މާލޭގެ ކެފޭއެއްގެ ތެރޭގައި ތޫނު އެއްޗެހިން ހަމަލާދީ މަރާލި ނަދީމް އިބްރާހިމްގެ މަރުގެ މައްސަލާގެ ހުކުމް އިއްވުން ދެފަހަރަށް ފަސްކުރުމަށްފަހު އަންނަ ހަފުތާގައި އިއްވަން ކްރިމިނަލް ކޯޓުން ހަމަޖައްސައިފި އެވެ.
ޖުލައި، 2017 ގައި ޓާމިނަލް ކެފޭގެ ތެރޭގައި ތޫނު އެއްޗެހިން ހަމަލާދީ ނަދީމް މަރާލި މައްސަލާގައި ދައުލަތުން ދައުވާކުރަނީ ގ. ޝާރާޒް މުހައްމަދު މަފާޒު ހުސައިން ސަލީމާއި ލ. ގަން ވިދާތަރި އަލީ ނިފާޒްގެ އިތުރުން ރ. އިންނަމާދޫ ސަމަންތާ ހުސައިން ޝާމިން އަދި ގއ. ގެމަނަފުށީ ހަވާސް، މުހައްމަދު ކަރަމް ސުހައިލްގެ މައްްޗަށެވެ.
އެ މައްސަލާގެ ހުކުމް އިއްވަން ފުރަތަމަ ނިންމީ މިދިޔަ މާޗް މަހުގެ ފަހުކޮޅަށެވެ. އޭގެފަހުން މިދިޔަ އޮގަސްޓް މަހުގެ ކުރީކޮޅު ވެސް ހުކުމް އިއްވަން ތާވަލްކުރި އެވެ. ކޯޓުން މިހާރު ތާވަލް ކޮށްފައިވަނީ އަންނަ ހަފުތާގެ ހޯމަ ދުވަހު ހުކުމް އިއްވުމަށެވެ.
ނަދީމަށް ހަމަލާދިނުމުގެ ތުހުމަތު ކުރަނީ މަފާޒުގެ މައްޗަށެވެ. ދެން ތިބި މީހުންގެ މައްޗަށް ކުރަނީ ސައިކަލުތަކެއްގައި އެތަނަށް ގޮސް، އެކަމުގައި ބައިވެރިވުމުގެ ތުހުމަތެވެ.
