިއަނުން އެކަން ކުރެވޭނެ. 15 މިލިއަން ފައިދާ ވާނެ،" ވެމްކޯގެ ގިނަ މަސައްކަތްތަކެއް ކައުންސިލުން މިހާރު ވެސް ކުރާކަން ފާހަގަކުރައްވަމުން އޭނާ ވިދާޅުވި އެވެ.

އެހެންވެ، ވެމްކޯއާ އެކު ހަދާފައިވާ އެއްބަސްވުން އާނުކޮށް ކުނި ނަގައި ސާފުކުރުމުގެ މަސައްކަތްކުރުމަށް ކައުންސިލުން ކުރުމާ މެދު ޕީޕީއެމްގެ މެމްބަރުން ވަރަށް ބޮޑަށް ތާއީދުކޮށް ވާހަކަ ދެއްކެވި އެވެ.

އެ މައްސަލައާ ގުޅިގެން ހުޅުމާލޭ ދާއިރާގެ މެމްވަރު އިބްރާހިމް ޝުޖާއު ވިދާޅުވީ މިހާރު ވެމްކޯ އިން މަސައްކަތްކުރަނީ ކުރީގެ އަބްދުﷲ ރައީސް ޔާމީން ވެމްކޯ އުފެއްދެވި މަގްސަދާ ހިލާފަށް ކަމަށެވެ. އެއީ ދިވެހިން ލައްވާ ކުނި ނަގަން އުފެއްދި ކުންފުންޏެއް ނަމަވެސް އެ ފައިސާ މި ސަރުކާރުން ދެނީ ބޭރު މީހުންނަށް ކަމަށް ވިދާޅުވި އެވެ.

އެމްޑީޕީގެ މައްޗަންގޮޅި މެދުދާއިރާގެ މެމްބަރު އަހުމަދު ޒަމީރު ވެސް ވަނީ ވެމްކޯއަކަށް އެ މަސައްކަތް ނުކުރެވޭ ކަމަށް ވިދާޅުވެ، އެ އެއްބަސްވުން އާ ނުކުރުމަށް ތާއީދުކުރައްވައިފަ އެެވެ.

"މިއީ އަޅުގަނޑު މިދިޔަ ކައުންސިލުން ފެށިގެން ދައްކަމުން އަންނަ ވާހަކައެއް ބޭކާރު ފައިސާތަކެއް ހަރަދުކުރެވި މާލެ ތެރެ ސާފުނުކުރެވޭ ވާހަކަ. އެހެންވީމަ ކައުންސިލުން އެކަން ކުރަން އަޅުގަނޑު ވަރަށް ތާއިދު." ޒަމީރު ވިދާޅުވި އެވެ.

އޭނާ ވިދާޅުވީ ވެމްކޯ ނުއުފެދޭއިރު ވެސް މާލެ ތެރެއިން ކުނި ނަގަނީ ކައުންސިލުން ކަމަށާއި އެހެންވީމަ މިހާރު އެކަން އަދި މާރަނގަޅަށް ކުރެވޭނެ ކަމަށެވެ.

އެކަމަކު ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު ސައިފް ފާތިހު ވަނީ އެ މައްސަލައާ ގުޅިިގެން ވެމްކޯއާ މަޝްވަރާކުރުމަށް ފަހު ގޮތެއް ނިންމުމަށް ހުށަހަޅުއްވައިފަ އެވެ. އެކަމަކު ގަލޮޅު ހުޅަނގު ދާއިރާގެ މަރިޔަމް ނާޒިމާ ތާއީދުކުރެއްވި އެ ހުށަހެޅުން ފާހެއް ނުވެ އެވެ.

ކައުންސިލްގެ 12 މެމްބަރުންގެ އިއްތިފާގުން ފާސްކުރީ ވެމްކޯއާ އެކު ހަދާފައިވާ އެއްބަސްވުން އުވާލާށެވެ. އެ ހުށަހެޅުން ސަރުކާރުގެ ކަމާ ބެހޭ ފަރާތްތަކަށް ހުށަހަޅައި އެގޮތަށް ކުރިއަށް ދިއުމަށް މަސައްކަތްކުރާނެ ކަމަށާއި އެކަން ކުރެވޭނީ ސަރުކާރުން އެއްބާރުލުން ލިބިގެން ކަމަށް ކައުންސިލުން ބުންޏެެވެ.