ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގެ އިސް ގާޒީ އަހްމަދު ޝަކީލް އިއްވީ ރިޝްވަތު ނަގައިގެން "ހަރާމް ހުކުމެއް" ކަމުގެ ތުހުމަތުކޮށް، މުޅި "އާއިލާ ދުއްވާލާނެ ކަމުގެ" އިންޒާރާ އެކު ނަފްސާނީ ބިރުވެރިކަމެއްގެ ތެރެއަށް ވައްޓާލާފައިވާ ކަމަށް އެ އާއިލާއިން ބުނެފި އެވެ.
ޝަކީލްގެ ބޭބެ، ހޯމް މިނިސްޓްރީގެ ޑެޕިއުޓީ މިނިސްޓަރު އަބޫބަކުރު އަބްދުލްކަރީމް މިއަދު "މިހާރު" އަށް ވިދާޅުވީ ޕީޕީއެމް އާއި ޕީއެންސީގެ ލީޑަޝިޕުން އިސްކޮށް ތިބެ ބުހުތާނު ދޮގުތައް ހަދައި، އެ ޕާޓީގެ އެކްޓިވިސްޓުން ލައްވައި ޓީވީ ޕްރޮގްރާމްތަކާއި ސޯޝަލް މީޑިއާ އާއި ފޯނުކޮށްގެން ވެސް އާއިލާ ބަދުނާމުކޮށް ފުރައްސާރަކުރަމުންދާ ކަމަށެވެ.
"އެންމެންގެ ދުވަސް ދުއްވާލާނެ" ކަމުގެ އިންޒާރުތައް އާއިލާގެ އެކި މީހުންނަށް ދެމުންދާ ކަމަށް ވެސް ވިދާޅުވި އެވެ.
ހުކުމަށް ފަހު އެ އާއިލާގެ ބޮލުގައި އެޅުވީ, އޭނާ ވިދާޅުވި ގޮތުގައި, އެންމެ ބަދުނާމެއް ނޫނެވެ. އުފައްދައިގެން އެތައް ބައިވަރު ދޮގު ތުހުމަތު އަޅުވަމުންދާ ކަމަށް ވިދާޅުވި އެވެ.
ޝަކީލް ހުކުމް އިއްވީ ބޮޑު އަދަދަކުން ރިޝްވަތު ނަގައި، ބަދަލެއްގެ ގޮތުގައި މުޅި އާއިލާ އަށް ވަޒީފާތަކާއި މި ސަރުކާރުން ފްލެޓް ދީފައިވާ ކަމަށް ބުނާ ވާހަކައިގައި ވެސް ހަގީގަތެއް ނެތް ކަމަށެވެ.
ރައީސުލްޖުމްހޫރިއްޔާގެ އޮފީހުން ޗީފް އޮފް ސްޓާފް އަލީ ޒާހިރު ފޮނުވި ހުކުމް ޖެހީ ސިފައިންނާއި ފުލުހުން ލައްވައި ޝަކީލް "ހައިޖެކްކޮށްގެން" ކަމަށް ފެތުރުމަށް ފަހު އެ ވާހަކަ އެހެން ގޮތަށް ބަދަލުކޮށް ފައިސާ ނަގައިގެން މުޅި އާއިލާގެ ނުފޫޒުން ހުކުމްކުރީ ކަމަށް ބުނަމުންދާ ކަމަށް އަބޫބަކުރު ވިދާޅުވި އެވެ.
އޭނާ ވިދާޅުވި ގޮތުގައި ވަކި ކޮޓަރިއެއްގައި ޝަކީލް ރަހީނުކޮށް ހުކުމް ބަދަލުކޮށްފި ކަމަށް ޕީއެންސީގެ ނައިބު ރައީސް އަބްދުއްރަހީމް އަބްދުﷲ ނޫސްވެރިންނަށް ވިދާޅުވިތާ އިރުކޮޅެއްގެ ތެރޭގައި ޔާމީންގެ ވަކީލް ކުރީގެ ނައިބު ރައީސް, މުހައްމަދު ޖަމީލް އަހްމަދު ނުކުމެވަޑައިގެން ގާޒީ އިންނެވީ ތިމަންނާމެންނާ އެއްކޮޓަރިއެއްގައޭ ވިދާޅުވުމަކީ ކަނޑައެޅިގެން ދޮގު ފެތުރި ކަމުގެ ހެއްކެކެވެ.
"އަޅުގަނޑުމެން އާއިލާގެ ކޮންމެ މީހަކީ ވެސް މަރާލިޔަސް, ވަޒީފާގެ ބިރަށް މަގާމުގެ ބިރަށް, މަރު ދެކެ ބިރުން އަޒުމަށް ގުޑުންއަރާ ވަރުގެ ބައެއް ނޫން," އޭނާ ވިދާޅުވި އެވެ.
"ހުރިހާ ކުދިންގެ ފޮޓޯ ޖަހައި ސޯޝަލް މީޑިއާގައި ބޮޑެތި އިލްޒާމު އަޅުވައި އަބުރު ކަތިލަމުން ދަނީ އެއްވެސް ހަގީގަތެއް ނެތް ވާހަކަތަކުން. އަޅުގަނޑުމެން ނަފްސާނީ ގޮތުން ބަލިކަށިވެއްޖެ. އެހެން ވިޔަސް އެއްވެސް ކުއްޖަކު ފަހަތަކަށް ނުޖެހޭނެ," އަބޫބަކުރު ވިދާޅުވި އެވެ.
އޭނާ ވިދާޅުވީ މުޅި އާއިލާ އަށް ސަރުކާރުން ސިޔާސީ މަގާމް ހަމަޖައްސައިދީފައިވާ ކަމަށް ފަތުރަނީ ވެސް ލައިވްކޮށް ދިޔަ ޝަރީއަތުގައި ކިތާބީ ހެއްކާއި ގަރީނާ ފެންނަން ހުއްޓާ ކަމަށެވެ.
ޗެނަލް 13ގެ "މަޑިސީލަ" ޕްރޮގްރާމްގައި އޭނާއާ ގުޅޭ މައުލޫމާތެއް އެނގޭ ނަމަ ހިއްސާކުރަން އެދުނު ކަމާށާއި ހަޑިހުތުރު ބަހުން އިލްޒާމު އަޅުވައި ކުރި ފުރައްސާރަ އަށް ވުރެން އިތުރު އެއްޗެއް ހުށަހަޅަން އޮތްތޯ އޭނާ ސުވާލު ކުރެއްވި އެވެ. ހޯމް މިނިސްޓްރީގެ ނައިބެއްގެ މަގާމަށް އޭނާ ގުޅިވަޑައިގަތީ އަދާލަތު ޕާޓީގެ ސްލޮޓެއްގައި ކަން އެއީ އެކަކަށް ވެސް މީގެ ކުރިން އޮޅިފައި އޮތް ކަމެއް ނޫން ކަމަށް ވިދާޅުވި އެވެ.
އަބޫބަކުރު ވިދާޅުވި ގޮތުގައި ޝަކީލަށް ކްރިމިނަލް ކޯޓުގެ ވަޒީފާ ހަމަޖެހުމުގެ މާ ކުރިން ވެސް އެ އާއިލާގެ ގިނަ ބަޔަކު ތިބީ ސަރުކާރުގެ ވަޒީފާތަކުގަ އެވެ. އެއީ ހުކުމަށް ފަހު ލިބިގެން އުޅޭ ވަޒީފާތަކެއް ނޫން ކަމަށާއި ކޯޓުގެ ހުކުމާ އެ މީހުންނާ ގުޅުވައި ބަދުނާމުކުރަން ޖެހޭ އެއްވެސް ސަބަބެއް ނެތް ކަމަށް ވިދާޅުވި އެވެ.
އޭނާ ވިދާޅުވީ ސަރުކާރުގެ ވަޒީފާތަކުގައި އެ އާއިލާގެ އެކި މީހުން ތިބުމުގެ ފަހަތުގައި އޮތީ ކުރިން ދިރިއުޅެން ޖެހުނު ނިކަމެތި ހާލަތު ކަމަށެވެ. އެ ހާލަތުން އަރައިގަތީ ނުހައްގު މަންފާއަކުން ނޫން ކަމަށާއި ތެދުވެރިކަމާއި ރީތި އަޚްލާގަކާ އެކު އެއްވެސް ކިލަނބު ކަމެއްގައި ނުޖެހި ކަމަށް ވިދާޅުވި އެވެ.
"އެހާ ފަގީރުކޮށް އުޅުނުއިރު ވެސް ވައްކަން ކުރުމާއި ރިޝްވަތު ހިފުމާއި މީހުންގެ ހައްގުތަކަށް އަރައިގަތުމަކީ އަޅުގަނޑުމެންގެ އެއްވެސް މީހަކު ކުރި ކަމެއް ނޫން. އަޅުގަނޑުމެންގެ އާއިލާގެ ތެރޭގައި ނުހުންނާނެ އަހްލާގީ ފެންވަރު ދަށް އެކަކު ވެސް. ދަސްކޮށްދިނީ އަދުލުވެރިކަމާއި ހަމަހަމަކަން. އެހެން މީހުންނަށް އިހްތިރާމްކުރުން," އަބޫބަކުރު ވިދާޅުވި އެވެ.
"އާއިލާ މި މަގަށް ބައްޓަންކޮށް އަޅުގަނޑުމެން ނިކަމެތި ހާލަތުން އަރައިގަތީ ދަރިން ސަރުކާރުގެ ވަޒީފާތަކަށް ފޮނުވައިގެން. މާސްޓާސް ޑިގްރީ ހަދާފައި ނެތް ކުއްޖަކު އަޅުގަނޑުމެންގެ އާއިލާގެ ތެރޭގައި ނުހުންނާނެ. ދެންތިބި ކުދިން ވެސް އެ އަންނަނީ ކިޔަވަމުން."
އަބޫބަކުރު ވިދާޅުވި ގޮތުގައި ސަރުކާރުގައި އަދާކުރާ ވަޒީފާތަކުގައި ނުފޫޒުގައި ޖެހުމަކީ އެ އާއިލާގެ އެއްވެސް މީހަކު ކުރާ ކަމެއް ނޫނެވެ.
"ޑާޓީ ގޭމް ކުޅެ, ކޮރަޕްޝަނެއް ނުހިންގާނެ." އޭނާ ވިދާޅުވި އެވެ.
އޭނާ ވިދާޅުވީ އެ އާއިލާ އަށް މި ސަރުކާރުން ދިން އެންމެ ފްލެޓެއް ވެސް ނެތް ކަމަށެވެ. އޮންނަ އުސޫލުގެ ތެރެއިން ހުށަހަޅައި ފްލެޓް ލިބުނީ ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި ފްލެޓަކާއި ޔާމީންގެ ވެރިކަމުގައި ކަމަށެވެ.
ޔާމީންގެ ހުކުމެކޭ އެއްގޮތަށް ޝަކީލް މިހާތަނަށް ނިންމި ހުރިހާ ޝަރީއަތަކީ ވެސް ނުފޫޒެއް, ރިޝްވަތުގައި ނުޖެހި އަދުލުވެރިކަމާ އެކު ނިންމި ހުކުމްތަކެއް ކަމުގެ ޔަގީންކަން އާއިލާއަށް އޮތް ކަމަށް އަބޫބަކުރު ވިދާޅުވި އެވެ.
"ދޮގާއި މަކަރާއި ހީލަތުން އަޅުގަނޑުމެންގެ އަބުރާ އިއްޒަތް ވަރަށް ހުތުރުކޮށް ނަގާލައިފި. ބަދަލު ހިފާކަށް ނެތިން. އޭގެ ބަދަލު ދައްކަވާނެ," ފާރޫގް ވިދާޅުވި އެވެ.