އއ. މަތިވެރި، ހަސަން އަލީ (ހަސަންފުޅު) އެންމެފަހުން ފެނުނު ކަމަށް އެ ރަށުގެ ގިނަ މީހުން ބުނަނީ މިދިޔަ އަންގާރަ ދުވަހު މަގްރިބް ނަމާދުން ފޭބި ވަގުތުގަ އެވެ. އެ ދުވަހު މެންދުރު ބަނދަރުމަތީގައި އުޅެނިކޮށް ވެސް ބައެއް މީހުންނަށް އޭނާ ފެނުނެވެ.
ރަށު ކައުންސިލާއި ކޯސްޓްގާޑު އަދި ރައްޔިތުން ގުޅިގެން، އިއްޔެއިން ފެށިގެން ހަސަންފުޅު ހޯދުމުގެ މަސައްކަތް އަންނަނީ ކުރަމުންނެވެ. އޭނާ ގޮސްފާނެ ހީވާ ހުރިހާ ތަނެއް ބަލައިފި އެވެ. އޭނާއަށް ވީގޮތެއް ނޭނގި މުޅި ރަށް މިހާރު އޮތީ ހިމޭންކަމެއްގަ އެވެ. ހާސްކަމެއްގަ އެވެ.
މަތިވެރި ކައުންސިލުގެ ރައީސް އަހްމަދު އަސްލަމް "މިހާރު" އަށް ވިދާޅުވި ގޮތުގައި، ހަސަންފުޅު ހޯދުމަށް އެ ރަށުގެ ވަލުތެރެ އާއި މޫދާއި ކައިރީގައި އޮތް ފިނޮޅު ވެސް އިއްޔެ ވަނީ ބަލައިފަ އެވެ.
"މިއަދު ރަށުގެ ކުދި ބަޔަކާއި ސިފައިން އެކީގައި ފަޅުތެރެ އަށް ފީނަން ދާން މިހާރު ވެސް އެ ރެޑީ ވަނީ،" އޭނާ ވިދާޅުވި އެވެ.
އުމުރުން 73 އަހަރުގެ ހަސަންފުޅަކީ ދާ އަޅައިގެން މަސް ހިފަން ދާ މީހެކެވެ. އެކަމަކު ރަށުގެ ބައެއް މީހުން ބުނި ގޮތުގައި އޭނާ ބަލިވެ އުޅޭތީ މަސް ހިފަން ނުދާތާ މިހާރު ދުވަސްކޮޅެއް ވެއްޖެ އެވެ. އޭނާ މަސް ހިފަން ގެންދާ ދަލާ އެއްޗެހި ވެސް ގޭގައި އެބަހުއްޓެވެ.
މަސް ހިފުމުގެ އިތުރުން އޭނާ އަކީ ގޮނޑުންނާއި އެހެން ތަންތަނުން އެއްޗެހި ހޮވައިގެން ތަފާތު އެއްޗެހި ވެސް ހަދައި އުޅޭ މީހެކެވެ. ވަޅި ތޫނުކުރުމާއި ކަޓިން ބޯޑު ހެދުން ކަހަލަ ބައެއް އަތްތެރި މަސައްކަތް ވެސް ކޮށް އުޅެ އެވެ.
"ވަރަށް މީހުންނާ ގުޅޭ ސަކަ މިޒާޖެއްގެ މީހެއް ހަސަންފުޅުބެ އަކީ،" ކައުންސިލްގެ ރައީސް ވިދާޅުވި އެވެ.
އޭނާގެ 8 ކުދިން ތިބެ އެވެ.
ހަސަންފުޅާ ބެހޭ އެއްވެސް މައުލޫމާތެއް އެނގިއްޖެ ނަމަ މަތިވެރި ކައުންސިލުގެ ނަންބަރު 6660058 އަށް ގުޅުމަށް ކައުންސިލުން އެދެ އެވެ.