މަނާ ކެމިކަލް ހަތިޔާރު ގެންގުޅޭ ނަމަ އެއް މިލިއަން ރުފިޔާއާ ހަމައަށް ޖޫރިމަނާކުރަން ފާސްކޮށްފި

ގާނޫނުގައި މަނާކަމަށް ކަނޑައަޅާފައިވާ ކެމިކަލް، ހުއްދަނެތި ގެންގުޅޭ ނަމަ އެއް މިލިއަން ރުފިޔާއާ ހަމައަށް ޖޫރިމަނާ ކުރެވޭ ގޮތަށް ކެމިކަލް ހަތިޔާރު މަނާކުރުމުގެ ބިލު މަޖިލީހުން މިއަދު ފާސްކޮށްފި އެވެ.

ސަރުކާރުގެ ފަރާތުން މަތިވެރި ދާއިރާގެ މެމްބަރު ހަސަން ޒަރީރު މަޖިލީހަށް ހުށަހެޅުއްވި ބިލު މިއަދު ފާސްކުރީ 56 މެމްބަރުންގެ ތައީދާ އެކު އެވެ.

މަޖިލީހުގެ ގައުމީ ސަލާމަތާ ބެހޭ ކޮމިޓީން އެކުލަވާލި ސަބް ކޮމިޓީއަކުން ދިރާސާކުރި އެ ބިލުގައި ވަނީ ކެމިކަލް ހަތިޔާރު މަނާކުރުމާ ބެހޭ ބައިނަލްއަގުވާމީ މުއާހަދާ ކަމަށްވާ "ކޮންވެންޝަން އޮން ދަ ޕްރޮހިބިޝަން އޮފް ދަ ޑިވެލޮޕްމަންޓް، ޕްރޮޑަކްޝަން، ސްޓޮކްޕައިލިންގް އެންޑް ޔޫޒް އޮފް ކެމިކަލް ވެޕަންސް އެންޑް ދެއާ ޑިސްޓްރަކްޝަން 1993" ގައި ބަޔާންކޮށްފައިވާ އުސޫލުތަކާ އެއްހަމަ ކުރުމުގެ ގޮތުން ބައެއް އިސްލާހުތައް ގެނެސްފަ އެވެ.

ރާއްޖޭގައި ކެމިކަލް ހަތިޔާރު ތައްޔާރުކުރުމާއި އުފެއްދުމާއި ރައްކާކުރުމާއި ބޭނުންކުރުން މަނާކުރުމާ އަދި އެ ތަކެތި ނައްތާލުމުގައި އަމަލުކުރަން ޖެހޭ އުސޫލުތައް އެ ބިލުގައިވެ އެވެ. އަދި ކެމިކަލް ގެންގުޅުން ހުއްދަކުރާ ހާލަތްތަކާއި ހުއްދައަކާ ނުލައި ގެންގުޅޭ ނަމަ، ޖޫރިމަނާކުރުން ނުވަތަ ޖަލަށް ލުމުގެ ބާރު ތަންފީޒީ އިދާރާތަކަށް ދިނުމަށް އެ ބިލުގައި ހިމަނާފައިވެ އެވެ.

އެ ބިލުގައިވާ ގޮތުން، އެ ކުށްތަކަށް 500،000ރ. އިން ފެށިގެން އެއް މިލިއަން ރުފިޔާއާ ހަމައަށް ޖޫރިމަނާ ކުރެވޭނެ އެވެ. ނުވަތަ ފަސް އަހަރާއި 20 އަހަރާ ދެމެދުގެ މުއްދަތަކަށް ޖަލަށް ވެސް ލެވޭނެ އެވެ.

ބިލު ގާނޫނަކަށް ވުމުން، ގާނޫނު ތަންފީޒު ކުރުމަށް "ކެމިކަލް ވެޕަންސް ޔުނިޓް" ގެ ނަމުގައި ހާއްސަ އިދާރާއެއް އުފައްދަން ޖެހޭނެ ކަމަށް ވެސް ބުންޏެވެ. އެ ގާނޫނުގެ ދަށުން ދޫކުރަން ޖެހޭ ހުއްދަތައް ދޫކުރުމުގެ ހުރިހާ މަސައްކަތެއް ކުރާނީ އެ އިދާރާއިންނެވެ.